ISAYA 24 - Biblía Axweesantá Hhohho' ar Mungú 2004

Mungú yaamu gi sakwasleemuut

¹ Ga/aaweek, AAKOÓ MUNGÚ yaamu gi hhitín, nee giri dewa'atis. Inós faltá yaamu gan tukuntuuk, nee yaamuloouusér baraadá' hoot gari diyaa/.

² Baalaadae gadaádá' muu gu slaw, kaahamusmo gu sleér sleeme, nee gár lawaalmo gu slaw, aakoowós gu sleér sleeme, nee gár lawaalo'o ga slaw, aayór do' loo' ga sleér sleeme, nee gár heé tlaxuúm gu slaw, heé weeramiís gu sleér sleeme, nee gár heé kirkiít gu slaw, heé ta kirkiti gu sleér sleeme, nee gár heé ta iinuusi gu slaw, kudá' iinuús gu sleér sleeme.

³ Yaamu ki xaanxay tleehh, kiri kángw kilá' wa qwaarees, asma AAKOÓ MUNGÚ tí gana oó'.

⁴ Yaamu i tsuunqumiisiyá' nee i hhiturutiyá', yaamu i amoqwaqwadiná' nee i hhiturutiyá', doori nee yaamuwo i amoqwaqwadiná'.

⁵ Yaamu kaa meetagaás nee mukdá' gi hoót, asma hara'ayár Mungú ngina hhitiné', nee kaahirós ngina si'iyé', nee alqadoodár alhhe'eesay wasl ngiri si'iyé'.

⁶ Gawaá adoorihe lo'o yaamu gaa /ák, nee yaamuloouusér baraá yaamu ka slahh'eemiis as tlakweemaaín. Gawaá adoorihe yaamuloouusér baraá yaamu aa /aaruúr, nee múk niiná kilós ina meét.

⁷ Sabiíbu i kahaakah, difaái i káhh, nee mukdá' sleémeero ga saqwalalaá/ i tiiq gurhaamiro.

⁸ Qwal/uú tawa neeti ar oowi aa faák, afór ururu'uumis aa qwát, qwal/uú tawa neeti ar gidaandori aa faák.

⁹ I malé kumitiaaká difaái kawa xufi ar girayda, difaáír aa hamat iri tlí/ dír xufutuuseero.

¹⁰ Gixsadár tlaahhuso'o kaa yaamií daáhh Umuú afkú do'o kwaa tseék as hee miwa dáh.

¹¹ Baraá lohduuwo muu /aa/eewo tsee/a gaa faák, as difaái kawa dakuús, qwala/ sleémeero aa faák, qaseengw baraá yaamuwo aa suquút.

¹² Baraá gixsaro gár aa met a deewa'ame kilós, nee afkú gixsa kwa tuuaaiít iri hhituruút.

¹³ Adoodá' mamaá niiná nir meetiya' gawaá xa'anoó seituúni, laqaá gawaá xa'anoó sabiíbu, alaá burkwa hhe'eés bu'uungo, an adoodá' tleehharuut baraá yaamu sleémeero, múk niiná i slafíngwí meet.

¹⁴ Panaydá' aa meet iri tseeamín, iri daa' ar qwala/, tari tseeamín iimír /uwá wa alé as aleesleemuú AAKOÓ MUNGÚ.

¹⁵ AAKOÓ MUNGÚ kuri xirfayeemiis da/awe, mukduú afaá tlawtá hoót, umuú AAKOÓ MUNGÚ, MUNGÚ Israeli, nguri xirfayeemisiyá'.

¹⁶ Afór xirfayeemis ana axaasaán iimír ku/uyaá doori, afór xirfuú kudá' gan'amuú koóm kuwa xirfayeemisi. Ala aníng ana oó', «Aníng aga slaqwa tlakúw, aníng aga slaqwa tlakúw. Tsaxwaeé'!» Asma múk al/agiím al/aymaaro tan ak kumiit, al/aymuuse in ak ló'wa kumít al/aymaro.

¹⁷ Kuungaá yaamuloouusér baraá yaamu, dae nu sleér, nee /e/etíngw baraá boh'eero, nee tunduwa uhín ar tsaaxwel.

¹⁸ Heé aa daér wa goow, in /eet baraá bohoongw, nee kudá' ni baraá bohóngw wa ti'imiít kun oh nee tsaaxweeli. Asma foxa'aá doori kaa gweér nee iihhafiirír yaamu i diingiín.

¹⁹ Yaamu i ló'wa gwagwa'aná', yaamu i ló'wa feehhamitiyá', yaamu i taa/aná' ló'wa ale.

²⁰ Yaamu i ta/amiitiyá' adór heé aa ooniit, yaamu i taa/aná' adór islaangw, asma kaa al'iilooúy nee huwár tlakweemaaín. Inooín i huuiyá' sleeme i baloó sihhitiaaká.

²¹ Baalaadae AAKOÓ MUNGÚ slawodaá gawaá doori gi slaahh, waawituú baraá yaamu sleeme gun slaahh.

²² Sleémeero kiri dinkwárí burumbuur adór múk taa tsegiít, kuri /aytiís baraá bohoongw, Inooín kin tsegiit baraá doó tseegamo alaá deelór hhaawaakahe kiri muux.

²³ Aluuwo slahhaangw iri giiw, nee tsee/amá gwa/aateema giri máy, asma AAKOÓ MUNGÚ Aleesleemusmo tloomár Siyoni nee Yerusalemu gan sawaawuti'ín, nee xirfuuwós guri laqán dír bariisér mukós.