IIMU/UUNGW 45 - Biblía Axweesantá Hhohho' ar Mungú 2004

Yosefu tiwa xu'utís dír hhaeewós

¹ Qoomaadae Yosefu ila/aro taa aleeslayká dír geeraá mukdá' sleémeero aa didií sihhiiti. Yosefu iri tseé', iri oó', «Muu sleémeero tsee/áy duuxaak.» Gawaá adoorihe heé Misri tumu wák i kaahh, qoomár tiwa xu'utís dír hhaeewós.

² Iri /aá/ ar afór ur, múk Misri sleémeero iri axaás, múk doó waawutmo Farao iri axaás.

³ Yosefu hhaeewós giri báy, «Aníng a Yosefu, baabuúeé' i slafaafína?» Ala hhaeewós nari amoqwaariyé' daeero, mu/aywatsto nguri harslaaqatiyé'.

⁴ Yosefu hhaeewós giri báy, «Na'asé', amoorí saapare'.» Niwa amoodí saapiyé', giri báy, «Aníng a hhiyaahúng Yosefu, kudá' taa weerisé' baraá yaamaá Misri.

⁵ Ala daxta kuungá' ma gurhaamuutara', laqaá miti lu'umisaara' as iwa weerisé'. Aakoó Mungú aníng ina geerií huúw as slafíngw muu nguwa ba/amis.

⁶ Asma gaarí an sangw kurkú tsár qwarko baraá yaamukae, slám kureeraá kooán i alií kahhiyá' awa tawa doosliiká, nee tawa bu'unká baraá qamuuwo.

⁷ Mungú aníng ina geerií huúw as iislaxmór kuungá' nee xwaylarhúng, tawa kumita' hotaawo nee nuwa ba/amis ar ba/amár ur.

⁸ Gawaá adoorihe, heé aníng iga amoorí huuw a kuungaeeká, ala an Mungú. Inós aníng ina baabá tleéhh dír Faraowo, nee aakoó do'ós sleémeero, nee geeraharusmoó yaamaá Misri sleémeero.»

⁹ «Gimsé', muutlité', tlawsé' amór baabá, ku beera', ‹Garmaawók Yosefu i kaahi, Mungú aníng iga qaás tawa heé úr baraá yaamaá Misri sleémeero, qwaláng ar gaanslaay, mindi tligaar.

¹⁰ Kuúng an hót baraá yaamaá Goshenír wa ale, daqaní tu tseéw bihhaaeé', kuúng nee na/iiwók nee na/aá naangók, nee bee/angók nee aaraawók nee hikwaawók nee tidá' sleémeero taqo koonda'a.

¹¹ Daqaní aníng kuúng u /aymiís, asma kureeraá kooán awa qwari i alií kahhiyá', as kahhó' kuúng nee múk do'oge nee umuúqo gár ta koonda', qwari munduwa tsuú/.› »

¹² «Kuungá' kilá' nee daa'awmooeé' Benyamini aga aandé' ilaahunge, adór anuú kilá' nee kuungá' tara axweesaán.

¹³ Kuungá' baabá ku kaangwí beerá' oo xirfuueé' kwí oo baraá yaamaá Misri, nee mura' sleémeero taa aandé'. Gimsé', muutlité', baabuúeé' amoorí huwaare'.»

¹⁴ Naagáy Yosefu Benyamini guri gawaá de/eewií óh, iri /aá/, Benyamini sleeme iri /aá/.

¹⁵ Yosefu iwa baraá /aa/eé kahhi, hhaeewós giri ma'amiís, nee hhaeewós tari axweemaamiís.

¹⁶ Kaangwí kuwa axaás tam doó Farao tawa kaahi, «Hha'aá Yosefu naa hardihiyé',» adoorí Farao guri sla'atís, nee sagadiyuuseerose.

¹⁷ Gawaá adoorihe Farao Yosefu guri báy, «Hhaeewók ki beer, ‹Mayshuuhúng tsa/aasaak gawaá daqwaaye, ki/é' baraá yaamaá Kana'ani.

¹⁸ Baabuúhúng huwaare', nee múk do'ós sleémeero, án yaamaá hhoo' ngi haniís baraá yaamaá Misriro, daqaari'iimár yaamuká' a sleerá'.

¹⁹ Kuúng inooín ki malé ádbeér adoorí kawa tleehhi: Gaardaá huwa loohiso ki baraá yaamaá Misrír wa huwi as na/ii'ín nee tlaaway'ine, nee baabahe, kingiwa amoorí huwi.

²⁰ Ma daawimitaara' daanduú daqaari'iimarhunge, asma yaamaá hhoo' baraá Misriro a koohúng.› »

²¹ Adoorí an adór daaqoó Israeli aa tleéhh, Yosefu giri gaardií haniís adór Farao ngira oó', giri muruú /aymár loohírí haniís.

²² Umuú heewo guri inqwaruú warqeesárií hanií, ala Benyamini guri peésár tsiire támií haniís, nee inqwaruú kooán oo warqeesa.

²³ Nee baabuúín guna daqwaayér mibángw i haniís, ar muruudá' hhó' oo baraá yaamaá Misri, nee daqwaayér /ameena mibaangw ar balaangw ngwa hup, nee mikaáte, nee muruú /aymár hatlá' oo baabuúín oo loohi.

²⁴ Yosefu nee hhaeewós tiri deelór i ooiyé'. Qoomár iwa tlatlaya', giri burumbuúr giri báy, «Ma giliimara' loohiro.»

²⁵ Tari ti'iít yaamaá Misriro, nay hardihiyé' yaamaá Kana'ani dír baabuúín Yakobo.

²⁶ Baabuúín kuri báy, «Yosefu i slaaf, inós an heé úr oo yaamaá Misri sleémeero.» Baabuúín adoorí ngiwa axaás, ina kwisliít, iri xamaá', asma axweesantaín gaa lak ya/aniká.

²⁷ Alaá kangwdá' kuwa alki/iít oo Yosefu aa oó', nee gaarduudá' ngiwa ár, kudá' Yosefu aa haniís, awa baabuúín ngu huwá', Yakobo muunaáwós ina kwaá/, iri ya/án.

²⁸ Yakobo iri oó', «Aa bu'út, Yosefu garmaaeé' i slaaf, u artá áw dír nira gwaaiiká.»