ISAYA 13 - Biblía Axweesantá Hhohho' ar Mungú 2004

Mungú Babuloni ga muux

¹ Kaangwí a iigu'utuú aarusmo Isaya, garmoó Amos aa ár daanduú Babuloniro.

² «Layarhúng tidár bendeéra laqaamaak, gawaá tloomár kwaankwarír wá ale, slaqwaruuse ateetaak ar afór ur, Ateetaak ar daba' as kahhó' niwa dahiiya' baraá gixsár múk urén!

³ Aníng muk'eé' kudá' naa tsawaár ugwa ádbáw nee muk'eé' kuduú miguuse ugwa ateét, kudá' aníng i xirfayeesá' nee baraa/á', as kahhó' buhhtaaeé' ngiwa boo/eesiya'.

⁴ Tseeór gawaá tlooma iiárií qaasaak, a adór afór boo/oó yaariír oo muu. Tseeór waawuti'iima iiárií qaasaak, nee ar xoordaá naa dinkwaárí buruumburiitiye', AAKOÓ MUNGÚ Aleesleemusmo i slaqwaruuseerós tsee/aarín as iwa slaqwarár eer.

⁵ Amór ni dahhiya' ka ló'wa saaw, iimír ku/uyaá doori ngin dahhiyá', AAKOÓ MUNGÚ ni hardah nee xooslaá xarasleemaawós, as yaamu sleémeero ngiwa qwaareesi.

⁶ /Aa/amiimé' asma deelór AAKOÓ MUNGÚ naa tseewuúr. Baalár qwanaay ni hardát amór Aleesleemusmoó wá ale.

⁷ Gawaá adoorihe dabaá muu nari tsatiitiyá', nee gur'ér muu ma'aay ngay dalaa/iyá'.

⁸ Inooín niri amoqwaariyá', niri dae feehhamiitiyá' nari /araaraná', slahh'amuú yaariír gi sláy adór kuquú /ameenír asltá xwayla gaa al'ot. Umuú heewo iri puungahhamkár qaytsiit amór kuqá', gitsee/er'ín iri sloo/amít kwaáo asla gina tsaara'ás.

⁹ Ga/aawaak, deelór AAKOÓ MUNGÚ i hi'ít, a deelór hhamhhám, ar xaraasl nee buhhtaá xaraaslá', as yaamu ngiwa hhitin nee mukdá' tlakweemaá tlehhahhiít nguwa qwaareesi.

¹⁰ Asma tsatse/uú gawaá doori nee tsatse/uudá' ninakwe gwa/aateema gi máy, tsee/amá bir tsiirariihh in didií giiw, slahhaangw gwa/aateema gi máy.

¹¹ AAKOÓ MUNGÚ i kaahi, «Aníng yaamu i muúx asma muruudá' tlákw i tlehhaahhitiya', nee múk tlákw un muúx asma tlakweemaaín. Aníng daara/ángw daara/uuse un faák, nee sagabi/uuín nguri yaamií hhaáf, sleeme a baabaqasaaká.

¹² «Aníng muu un ló'wa niinaweés tam sahaábudá' hhohhó' ba/a, daa'awtá hee ngari niinaweés ta sahaábuú Ofiriro.

¹³ Aníng doori ngiri diingiís, nee iihhafiiriír yaamu iri daaraxát, asma anuú AAKOÓ MUNGÚ aleesleemusmo niwa buúhh, baalaadár buhhtaeé' kudá' xaraasla'a.

¹⁴ «Adoodár saragtá ta slakaati i diri', nee adoodár bee/ángw de'eemusmoó koomaaká i dirii'i, umuú heewo sleeme in haragwaa' amór mukós, nee umuú heewo sleeme in ta'aaín amór yaamuuwós.

¹⁵ Umuú heewo oo taa harasliqiít aqo kun muut, nee umuúqo heé taa oohi aqo kun gaas ar paánga.

¹⁶ Na/ii'ín awa qaweero kin xooro qwaarees dír ilaaín wa alé, maray'ín kin hayoh, nee tlaaway'ín kuri uhín ar /uuru.

¹⁷ Ga/aaweek, aníng xoorór Medi ngi amor'íní tleés, múk peésa ga gaárí xuaaká, tam ku qwal/atmisiiká nee sahaábu.

¹⁸ Masoombár daaqaay kan tsuu/ ar ga/alduín, inooín i baloó gurtleemuú kon'aaká daanduú xwaylár heewo, tam na/aá ninakw ngi baloó gurtlatlay'aaká.

¹⁹ Nee waawuti'iimár Babuloni tidár xirfuú waawuti'iima. Waawiti'iimadá' daara/ango iia tleer ar xoorór Kaldayo, Bál Mungú birnga qwaareés, tari adór Sodoma nee Gomora.

²⁰ Múk baraadí hotaá áw kureeriwo i kaahh, tam baraá qari sleémeero heé baraadá' wa hoót i kaahh. Ma/arabumoó heémaarós ga baraadií siíhh i kaahh, tam de'eemuusér bee/angw'ín gu baraadií deeliis i káhh.

²¹ Ala makaá sla/a nin baraadá' wa guiyá', hárkoonka maray'ín giri dalá/. Sakwel iri baraá maray'íní waatl, manu iri baraá sluhhay'ín wa ni/iná'.

²² Bahu niri gawaá daandemaá maray'ín wa buuheeliná', intsaawe iri dát baraá maraá waawitá, deelór Babuloni aa fák, slám deeloorós ka doogiiká.»