ISAYA 1 - Biblía Axweesantá Hhohho' ar Mungú 2004

¹ Kaangwí an iigu'utuú Isaya garmoó Amos aa ár, daanduú Yuda nee gixsár Yerusalemuro, de'emaá waawituú Yuda oo aa waawuti'ii'ín tawa kwí: Usia, nee Yotam, nee Ahasi, nee Hesekia.

Mungú i mukós iigahhamiit

² Iia qaasaak kuungaá doóri, iia qaasaak kuungaá yaámu, asma AAKOÓ MUNGÚ aa axweés, iwa kaahi, «Na/ii ina /aymiís nee ina umiím, ala iga aldee/anuutiyé'.»

³ Awu aakoowós gu xuu', nee daqwaay islángw aakoó dooín gu xuu'. Ala múk Israeli gu xuiiká, muk'eé' gár i tsatsahhan i káhh.»

⁴ Tsaxwaahúng kuugaásíng xoorór iringuuse. Kuungá' a múk taa al'ilooúy nee tlakweema, xwaylár tlakweemaá tlehhaahhiit, na/aá al/aymárár hotaatimá'. Kuungá' AAKOÓ MUNGÚ ugwa geexeeré', kudá' Hhoohhoó' oo Israeli ugwa waaqaé', taa falo kwahhé', tari alií ki/é'.

⁵ Kuungá' a sla'á'a tunduwa muxi tam hamí? Baré a kumitá' baraá dee/aanuuwo. Saga in adáwa tiiq, muunaáwók i slahhaa'

⁶ Iimír tsa/oó yaaér wa oohang ay gawaá saga, slafiingw i kaahh baraadae, ala aqo har inkahhi'iidá' tseeru'umiitá', kudá' taa tseegiiká, laqaá kaa malhhasiiká, laqaá kaa dí/tár slikiiká.

⁷ yaamuuhúng kaa deewa'ameérí geexáy, gixsaduuhúng kaa daá/ ar asla. Yaamuuhúng hooma gaa dír ilaahúng wa ar tleér, i baraá deewaa'ame, kwaáo hooma gina hhitiín.

⁸ Gixsár Siyoni kaa kilós geexáy, adór islángw baraá qaymór sabiíbu, adór hháw qaymór taangí, nee adór gixsár taa harweér nee slaqwaruuse.

⁹ Barnaxes AAKOÓ MUNGÚ Aleesleemusmo, atén taa panáy meetisiiká, atén aga adór Sodoma tleehhitaán, a slaqamís nee Gomora.

¹⁰ Axweesantá AAKOÓ MUNGÚ iiárií qaasaak, kuungaá adór geeraharuusér Sodoma, intsaahhasár Munguúrén iiárií qaasaak, kuungaásingá' múk tlákw adór kuduú Gomora.

¹¹ AAKOÓ MUNGÚ i kaahi, «Ilahhooár yaariir ar muruú ta tsu/i garós a milá? Aníng aga hhe'eés ilahhooár da/a/aangw ar gwaandaawe, nee di/tá makaá na wahhaaditi'i, Aníng tseerér awe, laqaá ar deeloó bee/aangw, laqaá ar gurtaawe i sla'atamiská.

¹² Qoomár bar kuungá' i sluufmisuú eerá' Heé kuungá' naa ádbay muruusíng nguwa huba'? Amorqá' saaw i sihhiitaak dír dooeene.

¹³ Ilahhooár harimaaká mingi huwahuwaara', mooyangwdá' tsuú' aníng ugwa aáhh, nee deelór ur ar slahhaangw niwa ti'iiti, nee deelór Sabaátooro nee burumburimituú saaliingo. Aníng dinku'uumadár saaliingw ar aleedoogír nee tlakweema a sla'aaká.

¹⁴ Deelorhúng tidá' uren ar slahhángw /abén nee tidá' taa hara'ayini aníng aga aáhh, muruuwí a adór huwár iiloo' dir'eene, aníng alqitluuwo ugwa harslaaqaát.

¹⁵ Kuungá' bar dabaahúng iga gáwtí tlesé' as iwa fiririinda', aníng ilaaeé' in luú/, as munduwa ár, tam firór yaariir bar firirindá', a axaasaaká. Asma dabaahúng naa hatsiyé' tseerduuwo.

¹⁶ Ti hamtle', ti hheehhe'esé', tlehhmi'iihúng kudá' tlakw hingeesaak dír geeraaeene. Tlakweema tlehhtuuwo mawaak.

¹⁷ Tlehhma'aá hho' tlehhtuuwo na intsatsaahhaak, sakwasleemár ganaa' tlehhitaak. Awa ta baramaanuusi alee/imisaak, panaay aleeslaqwaak. Kwaalo'o aleekala/aak.»

¹⁸ AAKO i kaahi, «Qwalaasé' hamí aníng nee kuungá' a axweesaán, tlakweemaahúng tim da/atatuyá' adór inqwaarír daa/aát wá ale, nin /awkukuyá' adór tlaa/aá tluwaay, tim da/atatuyá' adór tseere, nin /awkukuyá' adór se'éngw bee/ángw /awák.

¹⁹ Bar aga ya/aandé' nee tay iialooeesé', daqaní hhooeemaá yaamu i /agá'.

²⁰ Bar aga sié', tay dee/aanuté', tundu qwaarees ar paánga, asma AAKOÓ MUNGÚ tí gana oó'.»

Gixsár tlakweemaawo aa hats

²¹ Gixsarí inkihhimuú koom, adór ira tsaatuso'o tleehhít! Inósadá' sakwasleemár ganaa'a haats, inósadá' hotaá ganaa'á' gira hot, ala hamí aa tsu/utuso'o tleehhít.

²² Peésaarók aa xwaansláy tleehhít, nee difaáirók kaa aleedoók ar ma'aay.

²³ Geeraharuuseerók a dee/aanuuse nee mulqér fisuuse. Umuúqo heewo gár i slai a slukma. Nee qeemu gun alti'ii'ín. Panaay ku aleeslaqwiiká, nee kwasleemár kwaalo'o ka dir'ín i huwahuwiiká.

²⁴ Gawaá adoorihe, Aako i kaahi, AAKOÓ MUNGÚ Aleesleemusmo, kudá' wák /Uuruú koóm oo Israeli, «Aníng wakuuser'eé' an i xaraásl, nee wakuuser'eé' ngay li/áy buú'!

²⁵ Aníng dakw'eé' un gawaahúng i tleés, Aníng /o/oduuwók in hheehhe'eés, nee slasla/aruuwók sleémeero u hingeés.

²⁶ Aníng har'ohuuseerók a /abeemáy ki/ís, adoodár bál qaro, nee hara'ayuuseerók a /abeemáy ki/ís, adoodár bál geera. Aluuwo kiíng tiri bay, ‹Gixsár hota ganaa', gixsár inkihhím.› »

²⁷ Siyoni ka gweer ar sakwasleemár ganaa', nee mukós kudá' aa hhu'uu'un kun gweer ar hotaá ganaa'á'.

²⁸ Ala dee/aanuuse, nee tlakuuseero kin dinkwaárí hhaamiis, nee kudá' AAKOÓ MUNGÚ gixaawá' ki qwaarees.

²⁹ Asma kuungá' tundu mureekees kuwa sluumisá', as ti'ituudá' taa ilaatleerusé' kuwa sluufmisa', tunduri amoqwaarees as asalmoodá' taa tsawdé' kuwa sluufmisa'.

³⁰ Kuungá' a adór ti'ituú loo/oorós kaahaakah, nee a adór asalmoó ma'aá koomaaká.

³¹ Múk /uuremaá koóm iri adór kataánír kaaharen tleehhiit, nee tlehhmi'ii'ín tari adór tsitór asla. Inooín nee tlehhmi'ii'ine asla gin dinkwaárí fák, heé gaasaro ga aleesláw i kaahh.