ISAYA 15 - Biblía Axweesantá Hhohho' ar Mungú 2004

Mungú xoorór Moabu ga hhaamiis

¹ Kaangwí a iigu'utuú daanduú Moabu. Asma gixsár Ari tidár baraá yaamaá Moabu kana xweeraá gaás, nee gixsár Kiri tidár baraá yaamaá Moabu kana xweeraá gaás.

² Múk gixsár Giboni ta gáwtí tsa/aa/án, amór wa/aamér tawa sluufmaamisi as tawa tsuunqumisuú ay. Múk Moabu ta tsuunqumiis as múk Nebu nee Medeba. Sleémeero sager'ín ngaa deeqwiyé', daamoó kaa deequút sleémeero.

³ Múk baraá loohiro waraáhh guniyadu gaa tsiít. Gawaá daandeemaá maraywo, nee baraá afeenaaro, umuú heewo in tsuunqumiis nee iri hirqamiit hhirhheeriwo.

⁴ Múk Heshboni nee oo Eleale i /aa/amín, afór /aa/eeín kari axaás gixsár Yahasír wa alé, tam slaqwaruusér Moabu in tseeamiín /aa/eewo, gur'er'ín i kitlkítl daeero.

⁵ Aníng a /aa/amiím as yaamaá Moabu, mukós aa tiaaín ay Soari, aa tiaaín ay Eglat-shelishiya, mukós i tsa/aa/án amór Luhiti, ta hara /aa/amín, amór loohír Horonaimúr kawa, mukós i /aa/aamín as qwanaay.

⁶ Ma'aá yaaér Nimrimu naa /oné', gitso aa kát, tam naafí aa kát sleeme, tam harma/tá ti'imiit i káhh sleeme.

⁷ Gawaá adoorihe, muu yaaér Mierebiro i waraahh, daqaari'iimadá' sleémeero naa slayé' ngaa ar tlayé', nee umuú gár amohhe'eesaro naa aslay'i.

⁸ Asma yaamaá Moabu naa gwaaiyé' /aa/eewo, tsuunqusmoóín aa hardáh ay Eglaimu, iri hardáh sleeme ay Be'er-elimu.

⁹ Asma tseere baraá ma'aá Diboni gaa dalá/, tam adoorihe Mungú slahh'amuú múk Diboni gu dook. Panaydá' aa meet baraá yaamaá Moaburo, kudá' naa kotsoqomiitiye', diraangw gin ohín.