ISAYA 19 - Biblía Axweesantá Hhohho' ar Mungú 2004

Mungú yaamaá Misri gi muux

¹ Kaangwí a iigu'utuú Mungú aa laqán daanduú yaamaá Misriro. «Ga/aaweek, AAKOÓ MUNGÚ aa tsa/án gawaá huunkír inslaahh, i amór yaamaá Misrír káy, slaqsi'iidá' munguaá Misri niri dír geeraawós wá daaraxaatiyá', Gur'ér múk Misri ma'aay ngay dal/aná'.

² Aníng múk Misri un tlaahhírí kwaáhh, umuú heewo nee hhiyaawós tiri ayá'. Tam inslaawmo nee kuqá' tin ayá', aya nee kuqá' tiri ayá', waawutmo nee kuqá' tiri i tlayá'.

³ Múk Misri iri sage qwaqwdín, aníng kangw'ín kudá' naa qoomeesiyé' un hhitiím, Inooín gurbua ngiri leehhiyá' dír slaqsi'idaá mungui nee dír gi'i nee dír iigu'utuuse nee da/aluuse.

⁴ Aníng múk Misri nguri haniís dír heé tlaákw, waawutmoó xaraásl giri sawaawuti'ín, Anuú Aako, AAKOÓ MUNGÚ Aleesleemusmo tí an káh.»

⁵ Ma'aá yaaér Nili niri /oná', yaae iri qor'ót, iri kát.

⁶ Mapeerodaá ma'aay xwaansláy giri dalaa/, tsiinqaá yaaér Nili ar yaamaá Misri niri alqwaaresiyá', niri kahiyá', tsaaráy nee miringedár oombase niri tsutsuiyá'.

⁷ Afaá yaaér Nili niri meetiyá' tawó ale, didár kaankír yaaér Misri sleeme. Umuú gár taa dahaasi afaá yaaér Nili in kát, kari ar tláy nee fur'a, iri qwát.

⁸ Mukdá' siyoó ohahiím in /aa/amín tari wa/aa/uus, mukdá' sleémeero baratsufay gur gadiyumamiís tari qununuu/, kudá' sleémeero baratsufoó qamaamimá' baraá ma'aay niri hirqimiitiyá'.

⁹ Mukdá' kitaanír xiislaasliít iri muneesii', tam kudá' tlabaá hirimaamitá' sleeme.

¹⁰ Kudá' sleémeero tlabaá tlehhaahhitá kuri amoqwaarees, nee mukdá' sleémeero ta bu'un tlaatla/ángw wák tari gurhaamuut.

¹¹ Geeraharuusér Soani a daktanár huwisha. Gurbu'uusér sagalooár koom ar Farao gurbu'tá dakatu'uuma gan kát. Alók adór Farao kura beeré', «Aníng a na/oó heé sagaloó' a na/oó waawutmoduú aáng.»

¹² Aá Farao, mukók kudá' sageeloén i amá? Gimáy, gadaádá' AAKOÓ MUNGÚ Aleesleemusmo naa istí tsaát tleehhamoro daanduú Misriro, inooín ngi dorógí ooiye' as kawa xu'.

¹³ Geeraharuusér Soani a daktana, nee geeraharuusér Memfisi kaa al/aáy, tla/uudá' sleémeero ta harahhifi baraá tlahh'iiwo, an kudá' múk Misri ngwa geerahariye' baraá qwanaay.

¹⁴ AAKOÓ MUNGÚ inooín gina inslawoó tlaahhírí kwaáhh, inooín múk Misri nguri leexuyé', baraá muruuín kudá' sleémeero ta tlehhiiti. adór xufutusmoó ta/amiít oo hara wa/amiím.

¹⁵ Heé baraá yaamaá Misriro gár hhoo' tleehhamooro ga aleesláw i kaahh, tam geeraharusmo laqaá yaamulousmo, tam heé iiatleér, laqaá oo aleesleemuú koomaaká.

Xoorór Misri Mungú gu sluufmisuú eér

¹⁶ Baalaadae múk Misri tari da'ayumiit adór /ameena, tari kitlkiitl daeero as dakwduú AAKOÓ MUNGÚ Aleesleemusmo aa gawaaíní tleés.

¹⁷ Yaamaá Yuda kiri da'ayuut nee yaamaá Misri, umuú heewo oo taa kángw yaamaá Yuda báy, in daanda feehhiit daeero, as tlehhmuwí AAKOÓ MUNGÚ Aleesleemusmo aa istí tsaát tleehhamooro daanduine.

¹⁸ Baalaadae tsifrír Ebrania kanar axwees baraá gixsadaá kooán awa yaamaá Misriro, múk gixsaduudá' lo'o kari /aay dir AAKOÓ MUNGÚ Aleesleemusmoó wa alé, ar inooín kiwa inkihhím. Gixsár wák kari bay, «Gixsár Tsee/amá.»

¹⁹ Baalaadae kitángw ilahhooa kawa hanmiis dír AAKOÓ MUNGÚ kuri tleehh baraá tla/ángw yaamaá Misri, nee uhmoó taa paraátl as AAKOÓ MUNGÚ kuri siihh baraá digeemaá yaamaá Misri.

²⁰ Muruuwí tari laya nee lamabu'uungw dír AAKOÓ MUNGÚ Aleesleemusmoowo baraá yaamaá Misriro, qoomár birna amór AAKOÓ MUNGÚ i /aa/iyé' as baramaanusmo, inós gin ba/amusmoówí ya/aaw, giri aleekalaa/, giri ba/amis.

²¹ AAKOÓ MUNGÚ tiri xu'utis dír múk Misri. Nee múk Misri AAKOÓ MUNGÚ nguri xuiyá', nguri sluufmiisiyá' ar ilahhooár muruú ta tsu/i, nee ilahhooár da/a/ango, nee al'axweesani ngiri oiná' dír AAKOÓ MUNGÚ, ngiri boo/eesiyá'.

²² AAKOÓ MUNGÚ xoorór Misri gan muux, inós birnga muúx gari huungu/umiis. Inooín niri ki/iyá' amór AAKOÓ MUNGÚ, nee inós firor'ín gari axaas giri huungu/uus.

²³ Baalaadae loohír ur ni Misrír wa tleér ay Ashuru, múk Ashuru nee múk Misri tiri haraxaxayá'. Múk Misri nee oo Ashuru Mungú nguri dinkwár sluufmiisiyá'.

²⁴ Baalaadae múk Israeli in haragwaa' dír múk Misri nee oo Ashuru, inooínaaká' tamaawo tsuuqa ngiri huwiyá' baraá yaamu sleémeerowo.

²⁵ Asma inooín an kudá' AAKOÓ MUNGÚ Aleesleemusmo aa tsuúq, iwa kaahi, «Muk'eé' oo Misri ku tsuuqi, dinkwa nee múk Ashuru kudá' dabaeene naa tleéhh, dinkwa nee múk Israeli kuduú aalir'eé'.»