ISAYA 20 - Biblía Axweesantá Hhohho' ar Mungú 2004

Layár aarusmo iwa /ankweetsín

¹ Kurkudá' waawutmo Sargoni oo Ashuru geeraharusmoó úr oo slaqwaruuseerós nguwa ya/aáw, tari slaáqw nee gixsár Ashdodi, gari hayóh,

² qoomaadae AAKOÓ MUNGÚ Isaya, garmoó Amos gwaa báy, «Tlabaasingaá guniyadu duuxeek gawaá slaqwtoge nee ya/ataawo sleeme.» Isaya axweesantí gari iialooeés, gari tleéhh iri hi'iimiít ar /aankwets nee ya'aá tawo.

³ Aluuwo kurkudá' gixsár Ashdodi kawa hayóh, AAKOÓ MUNGÚ iri oó', «Ar adoodá' sagadiyusmooeé' Isaya ira hi'iimiít ar /aankwets nee ya'aá tawo, as iwa laya tleehhiti nee slaqsaay oo tleehharuút dír múk Misri nee oo Kushiro,

⁴ gawaá adoorihe waawutmoó Ashuru múk Misri nee oo Kushiro gu ar tláy baraá lawaali'iima, múk urén nee na/iiwo. Ginar tláy awa /aankwets nee ya'aá tawo nee gwe'ede tsee/a, múk Misri kuri mureekees.

⁵ Daqaní mukdá' sleémeero oo múk Kushi gwaa harahhiif, nee kudá' Misri gara daara/uut, tan daandeemo feehhamiit, tari amoqwaar.

⁶ Baalaadae yaamuuloouusér afaá tlawi iri o', ‹Qaytsité', mukdá' atén ta harahhifaafitaan gár gwaa sleer, kudá' tay gwaagowaan tiwa tu/iya' dír waawutmoó Ashuruwo. Hám daxta atén adór tar /uwaan?› »