IIMU/UUNGW 7 - Biblía Axweesantá Hhohho' ar Mungú 2004

Tluwoó da/tén

¹ AAKOÓ MUNGÚ Noa guri báy, «Dáh baraá miringamií alé, kuúng nee múk do'oge, asma aga ár adór kuúng kilók tar gan'amuú koon dír geeraaeene baraá qartihe.

² Baraá makaydá' hhohhoe tsár tsár tiwa ohiin, ar yaqaamba nee ar /ameeni, ay sagaáwa faanqw. Ala makaydá' hhohhoeeká tsár tsár tiwa ohiin ar yaqaamba nee ar /ameeni.

³ Slám baraá tsir/ór gáwtí tlatlaawa, tsár tsár tiwa ohiin, ar yaqaamba nee /ameeni, ay sagaáwa faanqw, as xwaylár muruusíng slaáf miwa qwát baraá yaamuwo.

⁴ Asma alaá deelo faanqwe aníng tluwaay ngu huúw baraá yaamií alé. Tluwaay iri tluuw ay deelo mibeeri tsiyáhh tlaatla/aangw nee xweeraawo. Nee umuúqo gár slafa, tidá' naa tleehhi, an fiíts baraá yaamuwo.»

⁵ Noa tidá' sleémeero AAKOÓ MUNGÚ aa oó' gari tleéhh.

⁶ Qoomár tluwaay iwa tluúw baraá yaamií alé, Noa a heé kureeri tsiire lahhoó'.

⁷ Noa iri dáh baraá miringamo, nee daaqaywós nee aamaarós, nee tlaawoó daaqaywose, as tawa /uy ma'aá tluuwaydá' hardaha.

⁸ Nee makaydá' hhohho' nee kudá' hhohhoekahe nee tsir/ooro, nee muruú gur'eérár hi'iimita baraá yaamuwo,

⁹ nina dahiyé' baraá miringamií alé, kudá' Noa i dirii'i. Nina tsár tsár wa darahiyé', yaqaamba nee /ameeni, ar adoodá' Mungú Noa ngura hara'ayín.

¹⁰ Alaá deeloodá' faanqwe tluwaay iri tluúw gawaá daanduú yaamií alé.

¹¹ Kurkú tsiire lahhoó' baraá slafíngw Noawo, slahhángw tsár tawa mibaá nee faanqw, baldá' kutlaay sleémeero oo iloodá' uren nina gweeritiyé', nee foxa'aá doori nina gweeritiyé'.

¹² tluwaay iri tlubaabín gawaá daanduú yaamií alé deelo mibeeri tsiyáhh, tlaatla/aangw nee xweeraawo.

¹³ Baalaadár kilae Noa ina dáh baraá miringamo, inós nee Shemu nee Hamu nee Yafeti, daaqoó Noa, nee aamaarós, nee tlaawaydá' tám oo daaqaywós.

¹⁴ Tana aldáh nee umuúqo makiito'ór sla/a ar adoorós, nee umuúqo makiito'ór ta de'ena ar adoorós, nee umuúqo gár gurúr hi'iimit baraakaá yaamuwo ar adoorós, nee umuúqo daa'aweemaá tsir/ooro.

¹⁵ Nina aldahiyé' nee Noa baraá miringamoodá', tsár tsár wa alé, umuúqo gár hiinsluú slafíngw koom baraawose.

¹⁶ Nee awa naa dahiye', nina dahiyé' ar hhawaata nee ar /ameeni, awa umuúqo gár slaqwtá kooma, ar adoodá' Mungú Noa ngura hara'ayín. AAKOÓ MUNGÚ afkú miringamo guri aluuwós wa tseék.

¹⁷ Tluuwaydá' úr ina kumaamiít ay deelo mibeeri tsiyáhh gawaá daanduú yaamuwo, miringamo iri gáwtí kumiít daanduú ma'aywo, iri daanduudá' wa malelee/amiít.

¹⁸ Ma'aay /uuru ngway slayé' nay /uurúr dooginé' gawaá daanduú yaamuwo, nee miringamoodá' iri malelee/iít gawaá daanduú ma'aay.

¹⁹ Ma'aay nay ló'wa dooginé' ar /uuru gawaá daanduú yaamuwo, tlom'aá tlet sleémeero baraá yaamuwo kina tuuntuúk.

²⁰ Ma'aay nay /uurúr dooginé' tam tlom'aá tlet kay tuuntuúk, niri harwarahhiyé' miíta faanqw nee tlaqi gawto.

²¹ Umuúqo gár slaqwtá kooma iri gwá', tidá' qo gawaá daanduú yaamuú wa hi'iimita, tsir/o nee makaá ta deaaen, makaá sla/a nee muruú gur'eér hi'iimita sleémeero, nee umuúqo heewo.

²² Umuúqo gár hiinsluú slafíngw kooma, ar duungár hiinsla ina gwá'.

²³ AAKOÓ MUNGÚ umuúqo gár slafa daanduú yaamuwo gana adoorír hhaamiís, muu, nee makaay, nee muruú gur'eérár hi'iimita, nee tsir/o sleémeero, gina hhaamiís gawaá daanduú yaamuwo. Ala Noa kilós iri meét, nee kudá' nee inós dinkwa baraá miringamoowo.

²⁴ Ma'aay nay malelee/amamitiyé' daanduú yaamuwo ay deelo tsiiru nee mibeeri kooán.