IIMU/UUNGW 49 - Biblía Axweesantá Hhohho' ar Mungú 2004

Yakobo daaqaywós nguwa tsuúq

¹ Yakobo daaqaywós guna ateét guri báy, «Burumburité' dinkwa, asma muruudá' kuungá' nu sláw, nguwa dirhúngí oo'.

² Burumburité', iia qaasaak, aá daaqoó Yakobo, aníng Israeli baabuúhúng iiárií qaasaré'.»

³ «Reubeni, kuúng a baris, /uuruueé', nee mamaá masoombi'iimar'eé', kuúng a ló'wa ilaiwa/amér koón, nee slám a /uuruú koón.

⁴ Kuúng a adór gwaanduú ma'aay, ila/aro tu gawít. Ala kuúng a baloó heé ureeká geeraá hhaeewoge, asma kuúng qatanír baabuúhúng ana i tsa/aán, baabuúwók kuri mureekés.»

⁵ «Simeon nee Laáwi a daa'awi, xooslaá slaqwarar'ín i ló' wa xaraasliyá'.

⁶ Án a dahaaká baraá axweesanay'ine, slám a dahaaká baraá kwasleemaduine. Asma baraá buhhtaaine muu nguna tsu/iyé', nee baraá tsifirtlakwer'ine awe ngina hariiayé', ngina kane tlaaqiyé'.

⁷ Buhhtaaín ki lu'usi, asma i ló'wa xaraasliyá', muner'ín ka lu'usi, asma i ló' wa xarásl. Inooín aníng i tsiyayaáx baraá yaamaá Yakobowo. Aníng inooín ngiri diyayaá/ baraá Israeliwo.»

⁸ «Yúda, kuúng hhaeewók u xirfeemisiyá', wakuuseerók kari bál, hhaeewók kuúng u ilaiwawa/iyá'.

⁹ Yuda a adór na/oó diraangw. Makiito'oorók biringa ót, an kí/ baraá mar'i. An yaamií qát, tiri adór dirángw wa aldúx, adór dirángw /ameeni, heé qiítl a heemá naxwto.

¹⁰ Yúda, hhartá waawuti'iima i baloó qutlaaká diroge, nee xwaylarók deelo sleémeero in waawuti'iín, ay dír heé waawuti'iima loó' nay hardihi, kudá' xoordu ni ilaiwawa/iya'.

¹¹ Daqwaywós gun tseek dír xa'anoó sabiíbu, na/oó daqwaywós gun tseek dír xa'anoó hhoó' oo sabiíbu. Inqwaruuwós gun hhuunts ar ma'aá na/aá sabiíbu, nee tlabaawós gin hhuunts ar difaáír da/aten ar taa tleéhh ar ma'aá sabiíbu.

¹² Ilaawós ki da/aten asma difaái, sihhnaawós ki /awak as ilwa.»

¹³ «Sebuluni hotaangós a baraá afaá tlawi, yaamuuwós tari wa/amér miringér uren ki sihhtimiisi. Harki/isoó yaamuuwós tari Sidoni.»

¹⁴ «Isakari a adór daqoó /uuruú koóm, oo aa qaat baraá tla/ángw slumtá bee/aangw.

¹⁵ Birnga ár adór didár hungu/uusa kar hhoohhoó', nee adór yaamu ir ganaaiyá', in ya/án huwa kawa sum'ií qaasi, nee inós gadiyér lawaali'iima gari tleehh.»

¹⁶ «Dani sakwasleemár mukós gan tlaaq, adór tlahhoó wák oo Israeli.

¹⁷ Dani tari adór dayshamoó afaá loohi, adór dayshamoó qarkú koóm oo afaá loohi, kudá' kol'aá faraási gi kikiíhh, heé faraási gaa i tsa/an iri daanduúr huu'.»

¹⁸ «Aníng ba/amarók an daamaraám, aá Aakoó Mungú.»

¹⁹ «Daqtá fisuuse Gadi guri /awa/awiín, ala inós gari guusa hhe'ees amór saáw i ale.»

²⁰ «Bu'úngw Asheri ku yaariír, inós muruú /aymaadá' waawutumoó wa hariim ngu duux.

²¹ Naftali a adór tlaaqatír /an/anuus. Inós na/aá hho' gin laqwaal.

²² Yosefu a adór xa'anoó laqwaliím, xa'anoó laqwaliím afaá kutltá wa alé, haleemiiwós koo/i ngin alsihhiitiyá'.

²³ Múk maheeri guna /amaatseék ar xarasleema, kuri maheerír tlaquút, nee kway ló'wa daawitimiís.

²⁴ Tam adoorihe, ga/aleerós ka amohhoo', nee dabaawós sleeme i /uuruú slaslayá', ar aleesleemuú Munguú duú /uuruú koóm oo Yakobo, ar aleesleemuú umuú De'eemusmo, inós an Tlaa/ár Israeli.

²⁵ Munguú baabuúwók u alee/iisi, Munguú Aleesleemusmo u tsuuqi ar tsuuqaá dooraá dahhá', ar tsuuqaá iltá tlawtá dahhá', ar tsuuqaá ilwa nee na/ii.

²⁶ Tsuuqaá baabuúwók i /uuruú koná' ta /uuruú tlom'aá hotaatima'a, nee hhooár tlom'aá alhhe'eesay wasl. Tsuuqaká' i iwiitiye' gawaá ságw Yosefu nee gawaá gitsee/aawós, kudá' taa paraátl nee hhaeewós.»

²⁷ «Benyamini a adór tawermo, matlaatleero sluqoorós gan /aay, nee tsiindoowo haasaáng guri qasmiis.»

²⁸ Kuká' an tlahh'aá mibaá nee tsár awa múk Israeli, nee gaarí an /aymi'iidá' baabuúín aa káh qoomár ngiwa tsuúq. Umuú heewo ar adoodá' inós wa hariim.

Gwa'arár Yakobo

²⁹ Israeli na/iiwós gina hara'ayín, giri báy, «Aníng gwa'araaro aga nakaá/. Bara gwaá' án ir folá' dinkwa nee taati'iieé' baraá mar'idár baraá qaymór Efroni, oo múk Hiti,

³⁰ amooqár Makpela, Mamrero da/aáw, baraá yaamaá Kana'ani. Abrahamu mar'irí nee qaymoodá' gana tlaáxw dír Efroni wa alé, múk Hiti, tawa dír ta múk í foliiti.

³¹ Amoodá' an dír Abrahamu nee hareerós Sara ki foliít, nee an dír Isaka nee hareeró Rebeka ki foliít, nee an dír Lea ngi foól sleeme.

³² Qaymo nee mar'iro, tidá' amoodá' i dirii', kana tlaáxw dír múk Hiti wa alé.»

³³ Yakobo alqaduuwós ngiwa hhe'eés ooaro dír daaqaywose, ya'aawós giri gawaá qatnírí tsa/aás, hiinsluú alhhe'eesáy guri uuruúx, iri tsatiít.