IIMU/UUNGW 50 - Biblía Axweesantá Hhohho' ar Mungú 2004

¹ Yosefu iri gáwtá wa huú' gawaá baabuúwós, guri alee/aa/amín, guri ma'aás.

² Yosefu sagadiyuuseerós tidár qwaslaare gari kángw báy, baabá kuwa sliki ar mooyangwdá' iwa tsutsuiiká. Kuri sliík ar mooyangwdá'.

³ Kuna slikín deelo mibeeri tsiyahhe, ar adoodá' múk Israeli i /imaamisi. Múk Misri Yakobo guri sa tsuunqumiís ay deelo mibeeri faanqw.

⁴ Deeloodár tsuunqumis iwa waaráhh, Yosefu iri axweés dír múk doó Farao. Gár aa oó' a tí, «Án bira ya/aandé' tla/angwhunge, ooaré' dír Farao, ku beera', Baabuúeé' án iga lo'ór /aymiís. Gár iga báy a tí,

⁵ ‹Án gwa'arar'eé' naa hamát. Bara gwaá', án foolaré' baraá baa'ar'eé' tidá' naa foól baraá yaamaá Kana'ani.› Daxta án pa/ángw i haniisaré' baabuúeé' nguwa foolár aw. Ala án ni kií/.»

⁶ Farao iri oó', «Tláw, baabuúwók foolár aweek adoodá' ura lo'ór /aymiís.»

⁷ Naagáy Yosefu baabuúwós guri foolár áy. Tiri alkoné' nee sagadiyuusér Farao sleémeero, dinkwa nee bariisér do'ose, nee bariise sleémeero ar yaamaá Misri.

⁸ Doó Yosefu nee maraá hhaeewose nee doó baabuúwose sleeme tana daqáy. Na/ii kilooín kina geexáy, nee bee/aangw nee hikwaaine baraá yaamaá Gosheni.

⁹ Tina alkoné' dinkwa nee mukdá' faraási gaa i tsa/an, nee gaarduudá' ta uuruxun, tay amaqawár yaariir.

¹⁰ Tay hardáh dír balaangw kuwa haritlemaamisi, didár gayuú yaaér Yordani. Tari amoodá' wa tsuunqumiís ar tsuunqusmoó xoorór boo/. Yosefu iri tsuunqumiís as baabuúwós amoodá' wa alé deelo faanqwe.

¹¹ Mukduú Kana'ani baraá yaamuudá' wa hoót, mukdá' tsuunqumiís kuwa ár didár haritleemisú wa alé, tari oó', «Tsuunqumisuú múk Misri ku yaariír.» Naagáy didá' kari ateét ar umuuwí, ta bay Abel-misraimu, tidá' gayuú Yordanír i dirii'.

¹² Daaqoó Yakobo adoodá' baabuúín ngaa báy kari tleéhh.

¹³ Kuna ar tláy ay baraá yaamaá Kana'ani, kuri foól baraá mar'idár baraá qaymór Makpela, tidá' Mamrero da/aáw, mar'idá' Abrahamu aa tlaáxw dinkwa nee qaymór Efroni, heé Hiti, tawa dír mukós kway foliiti.

¹⁴ Alaá baabá foolaro kuwa hhe'eés, Yosefu dinkwa nee hhaeewós, nee mukdá' sleémeero nee inós taa alkone' qoomár tawa baabuúwós foolár ay, tari kií/ baraá yaamaá Misri.

Yosefu hhaeewós ngiwa gurtláy

¹⁵ Hha'aá Yosefu ngiwa ariyé' baabuúín aa gwaá', tari oó', «Hám wané Yosefu daxta ti aahh, tiwa li/áy bui, kuduú tlakweemaadá' naa inós i tleehhaán.»

¹⁶ Muu kway huúw dír Yosefu, tay oó', «Baabuúwók hara'aya ngina geexáy qoomár gwa'ararós niwa hardatká, ina oó',

¹⁷ ‹Yosefu ku beera', Tlakweemaá hhaeewók nee dakuúsar'ín gurtlaweek, asma kuúng una sadakuusiyé'.› Daxta un firiirimaán, dakuúsarén gurtlaweek, asma atén a lawaalér Munguú baabuúwók.» Yosefu iri /aá/ qoomár inooín nee inós tawa axweesi.

¹⁸ Hhaeewós nari tlayé' malé alé, tari tumbarara'aát geeraá Yosefu, tari oó', «Qaytsiít, atén a lawaaleerók.»

¹⁹ Yosefu giri báy, «Ma da'ayumiitaara'. Ahaá, án a Mungúhe?

²⁰ Kuungá' looeemaawo, ana slaé' aníng iwa gár tlaákw i tlehha', ala Mungú gana slaá' tawa gár hhoo', as xoorór ur ngiwa ba/amisi, adór hám i diri' laarí.

²¹ Hám daxta ma sangw da'ayumiitaara', án kuungá' nu /aymiís, nee na/iihunge.» Yosefu giri gurkwa/ás nee tari axweés ar axweesantá hho'.

Gwa'arár Yosefu

²² Yosefu iri hoót baraá yaamaá Misrír wa alé, inós nee doó baabuúwose. Kureeraá Yosefu aa hoót a tsiiruú wák nee mibaangw.

²³ Yosefu na/aá doó Efraimu giri ár ay nángw sagaáwa tám, nee na/aá Makiri, garmoó Manase, kiri dabaá Yosefu i laqwaál.

²⁴ Yosefu hhaeewós giri báy, «Án hám gwa'arar'eé' naa hamát. Ala Mungú niqo hardah dirhúng i alé, as nuwa duuxi baraá yaamuká' Misriro ay dír yaamuudá' aa oó' dír Abrahamu nee Isaka nee Yakobo.»

²⁵ Yosefu daaqoó Israeli guri lo'ór /aymiís giri báy, «Mungú niqo dirhúngií hardah, kuungá' nuwa ba/amisár ay. Kuungá' daqaní tuuar'eé' ka Kana'anírí hubá'.»

²⁶ Naagáy Yosefu iri gwaá' tawa heé kureeri tsiiruú wák nee mibaangw. Kuri sliík ar mooyangwdá' slaqwa iwa tsutsu'ká, kuri qaás baraá sandakmo, baraá yaamuudá' Misriro.