IIMU/UUNGW 8 - Biblía Axweesantá Hhohho' ar Mungú 2004

Alhhe'eesoó tluwoó da/tén

¹ Ala Mungú Noa guri insláy nee makaydá' baraá miringamoó i diriiá'. Mungú fur'ár ur gari ya/aáw gawaá daanduú yaamu, ma'aay nay /aaruyé'.

² Kutlaay sleémeero oo iloodá' uren kuri tseék, nee foxaá gawaá doori kiri tseék, tluwaay iri tsatiít.

³ Ma'aay nay /aaraaruyé' gawaá yaamuwo. Alaá deelór tsiiru nee mibeeraá kooane, ma'aay nay /aaruwa hhe'eesiyé'.

⁴ Bál slahhángw faanqw tawa mibaá nee faanqw miringamo ina iwiít gawaá tlom'aá Ararati.

⁵ Ma'aay nay /araaruyé' ay slahhángw mibaangw. Bál slahhángw mibaangw tawa wak, sagér tlom'i niri geehhouúr.

⁶ Alaá deelo mibeeraá tsiyáhh iwa waaráhh, Noa fooxadá' aa tleéhh gawaá miringamií alé, gana kiís.

⁷ Xwaa'ari gari ya/aáw, ala xwaa'ari ina harweeraariín ay ma'aay ngar wa faakiyé' gawaá daanduú yaamuwo.

⁸ Hhooki sleeme gari ya/aáw as ngiwa tsaahhi, xáy, ma'aay naa faakií'i daanduú yaamuwo.

⁹ Ala hhookidá' dír ya'aawós ngi qas ngiwa aandiiká, ina kí/ amór Noa baraá miringamo. Asma ma'aay i hatsiyá' gawaá daanduú yaamu sleémeerowo. Noa hhooki gari taataáhh, gari óh, gari amoorós i dahaás baraá miringamií alé.

¹⁰ Noa iri malé dán deelo faanqw, aluuwo hhookidá' gari malé ya/aáw ki/imaá tsare.

¹¹ Hhookidá' nay kí/ tsiindoowo, i loo/ír naá/ koón afkose, ar xa'anoó ta bay seituúni. Naagáy Noa gari tsaáhh adór ma'aay nira faakiyé' gawaá yaamuwo.

¹² Noa iri malé dán deelo faanqw, hhooki gari malé ya/aáw, ala naa baloó amoorósí ki/ká.

¹³ Qoomár Noa kureeriiwós tawa tsiire lahhoó' nee wak, slahhángw geera tawa wak, qoomaadae ma'aay naa /oné' gawaá daanduú yaamuwo. Noa tuuntukmár miringamo gari hingeés, nee iri qaytsiít, naxés, yaamu naa kahiyé'.

¹⁴ Nee slahhángw tsár tawa mibeeri tsár nee faanqw, yaamu naa kahmu hhe'eesiyé'.

¹⁵ Mungú Noa guri báy,

¹⁶ «Ti'iít baraá miringamoowo, kuúng nee aamaarók nee daaqaywók nee tlaawoó daaqaywoge.

¹⁷ Umuúqo gár slafa, tsir/o nee makaay, nee muruú gur'eérár hi'iimita ar ti'iiteek, as iwa kumiitiya' xwaylaro, iwa doogina', nee iwa hatsiya' baraá yaamuwo.»

¹⁸ Noa iri ti'iít, inós nee daaqaywós nee aamaarós nee tlaawoó daaqaywose.

¹⁹ Umuúqo makiito'ooro nee umuúqo gár gurúr hi'iimita, nee umuúqo tsir/ooro nina ti'iitiyé' baraá miringamoowo, umuúqo gaaro nee daa'awtós.

Ilahhooár Noa

²⁰ Noa kitángw ilahhooa guri tleéhh as AAKOÓ MUNGÚ, makiito'ór wák gari taataáhh baraá umuúqo daa'aweemaá makaá hhohhoe, nee tsir/ír wák gari taataáhh baraá umuúqo daa'aweemaá tsir/ór hhohhoe, gari didá' wa daá/ ilahhooár wá ale.

²¹ AAKOÓ MUNGÚ slaahhareraá tsuuá' giri sláy awa ngwa sla'atisiye'. AAKOÓ MUNGÚ iri baraá muunaáwós i oó', «Yaamu i baloó lu'usaaká alaá adoorihe asma muu, asma inslawoó hee ku tlákw iimír iimu/uungose. Aníng muruú slaáf sleémeero u malé qwaareesaaká baloó alé, ar adoodá' ngira tleéhh.

²² Qooma sleémeero ar yaamu iwa kumiitiya', qoomár dahaasiingw nee bu'uungw, qoomár tsaaqwa nee tsee/amá, qoomár age nee buhaare, tam tlaatla/aangw nee xweera i baloó lakiitiaaká.»