ISAYA 23 - Biblía Axweesantá Hhohho' ar Mungú 2004

Yaamaá Tiro nee Sidoni ki qwaarees

¹ Kaangwí a iigu'utuú Mungú aa laqán daanduú Tiroro. Kuungaásá múk Tarshishi awa baraá tlawtár hi'iimamitá' tsuunqumisé', asma gixsár Tiro kaa hhaamiís tam maraydaá afaá tlawi i kahhiyá'. Bál bar naa ki/é' Kuprór wa ale, kaangwí u axasá'.

² Xasliité' kuungaásingaá yaamuloouusér afaá tlawi, xasliité' kuungaásingaá halanuusér Sidoni, kuungaásingá' ya/abuuserhúng tlawi gaa waawaarahh,

³ niri hi'iimamitiyé' baraá tlabeemoó wa alé, slaasláwarhúng a balángw Shihórír daáhh, bu'úngw yaaér Nili, Kuungá' halaanu'uuma kari tlehhé' nee xoordaá yaariir.

⁴ Muruuté' kuungaásá Sidoni, múk gixsar'ín taa harweér ar koo/ír gawit, asma tlawi sleeme kaangwí gu alki/ít i kat, «Aníng asltá xwayla aga baloó tsaqiiká, sleeme aga baloó laqwaaliiká, daaqoó naa umiím i kaahh, tam dasuú naa ureemiís i kaahh.»

⁵ Kángw Tiro kawa hhaamiís, burkwa axaás baraá yaamaá Misriro, múk Misri iri slahhaa' ló'wa alé.

⁶ Tlawsé', ta'aaimé' ay yaamaá Tarshishi, tsuunqumiisé' kuungaásá yaamuloouusér afaá tlawi.

⁷ Gixsarí an gixsár qwal/úwo dír Tiroro, gixsadá' taa tleéhh iimír aáng wa alé, tidá' yaamuloouuseerós ayeemaá sawen gaa aalír eer.

⁸ Heé muruuwí tlákw gwaa qoomees daanduú Tiroro a heemá, gixsarí waawitá gun slam'í dahamaamís halaanuuseerós an geeraharuuse, nee mukós kudá' muruú weermamiís an múk ta ilaiwawa/i baraá yaamuwo.

⁹ AAKOÓ MUNGÚ Aleesleemusmo kaangwí guna qoomeés, as daara/angw'ín kudá' aa xirfuut nguwa slasla/areesi, nee mukdá' sleémeero ta ilaiwawa/i nguwa mureekeesi baraá yaamuwo.

¹⁰ Baraá yaamuuwók ar waaraahheek adór yaaér Nili, kuungaásá múk Tarshishi, asma daxta gár nu tatlmis i káhh.

¹¹ Asma inós dakós gwaa tleés gawaá daanduú tlawi, waawuti'iima gari diingiís. AAKOÓ MUNGÚ hara'aya gaa oó' ar koo/ír gawit ar Kana'ani kawa hhaamisi.

¹² I kaahi, «Aá gixsár Sidoni, tidár baramaanuso'o, kiíng qwal/uwo a ki/iká, tam bar yaamaá Kuprórí goba, amorqae amohhooa a sleeraaká sleeme.»

¹³ Ga/aaweek mukdá' makaá sla/a ngaa geemay niwa haratlaya' amór gixsár Tiro a múk Kaldayo, slám a múk Ashururoká. Inooín an múk gixsa gaa harweer ar /aampu, as kawa i haratlay, maraywós kudaá waawitá kiri taangúy.

¹⁴ Tsuunqumiisé' kuungaásá miringér Tarshishi, asma koo/irhúng tidá' tay gwaagoba' kaa gaás.

¹⁵ Baalaadae gixsár Tiro ka gunqarees harqoomoó kureeraá miberaá faanqwe, kureeriiká' a harqoomoó hotaá waawutmoó wák. Kureeraá mibeeraá faanqw birna faakiyé', gixsár Tiro gár ga slaw a slaqás nee tidá' muu aa daa'ángw wa óh daanduú sli'imaro, tawa kaahi,

¹⁶ «Mariímbarók taatahheek, tláw baraá gixsa wa hi'iimiteek, kiíngasír sli'iimuso'o ar taa gunqaareés, daa'ángw tsuú' daaeek, daa'ángw yaariír daaeek, daqaní dooqa ti malé insláy.»

¹⁷ Alaá kureeriiká mibeeraá faanqwe AAKOÓ MUNGÚ gixsár Tiro ga malé pa/ángwií haniis, inós tiri malé weeramisuú eér, iri kí/ baraá sli'ima nee waawituú xoordu sleémeero gawaá daanduú yaamuwo.

¹⁸ Peésaadá' ni sleer kari paraatl as AAKOÓ MUNGÚ, peésaadá' ka batsiiká, laqaá ka amohhe'eesiiká, ala aqo har mukdá' AAKOÓ MUNGÚ ngu sluufmamisá' kilooín kan muruú /aymár yaariírár tlaaxw nee tlabaá hhohho'.