IIMU/UUNGW 42 - Biblía Axweesantá Hhohho' ar Mungú 2004

Hha'aá Yosefu niwa Misrírí laliisiyé'

¹ Yakobo ngiwa axaás adór balaangw ir deér baraá yaamaá Misriro, daaqaywós guri báy, «Ahaá a milá, gár iwiwituuwí tiwa tawo ila' ga/eera'?»

² Iri oó', «Iia qaasaak, aníng aga axaás adór balaangw ir deér baraá yaamaá Misriro. /Eeté', balaangw laliisare', mawa qatlaán qwarko.»

³ Naagáy hhaeedá' mibaangw awa Yosefu niri /eetiyé' baraá yaamaá Misrír i alé, as balaangw nguwa tlaxwiya'.

⁴ Ala Yakobo aa ya/aniká Benyamini daa'awmoó Yosefu nee hhaeewós tiwa alkona', asma ina da'ayuút, iri oó', «Wané tsaxwa gi sláy baraá aaiiwo.»

⁵ Gawaá adoorihe baraá mukdá' laliisa baraá Misrír i alé, daaqoó Yakobo sleeme i deer. Asma giyeé ka ur baraá yaamaá Kana'aniro.

⁶ Yosefu qoomaadae a ga/aawusmo baraá yaamudae. Inós an heé muu sleémeero gu balángw i weermiís baraá yaamudae. Hha'aá Yosefu sleeme nina hardihiyé', tay xupuú' ay yaamu dír geeraawós i alé.

⁷ Yosefu hhaeewós ngiwa ár, gina tsaáhh. Ala inós tina adór dahaaymo tleéhh dir'ine. Ina axweés nee inooín ar /ayma'aá xaraaslá', giri báy, «Kuungá' a dahha'? Kuungá' awa diimá?» Tari oó', «Amór ta dahhaan a baraá yaamaá Kana'ani, atén a laluuse.»

⁸ Yosefu hhaeewós tim ngaa tsaahhi, ala inooín inós ngwa tsaahhi'iiká.

⁹ Yosefu tlataawós kudá' aa tlatiitín daanduuine giri insláy. Giri báy, «Kuungá' yaamu ngina tsee/aaríngw eeré', as /aareemaá yaamurén kiwa aanda'.»

¹⁰ Inooín Yosefu nguri bayé', «Aasla'áy aáko, atén lawaaleerók a laluuse.

¹¹ Atén sleémeero a daaqoó heé wák, nee atén a múk looeema, slám a lawaaleerók, ala a tsee/aruuseerooká.»

¹² Ala Yosefu giri báy, «A adoosingeeká, kuungá' nina hardaté' as /aareemaá ayaawí kiwa aanda'.»

¹³ Nguri bayé', «Ataá lawaaleerók, slamí atén hhaeewo a mibaá nee tsár, a daaqoó heé wák oo baraá yaamaá Kana'ani. Hhiyaarén oo aluutmo i deer, i dinkwa nee baabuúrén. Ala oo hatlá' ina kahhuút.»

¹⁴ Yosefu giri báy, «Aqo adoodá' án naa káh, kuungá' a tsee/aruuse.

¹⁵ Adoorí an adór tundur iiari: Bar Farao i slaaf, kuungá' diirihe a baloó tleera'aaká ay dír hhiyaahúng kwisíng niiná nay hardihi.

¹⁶ Hhiyaahúng oo wák ya/aawaak i tlay, hhiyaahúng kudá' niiná ngu leehhi, nee kuungá' tundu ala tseegi. Daqaní looeemaá axweesanayhúng kwí u tsaáhh. Bar adooriheeká, daqaní kuungá' a tsuwá tsee/aruuse.»

¹⁷ Sleémeero giri baraá doó tsegmií dahaás deelo tám.

¹⁸ Bál tame Yosefu giri báy, «Asma án Mungú nguwa haratlintaatii', adoorí tleehhaak as tawa hota'.

¹⁹ Ala kuungá' bar qo tsuwa múk looeema, hhiyaahúng oo wák i meeti baraá doó tsegma, awa hatlá' i tlaye', balaangw ngu huwiye' amór hhaeehúng kudá' qwariitá'.

²⁰ Hhiyaahúng kudá' niiná ngu amor'eé' hubá'. Adoosinge daqaní axweesanayhúng ku looeemaá wa tsaahh, slám kuungá' tundu tsu/iiká.» Inooín tari ya/án adoodá' tleehhamooro.

²¹ Tari kilooín axweés ta kaahi, «A looeema atén hhiyaarén una sadakuusaán. Asma slahh'amaayér muunaáwós ana araán, qoomár tiwa firiirín, ala atén ugwa axaasaniiká. Ala hamí daxta slahh'amaayeerí atén taa sleér.»

²² Reubeni gina mu/aywaáts, giri báy, «Án kuungá' naa bawiikáhe, garma mu sadakuusara'. Ala kuungá' a axamisa'aaká. Xáy daxta, ga/aawaak, tseereerós atén taa inkí/.»

²³ Tam inooín sleeme nga tsahhi'iiká adór Yosefu inooín ngir axamiís, asma tana axweés ar loohír heé tsifrír ki/imís.

²⁴ Yosefu tina paraátl dir'ine, iri /aá/. /Aa/eewo iwa hhe'eés, iri amor'ín i kií/ as iwa axweesi nee inooín. Simeon guri taataáhh baraá tla/angw'ín wa alé, guri dahaás baraá doó tsegma dír ilaaín wa alé.

Hha'aá Yosefu iwa watliyé' Kana'ani

²⁵ Yosefu iri oó', «Xosluuín dala/aak balaango, nee peésár umuú heewo ka ki/isá' baraá mayshu, nee muruú /aymar'ín oo loohi ku hanisá'.» Kiri muruudá' sleémeero i tleéhh ar adoodá' Yosefu aa oó'.

²⁶ Balangw'ín kuri tsa/aás gawaá daandeemaá daqwaayer'ín, tari tláy.

²⁷ Heé wák baraá tla/angw'ine mayshoó ngiwa gweér, as daqwaywós nguwa muruú /aymárií haniisi, qoomár tawa baraá doó dahaayér i dirii'i, peésarós gana ár naxés i baraá afkú mayshoórós i dirí'.

²⁸ Hhaeewós giri báy, «Peésar'eé' baré kinga ki/ís, i baraá afkú mayshór'eé' i dirí'!» Daeero niri hasla'amiitiyé'. Tiri kilooín harawarqayé', tari daaraáx ta kaahi, «Gaarí a milá Mungú naa atén i tleéhh?»

²⁹ Tawa hardáh yaamaá Kana'ani doó baabuúín Yakobo, kangwdá' sleémeero gaa sláy kuri alki/iít tari oó',

³⁰ «Heedaádá' úr oo baraá yaamuudá' nee atén ana axweesaán ar /ayma'aá xaraaslá', tina báy, ‹Kuungá' a tsee/aruusér yaamueé'.›

³¹ Ala atén una bawaán, atén a múk hhó', slám sleeme a tsee/aruuseerooká.

³² Atén una bawaán, ‹Atén a hhaee, dír baabuúrene atén daaqaywo a mibaá nee tsár. Ala oo wák i kaahh, nee hhiyaarén kudá' niiná i amór baabií dirii' laarí baraá yaamaá Kana'ani.›

³³ Heedaáduú geeraharusmoó yaamuudá' tina báy, ‹Ar gawaá loohirihe daqaní nu tsaáhh adór kuungá' tar múk looeema, hhiyaahúng oo wák diirí geexawaare', balangwhúng huwaak as marayhúng iwa qwariitiya'.

³⁴ Hhiyaahúng kudá' niiná huwaare'. Daqaní án kuungá' nu tsaáhh adór tar tsee/aruuseerooká, ala a múk looeema. Daqaní hhiyaahúng ngu ki/ís. Kuungá' daqaní halaanu'uuma kari tlehhá' baraá yaamuká' wa ale.› »

³⁵ Naxés mayshuuín kiwa ku'uús, laatí peésár umuúqo heewo i baraá mayshoorós. Ala peésar'ín ngiwa ariyé', inooín nee baabuúine tari da'ayuút.

³⁶ Baabuúín Yakobo giri báy, «na/iieé' iga hingesé' dir'eene. Yosefu i kaahh, tam Simeon i kaahh. Nee Benyamini u sla'á' kuwa ar tleera'. Kaangwí sleémeero án kilooeé' in slahh'eemiis.»

³⁷ Reubeni baabuúwós guri báy, «Daaqay'eé' oo tsár tsu/eegáy barnaxes aníng ngwa dirógí ki/isiiká. Qwaláng, dabaaeéní qaasang, aníng ngu saxareemár ki/ís dirógí alé.»

³⁸ Yakobo iri oó', «Garmaaeé' nee kuungá' a al/eta'aaká. Asma daa'awmoowós ina gwaá', inós kilós ina meét. Aníng a aakoó al/awtantá koóm. Loohiro bar gitsee/aá tlaakwá' ngaa sláy, gám daqaní aníng iga gasé' ar gurhaami baraá diimay'eene.»