ISAYA 16 - Biblía Axweesantá Hhohho' ar Mungú 2004

Alee/isoó Moabu i kaahh

¹ Deeloó bee/aangw ya/awaak, amór waawituú yaamu amór Sela tiwa ya/abe' tidár baraá xaanxaay, ay amór tloomár múk Siyoni.

² Adór tsir/ór taa tleés ar taa diyaá/ dír maray'ín wa alé, an adór múk Moabu i dirii'i, dír waarahhamaá yaaér Arnoniro.

³ Múk Moabu i múk Yuda babay, «Atén ti gurbue', kangwrén tlaaqare', xuumarhúng daandemorene doogare' adór giwtír naa tlatla/ángw iimu/uun. Mukrén oo tinda guús lu/aak, nee kudá' naa ayahúngí /akumiit mu geewaqaatara'.

⁴ Múk Moabu oo tinda guús i baraá ayaahúng wa hooti, kuungá' dír guway'ín tleehhité' as mukdá' gi hhaamimiís.» Ay dír mukdá' gi baramaanuús i qwaari, nee ay dír kudá' múk hhaamimiís i hhan, ay dír mukdá' múk yaamaá hara'adarahá' i hhan baraá yaamuwo.

⁵ Baraá doó Daudiwo heé sla'aari warqawaaká iri waawuti'ín, muu guri geerahaar ar inkihhimu. Inós kwasleemadu gin tleehh ar loohír ganaa', ku ló'wa inslaáhh gana'amu nguwa tleehhi.

⁶ Múk Yuda ta kaahi, «Atén kángw daara/ángw múk Moabu ugwa axaasaán adór ir hiintaluusiya' nee ir daara/ana', nee adór kir sagegawdén. Ala daara/angw'ín a tawo.»

⁷ Gawaá adoorihe Moabu mawaak i tsuunqumis, Umuúqo heewo baraá Moaburo mawaak i tsuunqumiisi, ta tsuunqumiisi as slahhtadá' ur naa slayé', nee as mikaáteedá' taa tleéhh ar sabiíbu, ar baraá Kirihareseti.

⁸ Asma qamaá Heshboni naa /ootsiyé', tam sabiíbuú Sibma sleeme, kudá' bariisér xoordu gaa ooniitamaamis, halemiiwós niri hardihiyé' ay Yaseri, niri harweriné' ay baraá xaanxaay. Harma/oorós iri hardát tlawto gayuuqá'.

⁹ Gawaá adoorihe, aníng a /aa/amiím dinkwa nee Yaseri as sabiíbuú Sibma, aga hhuuntsuumiít /aa/eewo as kuungá' kuungásingá gixsadaá Heshboni nee Eleale, ururu'umisuduú qoomár fiiqit aa faák.

¹⁰ Asma qwala/ nee bar/uwo naa faakiyé', baraá yaamuudá' wahhaara'a. Baraá qamaá sabiíbuwo daa'aangw i sangw kaahh, tam afór ti'imiit i káhh sleeme, sabiíbuú ta tsoo/iti i sangw kaahh, bar/uú heé sabiíbuú kal/aám ugwa hingeés.

¹¹ Gawaá adoorihe, muunaáeé' i /aa/amín as Moabu adór tarumbeéta, nee hhiintlueé' i /aa/amín as gixsár Kiriheseri.

¹² Qoomár múk Moabu birna munguii'ín sluufmisuú ayé', qoomár birti kilooín daawitamiisiyá' dir'ín tidár gáwtá wa alé, nee birni amór doó munguii'ín kayá' inooín ki geemayká.

¹³ Kaangwí an axweesantá AAKOÓ MUNGÚ aa oó' aáng daanduú múk Moabuwo.

¹⁴ Ala daxta AAKOÓ MUNGÚ i kaahi, «Kureeraá tám faaraak adór heé ta bu'un ir deelór fadiiti, xoongír múk Moabu ka qoongo'oos, tam mukós ku ló'wa yaariire, ala múk meét ku niiná, nee ku liitlakwén.»