ISAYA 22 - Biblía Axweesantá Hhohho' ar Mungú 2004

Geehhooeemaá daanduú gixsár Yerusalemu

¹ Iigu'utuú Mungú aa laqán daanduú xatstá iigu'utuú. Aá Yerusalemu, gár naa xeer a milá? Baré kuungá' sleémeero aga tsa/aandé' gawaá daandemaá maraay.

² Ahaá asma milá tseeoro yaamu misa gaamisé'? Gixsa aa leexút, ta qwalalaa/, mukhúng kudá' taa tsuú/, kwaa tsu/iiká baraá slaqwarár wa alé, laqaá kwaa tsu/iiká ar paánga.

³ Geeraharuuserhúng sleémeero tana al/akumiít, dír kira tlaqutiiká kina uhín, mukók sleémeero kudá' taa harasliqiít kuna ar tláy, tam naa guwii'i amór saáwí alé.

⁴ Gawaá adoorihe, aníng ana oó', aníng mi i qaytsimiitara', aníng mawaaré' ni /aa/amiím ar slahh'amu, ma daawimiitaara' aníng iwa gurkwa/amisa', asma muk'eé' iwa hhán.

⁵ Asma Aako MUNGÚ Aleesleemusmo, baala gaa amohhe'eés, baalár /aa/e, nee kal/aando, nee ar tlaahhi, baraá xatstá iigu'utuuwo, koo/ír gixsa kaa yaamií daáhh nee tsimaahhír muko tlom'i niri ilaoohiyé'.

⁶ Slaqwaruusér Elamu tlaangasuuín ngwa ót, dinkwa nee gaarduudá' faras i uuruxuna, nee mukdá' faras ngwa i tsa/ani, nee slaqwaruusér yaamaá Kiri gaambuín ngaa amohhe'és.

⁷ Xatsoowók kudá' ta ló'wa sla' gaardaá slaqwara baraadá' ngaa dalaa/iyé', nee mukdá' faras gwa i tsa/an aa afkú gixsarók i sihhiít.

⁸ Baqmór Yuda kaa hingeés. Baalaadae xooslár slaqwara kari leelehhtuú eeré' amór do'oduú baraá darma.

⁹ Kuungá' kari aandé' adór wa/ángw aa fee/amiit baraá koo/ír gixsár Daudiwo kur yaariír, kuungá' ma'aá hhalangwduú baraay kiri hhekité'.

¹⁰ Kuungá' maraá baraá gixsár Yerusalemu kiri tsee/aarindé', kiri fe/ité' as tlaa/eedá' kiwa koo/ír gixsárár gawdesa'.

¹¹ Baraá tla/eeraá ko/aá tsare hhalángw ma'aay kuri folé' as kahhó' ma'aá hhalangwduú aáng kiwa baraadií ota'. Ala kuungá' Munguúdá' muruuwí sleémeero gwa tleehh ugwa leelehhi'iiká, laqaá adoodá' aa qoomeés iimír aange aga ya/andi'iiká.

¹² Baalaadae Aako MUNGÚ Aleesleemusmo muu gun bay, «/Aa/amimé' nee tsuunqumisé', nee deequmé', nee guniyadu siinootaak.»

¹³ Ala ga/aawaak kuungá' ana qwalaa/é' tari qasesendé', awe nee bee/aango kiri tsu/é', fu'unaay kiri /agé', nee difaái kari xufé' tari katé', «Qwalaasé', a /ayimaán nee a xufiitaán, asma matlo a qatlaán.»

¹⁴ AAKOÓ MUNGÚ Aleesleemusmo kaangwí nguna dir'eéní geehhooeés, kaahi, «Looeemaawo, tlakweemaaká' ki gurtlayká ay dír tay qatli.» Aako MUNGÚ Aleesleemusmo tí gana oó'.

Shebna kuwa gurbuú'

¹⁵ Aako MUNGÚ Aleesleemusmo aníng iri báy, «Tláw amór Shebna, sagesihhtusmoó doó waawutmo, ku beer,

¹⁶ ‹Hariímaarók a milá diirihe? Heewók a heemá diirihe, tam /aantarók kari fól diirír gawaá tlooma? Dír hotaawók tari gawaá tlaa/a.

¹⁷ Kuúnguusíng /uuruú koóm, ga/aaweek, AAKOÓ MUNGÚ kuúng u kwaahh tari hhiturút. Mungú kuúng un nagwaahh uri tukuuntukaakín,

¹⁸ uri kwaahh adór iimpiirmó wa alé dír tsetse/ami, kuúng tari gwá' bihhaá gaarduuwók kudaá slaqwara tar daara/aan. Kuúng doó aakoowók kuri mureekés.

¹⁹ Aníng kuúng u kwaáhh baraá geeraharu'uumaro, uri daáhh dirók tidá' tay diria.

²⁰ Baalaadae aníng sagadiyusmooeé' Eliakimu garmoó Hilkia ngu huúw.

²¹ Aníng inós un hiyaywók kudá' i dahaás, himuuduú afeetloowók nguri dirósí haniís, nee geeraharu'uumarók ngari dirós i haniís, inós tari taata dír yaamuloouusér Yerusalemuro nee ar Yudawo.

²² Aníng gweermór doó Daudi an dirós i haniís. Inós bar gaa nga gweér, heé ga tseék i kaahh, nee inós bar ngaa tseék, heé ga gweér i kaahh.

²³ Aníng inós un gawdeés adór kiki'ír ta slaáhh dír kawa saxmaár, nee waawuti'iimarós kari ilaiwawaa/ nee doó baabuúwós.

²⁴ Nee múk doó baabuúwós nee xwaylarose inós kuri harahhiif, adór xooslár hutli'i nee slooqi'i awa ta tarereé' gawaá mogoolmo.

²⁵ Ala Baalaadae kiki'idá' ta slaáhh dír kawa saxmaár bira tununu/út, geeraharu'uumarós aqo kan hingees, nee huwaadár gawaawós aqo kan amór saáwí kwaahh, asma anuú AAKOÓ MUNGÚ tí gaa oó'.› »