IIMU/UUNGW 47 - Biblía Axweesantá Hhohho' ar Mungú 2004

¹ Yosefu ina tláy amór Farao, guri báy, «Baabuúeé' nee hhaee'eé' kudá' Kana'anír dahhá' naa hardihiyé', nee bee/aangw nee hikwaawo nee tidá' taqo kona. Inooín hám ta baraá yaamaá Gosheni.»

² Múk kooán guri ar tláy baraá hhaeewose, guri sihhtís geeraá Farao.

³ Farao giri yaahaás, giri báy, «Gadiyér ta koonda' a milá?» Farao kuri báy, «Atén sagadiyuuseerók a de'eemuuse, nee baabuúrene.»

⁴ Farao kuri báy, «Nina hardahaán baraá yaamuká', atén a loohuusér deelór niina, asma lawaalmoowók yaamaá qawtani gaa slayká, asma giyeé ka ur baraá yaamaá Kana'aniro. Un firiirimaán ti gurtleer, ateékaá lawaale, tawa hootaan baraá yaamaá Goshenír wa alé.»

⁵ Farao Yosefu guri báy, «Baabuúwók nee hhaeewók ugwa i hardihiyé'.

⁶ Ala yaamaá Misri i geeraawók, nee yaamuudá' ganaa'á' baabuúwók ti laqaan, inooín ta baraá yaamaá Goshenír wa hooti. Tla/angw'ine múk de'éngw xuú' bir deer, bur xú', qaaseek tawa múk hikwaaeé' gi sageesihhmiít.»

⁷ Yosefu baabuúwós guri huúw geeraá Farao. Farao kuri tsuúq nee Yakobo.

⁸ Farao Yakobo guri yaahaás, «Kureeriwók a magá'?»

⁹ Yakobo Farao guri báy, «Kureeraá naa hoót tawa adór aausmo a tsiiru nee mibeeri tám. Kureeriiká' ki niina, slám awa slahh'amaayér koomá'. Ala adór kureeraá taati'iieé' naa dahi'iimár hootiyé' ngaa ay'iiká.»

¹⁰ Yakobo Farao guri tsuúq. Yakobo iri tláy.

¹¹ Aluuwo Yosefu baabuúwós nee hhaeewós giri yaamií haniís baraá Ramasesiro, yaamaá hhooá' ló'wa alé baraá yaamaá Misriro, tawa dír hotangw'ín adoodá' Farao ngira oó'.

¹² Yosefu baabuúwós nee hhaeewós nee do'ose gina /aymiís, adoodá' faarór na/aá do'ós i eer.

Giyeé iwa tsimaamíhh

¹³ Muruú /ayma i kaahh baraá yaamaá hatlae, giyeé ka ló' wa ur baraá yaamaá Misriro, nee yaamaá Kana'ani, tana slahhaá' qwarko.

¹⁴ Yosefu peésa gana burumbuúr, ar baraá yaamaá Misri, nee ar yaamaá Kana'ani, tidá' taa balángw ar tlaxún. Yosefu gari huúw dír Farao.

¹⁵ Peésa iwa fák dír muko, tari daqáy dír Yosefu, kuri báy, «Qwaláng, balaangw haniisang, ahaá mahar qatlaán ilaawók wa alé, asma peésarén aa fák.»

¹⁶ Yosefu giri báy, «Hikwaahúng haniisare' i balángw ar waa'alahaán, bar peésarhúng aa fák.»

¹⁷ Hikwaaín kiri huúw amór Yosefu, adór: Faras nee hikwa, nee bee/aangw, nee aara nee daqwaaye, inós giri balaángwí haniís. Kurkudae Yosefu gina balaángwí hanmiís ar kuwa waa'alhan ar hikwaaín sleémeero.

¹⁸ Kurkudá' iwa faák, tana kurkú tsár i dáh, tari malé kií/ amoorós, kuri báy, «Atén peésa a lu/u/umanaaká, aa tsuwa fák. Hikwaarén sleémeero a kók, gár aa dirén i met i káhh, aqo har slaqoorén nee qamuurén.

¹⁹ Atén gár nis dír geeraawók i hhaamaan a milá, nee qamuurén niri hhituruutiyá'? Atén nee qamuurene ti tlaxw, tari lawaalér Farao, as tiwa /aymiisi. Balaangw haniisang mawa qatlaán, nee dahaasíngw ta baraá qamuuréní dahaasaan haniisang sleeme.»

²⁰ Yosefu yaamu sleémeero awa Misri gina tlaáxw as Farao. Múk Misri qamuuín sleémeero gina weerimiís dír Yosefu, asma giyeé ló'wa tsimaamíhh.

²¹ Adoorí an adór Farao yaamaá Misri sleémeero ngira sláy. Yosefu múk Misri sleémeero guna lawaalér Farao tleéhh.

²² Yosefu yaamaá aa tlaxwiiká aqo har kudaá kaahamuuse, asma inooín i slaasláwar'ín koná', tidá' amór Farao daahh. Slaasláwar'ín kari /aáy, tidá' ta hanmiisi nee Farao. Gaarí an gár yaamuuín kisa weerisiiká.

²³ Yosefu muu guri báy, «Ga/aawaak, án kuungá' naa tlaáxw laarí, kuungá' nee qamuuhunge a daqaari'iimár Farao. Ga/aawaak, dahaasingwhúng a kwí, qamu dahaasaak.

²⁴ Ala qoomár bu'uungo boohhár wák baraá bohhaá kooane ka Farao i haniisá'. Bohhaá tsiyáhh a koohúng, as tawa dahaasíngw qamuuhúng, nee muruú /aymarhúng nee oo múk dír marayhúng wa hoót, nee muruú /aymár na/iihúng.»

²⁵ Tari oó', «Kuúng slafingwrén uga ba/amís. Na'ás, aáko, atén kuúng birta gurtleér, daqaní atén a lawaalér Farao.»

²⁶ Gawaá adoorihe Yosefu adoorí gari dawa tleéhh baraá yaamaá Misriro, tawa gár hariim umuú heewo, baraá bohhaá kooán awa bu'uungo, ar wak ngiwa haniisi dír Farao. Dakwí i daadeer tam laarí baraá Misriro. Ala yaamaá kaahamuuse kilooín kina tlaxwiiká, as kiwa daqaari'iimár Farao tleehhi.

/Ayma'aá alhhe'eesáy awa Yakobo

²⁷ Múk Israeli iri hoót baraá yaamaá Misrír wa alé, dirka ta bay Gosheni, daqaari'iima kari sláy, tari doogín nee tari ló' wa tlaáhh.

²⁸ Yakobo iri hoót baraá yaamaá Misrír wa alé, har afi qoomár kureeraá mibaá nee faanqw. Yakobo kureeraá aa hoót a tsiiru nee mibeeri tsiyáhh nee faanqw.

²⁹ Deelór gwa'arár Israeli iwa naká/, garmaawós Yosefu guri ateét, guri báy, «Án kuúng bir tsuwa slá', dakók qaaseek gawaá nawdueé', nee al'axweesani ooang, ar án kuúng iwa ilaiwa/amér looeemií tlehh, aníng mi baloó baraá yaamaá Misrír i foolaar.

³⁰ Ala án bara gwaá', huwáng, foolár awáng amoodá' taati'iieé' ki foliít.» Yosefu iri oó', «Kahhoo', adoosíng kuúng ta kat a tleéhh.»

³¹ Yakobo iri oó', «Lo'o /ayeek.» Yosefu lo'o gari /aáy. Israeli sagós guri xupu'uús amór sángw qatanirós, Mungú guri sluufiís.