ISAYA 10 - Biblía Axweesantá Hhohho' ar Mungú 2004

¹ A tsaxwaaín kudá' hara'ayár gana'aaká ngi qamiimá', nee goouuseedá' hara'ayár slahh'eemiis ga gooi'iim.

² Gan'amuú múk aleemaá koóm kun /itiitín, nee muruú narkuute kun fisiisín kuduú gan'amuuín, kwaeeli a adór maraando dir'ine, panaay a sluqor'ín.

³ Hám adór ta laqa' deelór muxtaaro, deelór bambaaór ur burna amór saáwá i hardát? Heé ti ta'aiinda' a heemá oo nu /iís? Dír daqaari'iimarhúng ki qasa' a diimá?

⁴ Gár ti meta' aqo an kulala'amitá' tla/ángw múk taa tseegi, laqaá an pahhá' baraá tla/ángw múk ta baraá slaqwarár wa tsu/i. Tam adoorihe, AAKOÓ MUNGÚ muneerós gaa gu/iiká, tam hamí dakós i loloqoosárí kaahh.

Waawutmoó Ashuru i hardah

⁵ AAKOÓ MUNGÚ i kaahi, «Ashuru a adór guhhláy'eé' oo mukdá' naa i buúhh ngur muux.

⁶ Una ya/aáw xoorór tlaakw ngiwa muxi, una ádbáw mukdá' naa i buúhh nguwa muxi nee ngiwa haasaáng wa ar tlay, ngiwa yaamií kalaa/i adór hhapér baraá loohi.»

⁷ Ala adoorí a adór aa kilós slaiiká, nee sleeme a adór muunaáwose i aldakutiiká, as baraá muunaáwose gár aa káh a hhita nee xooro amór saáwí diyaa/a, ala sleeme a xoorór niinaweeká.

⁸ Asma i kaahi, «Geeraharuusér uren sleémeero a waawitahekáhe?

⁹ Xaysé', Kalno adór ngi laaq a adór Karkemishirokáhe? Hamati a adór Arpadirokáhe? Samaria a adór Damaskorokáhe?

¹⁰ Adoodá' dakw'eé' waawuti'iimár munguaá murslaaqat ngira i hardáh, munguaá murslaaqat kudá' uren ta kudaá Yerusalemu nee Samariaro,

¹¹ xaysé', adoodá' naa tleéhh dír Samaria nee munguiiwós awa murslaaq a aleeslawaakáhe ngiwa tleehh dír Yerusalemu nee murslaaqatuuwose?»

¹² Qoomár Aako bar gadiyeérós sleémeero ngaa boo/eés gawaá daanduú tloomár Siyoniro nee Yerusalemuro, inós saga gawduú waawutmoó Ashuru nee daara/aangose gi sakwasleemuut, nee adoodá' tiwa kilós xirfayeemisi.

¹³ Asma waawutmo i kaahi, «Tí ana tleéhh ar /uuruú dabaaeé', nee ar sagalooar'eé', asma aníng tsaahha a koóm. Digeemaá muu iga hingeés, nee slaasláwar'ín ngiri ar tláw, nee kudá' gawaá kiteeraá waawuti'iimár wa iwiiwitá', ina diíf adór awu, ngiri /aytamiís.

¹⁴ Dakw'eene daqaari'iimár xoordu ana sláw adoodá' hee doó tsir/i ngur slaaslay, nee adór muu qanhhár taa geexáy ngir haraki/imaamisi, an adoodá' án ngira haraki/ís baraá yaamu sleémeero, tam heé aa /akuut i kaahh, tam oo afa gwa gweer, laqaá oo aa tsee'.»

¹⁵ Xaysé', tsawo ti kilós xirfayésa dír heedaádá' ga ar gadiyuusa? Xáy, masmeno ti kilós xirfayésa dír kudaádá' ga ar tlaaqa? Geera bar adoorí, hhara mukdá' gar qadimiís gwaa lilikís, laqaá hhara hee gu gáwtí tleská, kuduú xa'anoowooká.

¹⁶ Gawaá adoorihe Aako, AAKOÓ MUNGÚ Aleesleemusmo, slaqwarusmoowo gu kaanga/úy, kitángw xirfuuwose kun daa/ adór kwaáo kuna daá' ar asla.

¹⁷ gwa/aateemaá Israeli nin asla tleehhitiyá', nee Kudá' Hhoohhoó' oo Israeli a tsángw asla. Tsángw asla fuquráy nee laqayaawose gin da/aa/án giri qororo'oos, baraá deelór wák i ale.

¹⁸ Gartós tidá' xiríf nee qamaá mamaá yaariir AAKOÓ MUNGÚ gin hhaamiis, iimír baráy wa oohang ay gawa, slaqás adór heé tiqti aa alhhe'és gaasaro.

¹⁹ Xaa'aá baraá gartose meetá' ki ló'wa ureeká, tam na/aay faarooro gin aleesláy.

Múk niiná ni wayaa'

²⁰ Slám malé alé baraá deeloodae penoó aa meet oo múk Israeli, mukdá' niiná naa /uy oo doó Yakobo, inósuudá' gaa muux ngu harahhifiaaka, ala aqo AAKOÓ MUNGÚ, Kudá' Hhoohhoó' oo Israeli, ngun harahhifiyá' ar looeema.

²¹ Panoó Yakobo kudá' aa meet i kii/ amór Munguú /uuruú koóm.

²² Asma mukók oo Israeli tam ku yaariire adór hhasángw afaá tlawi, aqo har panoó niiná kilós nin kii/, hhaamisa kaa geerií oó', nee gan'amu aa tleehharuút.

²³ Asma Aako MUNGÚ Aleesleemusmo in adoorí kah, hhaamiisár taa geerií káh ga boo/ees baraá yaamu sleémeero.

Mungú múk Ashuru gu muux

²⁴ Gawaá adoorihe, Aako MUNGÚ Aleesleemusmo i kaahi, «Xaysé', muk'eé' kuungá' awa Siyonír hootá', ma da'ayumitaara' qoomár burnu muxiyá' ar hhara nee ar qawaay, tam ugwa daanda tsi/isi ar adoodá' múk Misri aa tlehhiít.

²⁵ Asma alaá deelór niinawe buhhta i faakiyá', nee buhhtaaeé' i warqayá' amór múk Ashuru ngiri qwaareés.

²⁶ AAKOÓ MUNGÚ Aleesleemusmo qawaywós gun gáwtí tleés, adoodá' múk Midiani ngura muúx dír tlaa/ár Orebu wa ale, hhartós gan looloqoos gawaá daanduú tlawi. Inós ga gáwtí tlees ar adoodá' aa tleéhh dír múk Misri.

²⁷ Slám male ale baraá deeloodae huwaawós gi hingees gawaá suumaroge, nee taaqwaniirós gawaá istoge gan giqáy.»

Wakusmo naa tseewúy

²⁸ Wakusmo naa Rimoni wa tláy, aa hardáh Ayati, aa waaraáhh ar baraá tla/ángw Migroni, huwaawós gaa qaás baraá Mikmashi.

²⁹ Duxa kwaa waaraáhh, xweeraawo nay qatuú ayé' Geba, múk Rama aa daaraxaát, yaamuloouusér Gibeár Saulo tari goów.

³⁰ Múk Galimu, /aa/eewo tsee'é'! Múk Laisha, iia qaasaak! Múk Anatoti, mu/aywatsaak!

³¹ Múk Madmena ta baraá guwaay, yaamuloouusér Gebimu taa /akumiít as dír saxamaar ngiwa slaya'.

³² Laarír kilá' inós in sihhiit baraá yaamaá Nobu, inós kuundi'iiwós giri maamakuus amór tloomár múk Siyoni, nee amór gongoamoó Yerusalemu.

³³ Ga/aaweek, AAKOÓ MUNGÚ Aleesleemusmo, haleemi gin tsaat ar /uuruú dae tlaáq, kudá' gáwtí tlet gin tlaaq, kudá' naa tlenaanuye' kin yaamií daahh.

³⁴ Inós xwaansloó gara gu tlaaq ar tsawo, nee Lebanoni aa hú' ar /uuruú dákw kudá' Aleesleemuú koóm.