ISAYA 2 - Biblía Axweesantá Hhohho' ar Mungú 2004

Wayduú hotaatiím

¹ Kaangwí an axweesantá Mungú ar Isaya garmoó Amos aa axaás daanduú múk Yuda nee Yerusalemuro.

² Adoorí an adór deelór alhhe'eesaywo tleehharuut. Tloomár Doó AAKOÓ MUNGÚ ka gawdees tlom'i sleémeero ba/a, nee kari gáwtí tlees tlom'aá hatlá' ba/a, nee xoordu sleémeero ngiri i daqayá'.

³ Xoordaá yaariir nin daqayá' niri ooiya', «Qwalaasé', gusé', gawaá tloomár AAKOÓ MUNGÚ, amór doó Munguú Yakobo, as kahhó' inós tiwa intsaahhatisi lohduuwose, as kahhó' atén tawa baraá lohduuwós wa hootaan, asma baraá Siyoniro dabe nin ti'ít, nee baraá Yerusalemuro axweesantá AAKOÓ MUNGÚ a axaasaán.»

⁴ Inós baraá xoordu sleémeero sakwasleema ga tleehh. Nee qaa/oó múk yaariír gun tsaat, inooín paangaduuín ngi kwahhutiyá', kiri kureemi tleehh. Lawluuín kiri tsata'aá tsaaráy tleehh, Xooro i xoorór hatlá' i slaqwká, slám slaqwara ngi malé intsaatsahhiaaká.

⁵ Kuungaá doó Yakobo, qwalaasé' a hootaán, baraá gwa/aateemaá AAKOÓ MUNGÚ wa ale.

Daara/uuse ka hhaamiis

⁶ Asma kuúng mukók oo Israeli ugwa sí', asma da/aluusér da/aáw daahh baraá ayaaín gwaa dalá/. Múk tlaa/aá xuú' i deer, adór múk Filisti, taa aldinku'uús nee hooma.

⁷ Slám yaamuuín peésa nee sahaábuwo naa hatsiyé', nee alhhe'eesoó slasláwar'ín i kaahh. Yaamuuín naa hatsiyé' farsuuwo, nee gaardaá farsuuín i alhhe'eesoó kon'aaká.

⁸ Yaamuuín naa hatsiyé' munguaá murslaaqatuuwo, gár i sluufmisiya' a gadiyér dabaaín, muruú taa tlehhiít ar ditsaá kilá'.

⁹ As adoorí umuú heewo ku amoqwaarees, hhawaate ki mureekees, gawaá adoorihe, inooín mi gurtlawaar.

¹⁰ Dáh baraá guruú tlaa/a, nahhaát baraá teeri geeraá dae tlaquú AAKOÓ MUNGÚ nira hardihiiká, nee geeraá xirfuú waawuti'iimarose.

¹¹ Heé daara/ángwár xumiís ku baráy /aytiis, nee múk daara/aám ku baráy ki/is. Baalaadae AAKOÓ MUNGÚ kilós kun xirfayemiis.

¹² Asma baalár AAKOÓ MUNGÚ Aleesleemusmo i hi'ít, dír mukdaádá' sleémeero sage gawdén nee oo daara/uuseero, nee daandemaá kudá' ti gáwtí tleemisá'.

¹³ Nee daanduú sahhtár Lebanoniro, tidaádá' tledaadet aa gáwtí sawes nee gawaá daanduú ti'ita sleémeero oo yaamaá Bashani.

¹⁴ Nee gawaá tlom'aá tlet sleémeero, nee gawaá gongoama' sleémeero kudá' gáwtí sawen

¹⁵ Nee gawaá daanduú umuúqo /aampár tleere, nee umuúqo koo/ír gawide.

¹⁶ Nee gawaá daanduú miringe sleémeero ar yaamaá Tarshishi, nee gawaá daanduú miringe sleémeero tidá' hhohhoe.

¹⁷ Nee daara/ángw hee ku baráy ki/is, nee saga gawduú muu ku /aytiis. AAKOÓ MUNGÚ kilós baalaadae kun xirfayemiis.

¹⁸ Munguaá murslaaqat niri qwanaay hhe'eesiyá'.

¹⁹ Muu iri dah baraá mar'ór tla/u, nee baraá boh'ér yaamu, geeraá dae tlaquú AAKOÓ MUNGÚ nira hardihiiká nee xirfuú waawuti'iimarós, qoomár birna tláy as yaamu ngiwa dae tsati.

²⁰ Baalaadae umuúqo heewo munguiiwós kudaá murslaaqat gi kwaahh, amór kuti nee hhampararama', kuduú peésa nee oo sahaábuwo. Kudaádá' naa tleehhiyé', as nguwa sluufmisiya'.

²¹ Inooín nin dahiyá' baraá guruú mar'ór tla/u, nee baraá pa/eeraá tla/u, geeraá dae tlaquú AAKOÓ MUNGÚ nira hardihiiká, nee xirfuú waawuti'iimarose, qoomár birna tláy as yaamu ngiwa dae tsati.

²² Hee mawaák, slafiingós i hootiiká, a adór hiinsla, inós gár kuwa haraafat a milá?