IIMU/UUNGW 44 - Biblía Axweesantá Hhohho' ar Mungú 2004

Isaangír aa qwat

¹ Sageesihhtusmo guri i ilawaáts, guri báy, «Mayshaá mukwí dala/aak muruú /aymaaro, har afi qoomár gagaararo i aleeslaya', peésár umuú heewo ka qás baraá afkú mayshoórós.

² Nee isaangir'eé' tidá' taa tleéhh ar muqslír /awak ka qás baraá mayshór garmaadá' niiná dinkwa nee peésaadá' nira laliís.» Sageesihhtusmoodá' adoodá' Yosefu ngwaa báy, gari tleéhh.

³ Matlaatleero looa niwa tleér, kiri ya/aamár i haniís tawa watli, inooín nee daqwaayer'ine.

⁴ Alaá tawa ti'iít baraá gixsaro, Yosefu sagesihhtusmooduú oo do'ós guri báy, «Tláw, mukdá' eehareek, bar iga aán, ki beer, ‹Gár hhooeema kisa tlakweemár bué'? Isaangir'eé' tidár muqslír /awak gár kasa fisé'?

⁵ Ahaá, kuungá' a xua'aakáhe adór isaangirí tar isaangír aakooeé' ir wahaahan. Slamí inós isaangirí gan iigu'utúr ar'aa'ar. Aga ló'wa dakusé' adoorí kawa tlehhé'.› »

⁶ Giri eehár, giri loohír i áy, giri /aymi'iiká' báy.

⁷ Ala inooín kuri báy, «Aáko, gár adoosíng kara ó' a milá? Atén sagadiyuuseerók kureeriwo gár adór tisíng a tleehhanaaká.

⁸ Aáko, inslaweek, peésaadá' taa baraá afér mayshuurén i awaán, ngina ar ki/aán iimír baraá Kana'anír wa alé, xáy, adór ir ya/aan atén tari malé muqslír /awaak laqaá sahaábu fiisaán baraá doó aakoowók wa alé.

⁹ Gawaá adoorihe, barnaxes baraá tla/angwrene heé ga koóm bura slawaán, gár kus hariím a gwa'ara. Ateédá' hatlá' tari lawaalér aakoowók.»

¹⁰ Sageesihhtusmoodá' iri oó', «A qoón, a adoosíng kuungá' kara oé', heé taa ár oo ga koóm in lawaalmooeé' tleehhiit, nee kuungá' hatlá' a xaslxaanslír koonda'aaká.»

¹¹ Umuú heewo mayshoórós gari gaanslár aweeriís yaamií alé, gay afa gweér.

¹² Inós mayshu gina afe xuuxu'ún, iimír ar kuduú barsuú wa alé, ay kuduú aluutmo. Isaangidár wahaangw gari sláy baraá mayshór Benyamini wa alé.

¹³ Tlabaaín kiri feehhamiís gurhaamiro, huwaaín kiri tsa/aás gawaá daqwaaye, tari kií/ baraá gixsár i alé.

¹⁴ Yuda nee hhaeewós tawa hardáh doó Yosefu, Yosefu i dír do', inooín kuri i xupuú'.

¹⁵ Yosefu giri yaahaás, «Tlehhmuuwí naa aníng i tlehhé' a milá? Ahaá xua'aakáhe heé adór aníng gár taa luú/ ngiwa tsaahhi?»

¹⁶ Yuda iri oó', «Aáko, atén kuúng gár u bawaan? Adór dakuúsarén kar hheehhe'eesaan? Mungú dakuúsarén ngaa geehhoeés, ataá lawaaleerók. Atén sagadiyuuseerók, daxta atén sleémeero a lawaaleerók dinkwa nee kudá' isaangi kawa slayi.»

¹⁷ Yosefu iri oó', «Aasla'áy, adoosíng a baloó tleehhaaká, aqo har kudá' isaangir'eé' kawa sláy in lawaalmooeé' tleehhiit. Kuungá' hatlá' sleémeero ki/é' ar wayda amór baabuúhúng.»

Yuda Benyamini nguwa aleekal/án

¹⁸ Naagáy Yuda Yosefu guri i tseewúy guri báy, «Aáko, án ya/aamáng tiwa aleekalaa/. Án kuúng u firiím mi i buhhaar, asma kuúng aqo adór Farao sleeme.

¹⁹ Aáko, kuúng ataá sagadiyuuseerók tina yaahás a kat, ‹Kuungá' baabá u koondá'a? Hhiya' u koondá'a?›

²⁰ Kuúng uri bawaán, ‹Baabá u koomaán, nee inós aa dín. Garmaawós oo aluutmo ku niiná, oo aa laqwaál baraá diimaywós wa alé. Da'aawmoowós aa qaroó gwaá', inós kilós ina meét guruú aayírose, nee baabuúwós gu ló'wa slaa'.›

²¹ Atén sagadiyuuseerók tiri beér, ‹Amor'eéní huwaare', ilaaeé' ngu ariye'.›

²² Uri bawaán, ‹Garma baabuúwós geexawto gu aleeslayká, asma bungwa geexáy, baabuúwós i gwaa'.›

²³ Atén sagadiyuuseerók tiri beér, ‹Hhiyaahúng oo niiná bur ngwa ar awdi'iiká amoorí alé, gitsee/aaeé' i malé aanda'aaká.› »

²⁴ «Ala qoomár tawa tlawaán amór doó sagadiyusmoowók baabuúrén, atén tidá' kuúng taa beér kari inósí ooaán.

²⁵ Baabuúrén tiri báy, ‹Tlawsé' malé alé amoodá' i ki/aak, balángw niiná tlaxwaare'.›

²⁶ Kuri bawaán, ‹Ki/imá amoodá' i aleeslawanaaká. Nee hhiyaarén kudá' niiná birti koomaán, a daqawán. Asma gitsee/aá heedaádá' i aranaaká, bar nee hhiyaarén kudá' niiná ti koomanaaká.›

²⁷ Baabuúrén sagadiyusmoowók tiri báy, ‹A xuá' harer'eé' Raheli ina daaqoó tsár i xwayluúr.

²⁸ Oo wák ina qwaár,› án niri oó', ‹Doóqa makaá sla/a ngwa /ayiyé'.› Án nguri baloó ariiká.

²⁹ Kwí buraar tleeré', slahh'amu burngwa sláy, aníng baraá diimay'eé' kwihe a gurhaamírar gwaá'.»

³⁰ «Gawaá adoorihe bar aga kií/ amór baabuúeé', sagadiyusmoowók, garmaawí u koomaaká, nee slám iltá baabá dír i ga/eer a dír garmaawí,

³¹ inós binga ár garmaawós u koomaaká, aqo in gwaa'. Adoosinge ataá sagadiyuuseerók baabuúrén u gaasaán ar gurhaami baraá diimaywose.

³² Asma aníng ana sihhiít daanduú garmaawí wa alé dír baabahe. Aníng ana oó', ‹Burngwa ki/isiiká amoorók i alé, daqaní lo'oorós a daanduueé' deelo sleémeero.›

³³ Gím daxta án kuúng u harhheehhe'eés, án mawáng ni hoót diirí wa alé, garmaawí geemaweek ti kone' nee hhaeewós.

³⁴ Adór ki/imaá amór baabuúeé' ngir aleeslaw, bar nee garmaawí ti alkoomanaaká? Aníng qitla u aleeslawaaká slahh'amuudá' baabuúeé' gu sláw nguwa ar.»