ISAYA 21 - Biblía Axweesantá Hhohho' ar Mungú 2004

Iigu'utuú hu'uumaá Babuloni

¹ Kaangwí a iigu'utuú Mungú aa laqán daanduú yaamaá xaanxoó afaá tlawto. Adoodá' bambaaór baskú daahh ir harafitsaatsit múk ni haratláw baskú wa ale i baraá xaanxoó daahh, amór yaamaá múk xaraásl ngin dahhiyá'.

² Iigu'utuú xaraásl kunguna aníngí laqán, daanduú heé al/aymusmo iwa al/agin nee daanduú hhituusmo iwa hhitiitin. Kuungaá múk Elamu, tlawsé', gawa i tsa/amak. Kuungaá múk Medi, tlawsé', haratlawé'. Mungú slahh'amu sleémeero gu faak, kudá' tindi haahuwi nee múk Babuloni.

³ Gawaá adoorihe, tla/angw'eé' iri tsatiít as iigu'utuudá', slahha'amú adór mutaai aníng iri áy, slahha'amú adór kuqú /ameenír xwayla iri áy. Aníng ana yaamií huú', tam gár ni axamiis i káhh, ana daanda feehhiít tam sleeme a xumiisaaká.

⁴ Inslaway'eé' i amoqwaqwadín, daér yaariir iga eér, tsiindo in daamaraám, ala niwa hardihiyé' ana ak daaraáx.

⁵ Muruú /ayma kuna amohhe'eés, inqwar kuna hhaáf, hamí muu i /ayín nee i wahán. «Kuungaásingaá geeraharuúse! Tlawaaré', gaambu slikaak!»

⁶ Asma Mungú aníng ina báy, «Tláw xuumusmo qaaseek, inós gár aa ár ngi ooi.

⁷ Múk faras ngwaa i tsa/an oo ti tsadér wa koóm burngwa ár, laqaá oo daqwaaye ngaa i tsa/an, laqaá angamía, inós iia ngi ló'wa qaasi, nee ngi ló'wa sihhi.»

⁸ Aluuwo xuumusmoodá' iri tseé', i kaahi, «Aáko, aníng ana gawaá /aampár wa sihhmamiít, ana xumaamiís tlaatla/aangw sleémeero, xuumár xweera sleeme ana óh.

⁹ Qaytsiít, múk faras ngwaa i tsa/an i hi'iit, ti tsadér wa koomakoná'!» Ta kaahi, «Babuloni aa hú', nee slaqsi'iiwós kudaá mungui, kin yaamúr slaáhh kiri giqaaqáy.»

¹⁰ Aá múk Israeli, muk'eé', kuungaasingá' taa tuuaiít adór balángw wa alé, kángw naa dír AAKOÓ MUNGÚ Aleesleemusmoó wa axaás, Munguú Israeli, ngwa dirhúngií oó'.

Geehhooeemaá Mungú aa laqán daanduú Edomuwo

¹¹ Kaangwí a geehhooeemaá Mungú aa laqán daanduú Edomu Heeko aníng ina amór Seírír wa ateét, i kaahi, «Xuumusámo, gár naa aán xweeraawo? Xuumusámo, gár naa aán xweeraawo?»

¹² Xuumusmo iri oó', «Looa niqo tlatleér, nee xweera ni hardihiyá' sleeme. Kuúng bar yaahamisuú slá', yaahamiís, ta tleér, ni malé kí/.»

Geehhoeemaá daanduú yaamaá Ma/arabu

¹³ Kaangwí a geehhoeemaá Mungú aa laqán daanduú yaamaá Ma/arabuwo. Kuungaásaá aauusér Dedani, heemaduuhúng sihhaak xweeraá laarí baraá yaamaá sla/a awa Ma/arabu.

¹⁴ Kuungaásaá yaamuloouusér yaamaá Tema, muksíng aa waxiimiit wahasaak, muksíng naa goow muruú /aymaro qawaak.

¹⁵ Asma inooín slaqwara ngina ilaguwiyé', paangadaá taa duúx baraá qaw'iwo ngina ilaguwiyé'. Maheeraá taa baraá tlaangasú wa duúx nee slaqwarár xaraasl ngina ilaguwiyé'.

¹⁶ Asma Aako aníng ina báy, «Baraá guruú kurkú wake, u /aaresaaká, nee u harwaarahhasaaká, adór kuquú heé ta bu'un tlaatla/ángw wake, xirfuú múk Kedari u qwaareés.

¹⁷ Miguusér niina, tidá' maheeraá tlaquut ar múk Kedari, in mét. Anuú AAKOÓ MUNGÚ, Munguú Israeli, tí ana oó'.»