IIMU/UUNGW 9 - Biblía Axweesantá Hhohho' ar Mungú 2004

Alqadór Mungú nee Noa

¹ Aakoó Mungú Noa guri tsuúq, nee daaqaywose, giri báy, «Laqwaalé', doogaagimé', yaamu hatsiisaak.

² Umuúqo makiito'ór baraá yaamu, umuúqo tsir/ór tlatlaawa gáwtí alé, dinkwa nee umuúqo gár gurúr hi'iimita, nee siyó sleémeero oo baraá tlawi kuungá' nun da'ayumiitiyá'. Muruuwí sleémeero kunga qaás gawaá dabaahúng i alé.

³ Muruuwí slaáf sleémeero daxta a muruú /aymarhúng. Nguna haniís adoodá' umuúqo gár naa ti'it baraá yaamuwo ngira haniís as tawa muruú /aymarhúng.

⁴ Ala fu'unaá tseerer'ín aa ti'itká mi /ayaara', asma slafiingw dír i dirii'i a baraá tseere.

⁵ Aníng tseererhúng a li/aay buú'. Hee bar hee ngwa gaás, aníng heedá' u gaás sleeme. Laqaá tam makiito'o hee burngwa gás, aníng inós a gaás sleeme.

⁶ Heé tseerér hee gaa ku'uus, tseereerós sleeme kan ku'uus nee hee, asma Mungú hee guna tleéhh ar slaqsaywós.»

⁷ «Kuungá' laqwaalé', doogaagimé', laqwaalé' ló'wa ale, yaamu ki hatsiisá'.»

⁸ Mungú Noa nee daaqaywós gina báy,

⁹ «Ga/aawaak, aníng hamí alqador'eé' ngi kuungáí haniís, nee xwaylarhúng.

¹⁰ Slám nee umuúqo gár slafa, tsir/o nee makaá ta de'ena nee makaá sla/ato, kudá' sleémeero nee kuungá' naa alti'ite' baraá miringamoó wa alé.

¹¹ Aníng alqador'eé' an gawdeés dirhunge, ar aníng muruú slaáf sleémeero nguwa baloó qwaareesaaká ar tluwoó da/tén, tam tluwoó da/tén oo adór kwí i baloó ki/iiká yaamu ngiwa hhitin.»

¹² Nee Mungú iri oó', «Gaarí an layár alqador'eé' ar aníng ni haniis dír kuungá' nee umuúqo gár slafa ar nee kuungá' alhootá' qari sleémeero ay kureeraá kureér.

¹³ Aníng ga/aleerí an qaás gawaá huunkáy alé, daqaní a layár alqador'eé' tidá' naa tleéhh nee yaamu nee umuúqo gár baraá yaamií diriia.

¹⁴ Qoomár aníng yaamu bira tuuntuúk ar huunkáy, nee ga/aleerí bira geehhouúr gawaá huunkayhe,

¹⁵ aníng alqador'eé' an insláw, tidá' naa haniís dír kuungá' nee umuúqo gár slafa. Ala tluwoó da/tén i baloó tluwiiká as umuúqo gár slaaf ngiwa hhitin.

¹⁶ Qoomár ga/aleerí gawaá huunkáy i dirii', bara ár, aníng alqador'eé' tidá' alhhe'eesay wasl an insláw, tidá' naa tleéhh nee muruú slaáf sleémeero oo baraá yaamií dirií'.»

¹⁷ Mungú Noa guri báy, «Gaarí an layár alqador'eé' ar naa tleéhh nee muruú slaáf sleémeero kudá' baraá yaamií dirií'.»

Noa nee daaqaywós

¹⁸ Daaqoó Noa oo naa baraá miringamoó wa ti'iit, a Shemu nee Hamu nee Yafeti. Hamu an baabuú Kana'ani.

¹⁹ Daaqaywí tamaawo an daaqoó Noa. Xwaylar'ín iri kumít, yaamu niri hatsiyé' muko.

²⁰ Noa ina doósl. Inós a heé geera oo xaa'aá sabiíbu gaa dahaas.

²¹ Difaáír sabiíbudá' ngiwa wahán, ina ooniít, tlaba' giri kwaáhh, iri qaát ar /aankwets baraá heémarose.

²² Hamu, baabuú Kana'ani, /aankwetsuú baabuúwós guna ár, iri ti'iít, kaangw guri oó' dír hhaeewós kudá' tsár.

²³ Ala Shemu nee Yafeti inqwaari ngiri tataahhiyé', ngiri qaasiyé' gawaá sum'ii'ín, inooín tsaraawo tari alúr hi'iít, /aankwetsuú baabuúín nguri uuntsuusiyé', slám gitsee/er'ín kana bihhér xu'ús, tam /aankwetsuú baabuúín ngwa ari'iiká.

²⁴ Noa oonitimeerós iwa fák, nee kangwdá' garmaawós kudá' niiná aa dirósí tleéhh nguwa xuú',

²⁵ iri oó', «Kana'ani ku lu'usi, inós a lawaalmoó kilá' oo hhaeewós.»

²⁶ Iri malé oó', «AAKOÓ Mungú, Mungú Shemu i xirfuuti, nee Kana'ani ta lawaalmoowós.

²⁷ Mungú Yafeti ngu ureesi, nee i baraá heémár Shemu wa hooti, nee Kana'ani ta lawaalmoowós.»

²⁸ Alaá tluuwaydá' da/tene Noa kureeri ngaa hoót a tsiire tám nee mibeeri kooán.

²⁹ Deelo sleémeero ar Noa aa hoót a kureeri tsiire gwaleél nee mibeeri kooán, iri gwaá'.