ISAYA 18 - Biblía Axweesantá Hhohho' ar Mungú 2004

Mungú xoorór Kushi ga muux

¹ Tsaxwaaín yaamuudá' xuuraaír hhampe'eeri kawa axamiisi, kudá' ya'aá Kushiro gayuqá' i diriiá',

² kudá ya/abuuser'ín ya/abiitá' ar baraá yaaér Nili, kudá' aa'aá kakaawá' ar baraá ma'aay ar miringér taa tleéhh ar oombas. Tlawsé', kuungaásingaá ya/abuusér islahh, tlawsé', amór múk tledaadét nee oo slaqooín natsaatsa'á', amór mukdá' dae tlaáq umuú diiro, amór xooroodá' /uuruú koom nee baalaaliim, tidá' yaamuuwós taa qasiís nee yau.

³ Kuungaásaá yaamuloouusér baraá yaamu sleémeero, iia qaasaak, kuungaásingá' baraá yaamú wa hootá', qoomár bendeéra bar ka gawaá tlom'í wa tleés ta qaytsitá', qoomár tarumbeéta barka ufaáhh iia ka qasá'.

⁴ Asma AAKOÓ MUNGÚ aníng ina báy, «Aníng an didár hotaaeé' xasliít, a xumiís, adór tsee/amángw aa xaslmiit qoomár siiree/iro, adór huunkoó tluúw qoomár siree/ír fiiqituwo.

⁵ Asma dír fiiqit ira xayká, qoomár /ayo bira hú', qoomár sabiíbu bira hamaár, Mungú harma/o gan tsaat ar makásidá' xaai kir tlaqaaqati, nee haleemiidá' naa ifiitiye' giri alkwaasl.

⁶ Inooín sleémeero kin geexáy tawa muruú /aymár gwaresuú gawaá tlom'i nee muruú /aymár makaá baraá yaamu. Inooín gwares gin /aay qoomár qu'uuwo, kiri /aay nee makaá baraá yaamu qoomár tsaaqutmoowo.»

⁷ «Qoomaadae AAKOÓ MUNGÚ Aleesleemusmo kungun qeemií huuw nee múk tledaadét nee oo slaqo natsatsa'ayen, xoorór dae tlaaq ar tsewen nee ar sawen, xooroodá' /uuruú koom nee baalaaliim, tidá' yaamuuwós taa qasiís nee yau, sluufaay kungun huuw amór tloomár Siyoni didá' AAKOÓ MUNGÚ Aleesleemusmo kuwa sluufmaamisi.»