IIMU/UUNGW 6 - Biblía Axweesantá Hhohho' ar Mungú 2004

Tlakweemaá muu

¹ Qoomaadae muu ina tlaáhh baraá yaamuwo, nee dasu kuna laqwaál.

² Daaqoó Mungú dasuuduú muu kuna ár adór kur hhohhó'. Adoorihe inooín dasú naa tsawaariyé', nguna duxuutiyé'.

³ AAKOÓ MUNGÚ iri oó', «Qeerueé' nee hee ti tlampa'amisiaaká daqisleém, asma hee a slaqwtá gwaa'. Slám deelór hotaawós a har kureeraá tsiiru nee mibeeri tsár.»

⁴ De'emudaádae múk ló'wa tlét i deer baraá yaamuwo. Nee tam aluuwo sleeme i deer. Mukwí an xwaylár daaqoó Mungú nee dasú muu. Inooín a pihhuuseedár aáng, nee a múk xirfuú koóm.

⁵ Aako gari ár adór tlakweemaá muu kir úr baraá yaamuwo, nee adór umuúqo inslawoó baraá muner'ín kur tlákw umuú daqto.

⁶ AAKOÓ MUNGÚ iri oó', «Gár hám hee ngusa tleéhh nguri qaás baraá yaamií alé.» Ina ló'wa gurhamuút baraá muunaáwose, iri oó', «Masók una tleehhiiká.»

⁷ AAKOÓ MUNGÚ iri oó', «Mukdá' naa tleéhh u fiíts baraá yaamuwo, hee tam nee makaywo, nee muruú gur'eér hi'iimiít nee tsir/ór gáwtí tlatlaawa a fiíts sleeme. Asma muruuwí sleémeero naa tleéhh, aníng iga gurhaamír i qaás. Masók una tleehhiiká.»

⁸ Ala AAKOÓ MUNGÚ Noa guna i qaytsiít ar gurtleemu.

Kángw Noa

⁹ Kuká' an xwaylár Noa. Noa a heé gan'amkú koóm. Inós a heé hhoó' ta múk hatlá' oo qoomaarose. Noa nee Mungú tana aldinku'uumaamiís.

¹⁰ Noa daaqoó tám guna laqwaál, umer'ín a Shemu nee Hamu nee Yafeti.

¹¹ Múk baraá yaamu aa hhitiruuta hhe'eés dír geeraá Munguhe, yaamu nari hatsiyé' hara/untsawo.

¹² Mungú yaamu giri ár, naxés, naa hhitiruutiyé', asma umuúqo heewo aa hhitiruút baraá yaamuwo.

¹³ Mungú Noa guri báy, «Aníng gár naa ístí tsaát, a umuúqo heewo un qwaareés, asma hara/untsaín naa tlahhiyé' baraá yaamuwo. Daxta inooín i fiíts baraá yaamuwo.

¹⁴ Gimáy, miringamo tleehheek oo xa'anoó tlanmo, kutuwoó yaariír baraawósí tleehheek. Miringamo ku ninkiríts ar boohhayaangw daanduú tsee/a nee guruú do'o.

¹⁵ Adoorí an adór kur tlehh, tlenángw miringamo a miíta tsiiruú wák nee mibeeri tám nee gwaleél, bihhe a miíta mibeeri tsár nee kooán, nee tlenángw gawa a miíta mibaá nee kooán.

¹⁶ Pa/ángw dákw wák geexaweek tla/ángw koo/i nee dabe, daqaní dabe ka qás. Bihhaá miringamo ki áfkwí tléhh. Kitaardaá tám tleehheek, ar baraay, ar tla/aangw nee ar gawa.

¹⁷ Nee ga/aaweek, aníng tluwoó ló'wa úr ngu huúw baraá yaamu, as umuúqo gár slafa ngiwa hhitiim, as miwa deerút baraá yaamuwo. Umuúqo gár baraá yaamií diriia i gwá'.

¹⁸ Ala án kuúng u alqadór i haniís. Kuúng an dát baraá miringamo nee na/iiwók nee hareerók, nee tlaawoó daaqaywók.

¹⁹ Nee baraá umuúqo gár slafa ar slaqwtá kooma ar umuúqo daa'awto, /ameeni nee yaqaamba, ki tsár wa dahás as niwa slafiya' dinkwa nee kuúng baraá miringamoowo.

²⁰ Umuúqo daa'awtá makaywo nee tsir/o nee muruú gur'eérár hi'iimita nin tsár tsár wa dahiyá' amoorógií alé as iwa slafiya'.

²¹ Umuúqo gár /aymaaro ya/aam na ar daheek, burumbureek tawa muruú /aymaarók nee muruú /aymar'ín.»

²² Noa adoodá' sleémeero kwaa báy nee AAKOÓ MUNGÚ gana tleéhh.