IIMU/UUNGW 43 - Biblía Axweesantá Hhohho' ar Mungú 2004

Ki/imá Misri nee Benyamini

¹ Giyeé ina ak tsimaamíhh baraá yaamaá Kana'aniro.

² Qoomár balangwdá' tinda huúw baraá Misrír wa alé, iwa faák, baabá giri báy, «Ki/é' amoodií alé, balaangw tlaxwaare'.»

³ Yuda iri oó', «Heedaádá' adoorí ngina gawdeés, iri oó', ‹Kuungá' gitsee/aaeé' i aanda'aaká bar nee hhiyaahúng kudá' niiná ti koonda'aaká.›

⁴ Gimáy, kuúng bar aga ya/aán atén nee hhiyaarén kwí niiná tiwa koomaan, daqaní balangwsíng u tlaxór awaán.

⁵ Ala barnaxes ngu haniská, a daqawanaaká, asma heedaádá' atén tina báy, ‹Kuungá' gitsee/aaeé' i aanda'aaká bar nee hhiyaahúng kudá' niiná ti koonda'aaká.› »

⁶ Israeli iri oó', «Ahaá aníng mis adoorír slahh'eemisá', tam heedaádá' kuri xu'utisé' adór hhiyoó hatlá' ir deér.»

⁷ Inooín tari oó', «Heedaádá' tina ló' wa yaahamiís as tiwa xu'utír wa slai, atén nee mar'eefoorén sleeme, i kaahi, ‹Baabuúhúng i sláfi? Hhiyoó hatlá' i deéro?› Atén kari ooaán adoodár kilá' inós tir yaahamiisi. Ahaá, atén geera a xuaána adór inós tir bay, hhiyaahúng kwisíng niiná huwaare'?»

⁸ Yuda baabuúwós Israeli guri báy, «Garma haniisang nee aníng ti alkoomaan, as daqaní atén a adaá tlawaan, qwari mitiwa tsuú/ baraakí ale, atén nee kuúng nee na/iirén.

⁹ Aníng inós u sageesihhiít, garma dabaaeéní qaasang. Án barnaxes ngwa ki/isiiká amoorók i alé, nee ngway geeraawók i qaasiiká, daqaní aníng aga tlakweés dír geeraawoge deelo sleémeero.

¹⁰ Asma geera bar aga tligaaniikahe, geera alók aga qaroó daqawán, niri qaroó ki/aán ki/imaá tsare.»

¹¹ Baabuúwós Israeli iri oó', «Bar adoosíng, adoorí na tleehhaak, muruú hhó' oo yaamu na huwaak ar xosluuhúng: Di/tá niina ar mooyaangw, danuú niiná, moqoonjó, nee mooyangwdá' ta babay manemane, josi, gár adór karaánga, nee loósi, gár adór miniqiti.

¹² Peésár bu'utu sagaáwa tsár wa huwaak dabaahunge, as peésaadá' tinda ki/ís baraá afér mayshu, kawa ki/isa' ar dabaahúng, doóqa kana gunqareés.

¹³ Tlawsé', hhiyaahúng huwaak, nee ta ki/á' amór heedaádá' i alé.

¹⁴ Munguú Aleesleemusmo nu alee/iisi, gurtleemu kuwa sleera' dír heedaádae, as kahhó' niwa ki/a' nee Benyamini nee hhiyaahúng kuduú hatlá' sleeme. Amor'eene barnaxes na/iieé' nin qatliyá', i qatliye'.»

¹⁵ Naagáy, mukdaádá' qeemuudá' kuri huúw, nee peésaadá' kari sagaá wa tsár wa doók, tari tláy nee Benyaminiwo, tari aweér ay Misri, tari sihhiít dír geeraá Yosefu.

¹⁶ Yosefu Benyamini nguwa ár nee hhaeewós tiwa kona', sagadiyusmoó do'ós ga/áw guri báy, «Muksíng huwang amór do'. Garka gaasaak, muruú /ayma amohhe'eesaak, asma tlaatla/aango aníng nee inooín an al/ayiimaán.»

¹⁷ Heedaádá' adoodá' Yosefu aa oó' gari tleéhh, inós mukdá' guri huúw amór doó Yosefu.

¹⁸ Ala mukdá' ina da'ayuút kuwa huúw amór doó Yosefu. Inooín tari oó', «Gár tisa amoorí huúw doóqa a peésaadá' tinda ki/ís baraá mayshuurén waiidaá geeraawo. Doóqa daxta atén tin hara/uuntsín tiri muux, daqwayeerén kari hayoh, atén tiri lawaaleerós tleehh.»

¹⁹ Geeraharusmooduú doó Yosefu kuri harasaáp, tari axweés nee inós afkú dó' wa ale.

²⁰ Kuri báy, «Qaytsiít aáko, ar ló', daqeemuú geeraawo nina laliisaán.

²¹ Qoomár niwa hardahaán dír doó dahaaye, mayshuurén kiri gweeraán. Naxés peésár umuúqo heewo i baraá afkú mayshoórós i dirí', peésaarén a adoodár kilá' i diri'.

²² Atén hamí ar hatlá' ngina malé huwaán ar dabaarén, as muruú /ayma kuwa tlaxwaan. A xuaanaaká heé peésaarén gaa qaas baraá mayshuuréní alé.»

²³ Giri báy, «Wayda amorhúng, ma da'ayumiitaara'. Munguúhúng, Munguú baabuúhúng, inós peésarhúng ngina qaás baraá afér mayshuuhúng. Peésarhúng naa qaro amor'eé' hardát.» Aluuwo Simeon guri amor'ínií duúx.

²⁴ Geeraharusmoodá' mukdá' gway amór doó Yosefu huúw, giri ma'aay haniís, ya'aaín kiri hamaátl, daqwaayer'ín gay /aymiís.

²⁵ Qeemuudá' ta dír Yosefu haniisi kuri amohhe'eés, asma kaa axaás nee Yosefu tawa al/ayin tlaatla/aango.

²⁶ Yosefu iwa hardáh dír do', qeemuudá' kway amoorós huúw, kudá' taa dabaaín ar kon, kuri baraadií huúw amór Yosefu, kuri i tumbarara'aát.

²⁷ Yosefu kangw'ín guri yaahamiís, iri oó', «Baabuúhúng kudá' tawa kata' aa uráy, i saayauúti? I slafaafína?»

²⁸ Inooín tari oó', «Lawaalmoowók baabuúrén i saayuut, nee inós i slafaafín.» Kuri i tumbarara'aát as kuwa ilaiwawa/i.

²⁹ Yosefu iwa qaytsiít, Benyamini daa'awmoowós guna ár, iri oó', «Heewí a hhiyaahúng kudá' niiná kuungá' ta katá'a?» Benyamini guri báy, «Mungú u tsuuqi, garmaaeé'.»

³⁰ Yosefu iri gaansluút, asma muunaáwós ina haáts qwal/uwo as da'aawmoowós, ilaawós nina hatsiyé', dír iwa /aa/amin gari leeleéhh, iri dáh baraá kutuwír do'ós, iri /aa/amín.

³¹ Gitsee/aawós giri hamaátl, iri ti'iít, inós tay gawdeés, iri oó', «Muruú /ayma huwaare'.»

³² Muruú /ayma kunguri amohhe'eés. Oo Yosefu kuna dimbé haniís, oo hhaeewós kuri dimbé haniís, mukduú Misri nee inós al/ayaayimá' kooín kuri dimbé haniís sleeme. Asma múk Misri nee múk Ebrania ta al/ayaayinká, a gár tlaakw dír múk Misriro.

³³ Tari iwiít dír geeraá Yosefu, tiri hariyé' ar adoodá' tira hariyé' xwaylaro, oo baris tawa heé geera, aluutmo tari heé alhhe'eesáy. Tiwa i qaytsitiyé', adoodá' kari waa/oó/.

³⁴ Muruú /aymaadá' gawaá meésár Yosefu i dirií', Yosefu guri amor'ín i qasmiís, muruú /aymár Benyamini kuna tlahhás sagaáwa kooán wa ale ta oo múk hatlae. Tari wahán, tay dinkwár wa qwalaalaá/.