IIMU/UUNGW 46 - Biblía Axweesantá Hhohho' ar Mungú 2004

Hhay Yakobo iwa Misrír keér

¹ Israeli iri aaií káy dinkwa nee muruudá' sleémeero iqo kona. Iri hardáh ay Be'er-sheba. Ilahhooár muruú ta tsu/i gari haniís dír Munguú baabuúwós Isaka.

² Mungú iri axweés nee Israeli ar baraá iigu'utu qoomár xweera, guri báy, «Yakóbo, Yakóbo.» Inós iri oó', «Aníng a diirí.»

³ Iri oó', «Aníng a Mungú, Munguú baabuúwók, ma da'ayumiitaar tawa Misrírí /et, asma aníng kuúng u xoorór ur tleéhh baraá ayaaqane.

⁴ Aníng an /eét dinkwa nee kuúng ay baraá yaamaá Misri. Aníng kuúng u malé tsa/aás ar xurewasle. Kuúng bara gwá', heé kuúng u amohhe'eés a Yosefu.»

⁵ Yakobo ina Be'er-shebár wa tláy, na/aá Israeli baabuúín nguri ar tlayé', nee na/aá ninakw, nee tlaaway'ín, ar gawaá gaardu, kudá' Farao aa haniís as inooín kiwa huwi.

⁶ Muruuín nguri huwiyé', nee daqaari'iimar'ín baraá yaamaá Kana'anír wa alé, tindiri hardáh yaamaá Misri, Yakobo dinkwa nee xwaylarós sleémeero.

⁷ Daaqaay nee daaqoó daaqaywós, dasuuwós nee dasuú daaqaywós, nee xwaylarós sleémeero, gina huúw ay yaamaá Misri.

⁸ Umeerí ar na/aá Israeli awa naa dahiye' baraá yaamaá Misri: Reubeni, kuduú garmoó baris dír Yakobowo,

⁹ nee na/aá Reubeni a Hanoki, nee Palu, nee Hesroni nee Karmi.

¹⁰ Daaqoó Simeon a Yemueli, nee Yamini, nee Ohadi, nee Yakini, nee Sohari nee Saulo, garmoó /ameenír Kana'ani.

¹¹ Daaqoó Laáwi a Gersoni, nee Kohati nee Merari.

¹² Daaqoó Yuda a Eri, nee Onani, nee Shela, nee Perisi nee Sera. Ala Eri nee Onani niri qatliyé' baraá yaamaá Kana'ani. Daaqoó Perisi a Hesroni nee Hamuli.

¹³ Daaqoó Isakari a Tola, nee Pufa, nee Yashubu nee Shimroni.

¹⁴ Daaqoó Sebuluni a Seredi, nee Eloni nee Yale'eli.

¹⁵ Kuká' an kudá' Lea aa dír Yakobo i xwayluúr baraá Padan-aramu wa alé, dinkwa nee dasiirós Dina. Daaqaywós nee dasuuwós nee na/ii'ín sleémeero a mibeeri tám nee tám.

¹⁶ Daaqoó Gadi a Sifioni, nee Hagi, nee Shuni, nee Esboni, nee Eri, nee Arodi nee Areli.

¹⁷ Daaqoó Asheri a Imna, nee Isfa, nee Isfi, nee Beria nee hho'or'ín Sera. Daaqoó Beria a Heberi nee Malkieli.

¹⁸ Kuká' an na/aá Silpa, alee/isuso'oodá' Labani aa haniís dír dasiirós Lea. Silpa na/aá aa Yakobo i xwayluúr a kuká' mibaá nee lahhoó'.

¹⁹ Daaqoó Raheli, harér Yakobo, a Yosefu nee Benyamini.

²⁰ Daaqoó Yosefu aa laqwaál baraá yaamaá Misrír wa alé, a Manase nee Efraimu, kudá' Asenati, dasír Potifera aa dirós i xwayluúr. Potifera a kaahamusmoó gixsár Oni.

²¹ Daaqoó Benyamini a Bela, nee Bekeri, nee Asbeli, nee Gera, nee Na'amani, nee Ehi, nee Roshi, nee Mupimu, nee Hupimu nee Ardi.

²² Daaqoó Raheli aa dír Yakobo i xwayluúr a mibaá nee tsiyáhh.

²³ Garmoó Dani a Hushimu.

²⁴ Daaqoó Naftali a Yase'eli, nee Guni, nee Yeseri nee Shilemu.

²⁵ Kuká' an na/aá Bilha, alee/isuso'oodá' Labani aa haniís dír dasiirós Raheli. Inós Yakobo guna na/iiká' i xwayluúr. Xwaylarós sleémeero a na/ii faanqw.

²⁶ Múk nee Yakobo taa kone' ay yaamaá Misri a mibeeri lahhoó' nee lahhoó', ala tlaawoó daaqaay kwa faariiká.

²⁷ Daaqoó Yosefu aa laqwaál baraá yaamaá Misri a tsár kilós. Gawaá adoorihe xwaylár Yakobo ar aa baraá yaamaá Misrír i dat a mibeeri faanqw.

Hhay Yakobo iwa hardát Misri

²⁸ Yakobo Yuda guri geerií ya/aáw amór Yosefu, as aako nguwa al'ay nee nguwa geerahari ay yaamaá Gosheni.

²⁹ Yosefu gaárirós gari tlabií hhaáf, ina tsa/án iwa baabuúín al'ay Gosheni. Iwa hardáh dír baabuúwose, guri hara/akuút, guri isa almarmariít, iri /aa/amín afi qoomár hhaawaakahe.

³⁰ Israeli Yosefu guri báy, «Án daxta tam gwaa'a a gaarooká, asma án kuúng ugwa ár tawa slaf malé alé.»

³¹ Yosefu hhaeewós nee múk doó baabuúwose giri báy, «Aníng a tláw, Farao u kaangwí ooár áw, un baw, ‹Hhaee'eé' nee baabuúeé' sleémeerowo, kudaá baraá yaamaá Kana'ani, tinda hardáh.

³² Nee mukwí a de'eemuuse deelo sleémeero, asma inooín a múk muruú deaaeém. Hám daxta inooín bee/angw'ín ngwaa huwiyé', nee hikwaaine, nee muruudá' sleémeero iqo kon'a.›

³³ Kuungá' bar Farao naa ateét, nee burna yaahaás, ‹Gadiyérhúng a milá?›

³⁴ Kuungá' ta oa', ‹Atén lawaaleerók a de'eemuuse iimír na/uumar'eene ay laarí, tam taati'iirén iimír aange a de'eemuuse.› Kuungá' adoorí bara oé', daqaní inós yaamaá Gosheni ngi haniis dirhúng.» Yosefu adoorí gana oó', asma múk de'eemuuse a múk taa ló'wa aáhh baraá yaamaá Misriro.