ISAYA 25 - Biblía Axweesantá Hhohho' ar Mungú 2004

Daa'ángw sluufaay

¹ Aá AAKOÓ MUNGÚ, kuúng an Munguúeé', aníng kuúng un xirfayeés nee un diidi'iimiís, asma kuúng muruú waa/oo/amór koóm una tléhh, muruuwók kudá' taa qoomés iimír aange, aqo un boo/és ar inkihhimu nee looeema.

² Asma kuúng gixsa ana /aantani tléhh, nee koo/ír gawit kari gixsár aa hhiturut tléhh, nee maraá dahaaye tari sangw gixsaroká, sleeme ki baloó /abeesiiká tleehhamoro.

³ Gawaá adoorihe, múk /uuremaá koóm kuúng u xirfayeemiis, nee gixsadaá xoordaá tlakw kuúng uri da'ayumitiyá'.

⁴ Asma kuúng ana dír guwaay tleehhít dír narkutmoowo, ana koo/ír gawit tleehhít dír heé aa aleni oo baraá slahh'amu, ana dír guway tleehhít qoomár bambaaór xaraasla, nee ana mahhtí tleehhít qoomár siree/iro. Asma slahhtá múk tlákw i xarásl adór bambaaór fukukuú' gawaá koo/i.

⁵ A adór tsee/amuú siree/i oo gwa/aát baraá yaamaá kaahará', ala kuúng tsimaahhír dahaaye an xasltís, adór tsee/amuú taa óh nee huunki, gawaá adoorihe, daa'ángw múk tlákw ku slar/atis.

Mungú i muruú /aymár úr amohhe'eemiis

⁶ Gawaá tloomár Siyoniro, AAKOÓ MUNGÚ Aleesleemusmo xoordu sleémeero gin muruú /aymár hhóí qaas, nee difaáír tsuua, nee fu'uunaá wahhaará' ló'wa ale, nee difaáír tsuu' ar ló'wa hhohho'.

⁷ Nee gawaá tloomarihe AAKOÓ MUNGÚ gurhaamidá' muu sleémeero gwa ot gan hingees, tidá' xoordu sleémeero gaa al'iwit.

⁸ Aakoó MUNGÚ gwa'ara gan hingees ay kureeraá kureér. Inós hhirhheeri gin fiits gawaá ilaá muu sleémeerowo, nee mureekeesoó mukós gun hingees baraá yaamu sleémeerowo. Asma AAKOÓ MUNGÚ adoorí gaa oó'.

⁹ Baalaadae muu in ooi, «Kwí an Munguúrén, inós una damraaramaán, as atén tiwa ba/amisár ay, kwí an AAKOÓ MUNGÚ kudá' naa damraaramaán, gimsé' daxta, bara/ u iimu/umaán nee qwal/uwo as ba/amarós.»

Mungú múk Moabu gu muux

¹⁰ AAKOÓ MUNGÚ in kumiit gixsár Siyoni ngiwa xun, ala múk Moabu gun kala/án yaamií ale, adór tsaaroó taa kala/án baraá bohóngw tsuunkáy.

¹¹ Inooín daber'ín ngiri tleesiyá' adór múk baraá ma'áy wa qumburu/umiít, ala dinkwa nee xu'utir'ine AAKOÓ MUNGÚ daara/angw'ín kudá' gun suwatsaat.

¹² Gixsaduín kudá' koo/i tledaadet gin yaamií daahh, giri inslah giri yaamúr tsataat, giri teerúy.