IIMU/UUNGW 41 - Biblía Axweesantá Hhohho' ar Mungú 2004

Tlataá Farao

¹ Alaá kureeraá tsár niwa waarahhiyé', Farao ina tlatiitín. Qaytsiít, kwaáo' kwaáo' aa sihhiít dír afaá yaaér ta bay Nili.

² Naxés hikwaá faanqw awa hhohho', awa wahhaará', nina baraá yaaér wa ti'iitiyé', gitso ngiri /ayiyé'.

³ Nee naxés, hikwaá hatlá' awa faanqw nina aluuín wa waatlayé', ki slasla/aren, awa kangaa/a, naa sihhiitiyé' dír afaá yaaér Nili, bihhaá kudaá geera.

⁴ Naagáy hikwaadaádá' tlakw awa kangaa/a, kudá' hhohho' awa wahhaará' ngiri /ayiyé'. Farao iri adoodí daarkiít.

⁵ Iwa qatií kií/, iri malé tlatiitín sagaáwa tsare. Qaytsiít, kwaáo /ar/aantár faanqw ar uren, ar hhohho' naa baraá hhaanslír wák wa ti'ít.

⁶ Nee /ar/aantár faanqw ar niqiqilen ar taa kahaás nee fur'ár da/aá daahh, nina alaá tidá' hhohhó' wa ti'ít.

⁷ Naagáy /ar/aantaadá' tlakw faanqw, tidá' hhohho' faanqw uren gari /ák. Farao iwa daarkiít, naxés gaa a tlata.

⁸ Tam matlaatleero looa niwa tleér, muunaáwós i ló'wa gurhaamuut. Muu guna ya/aáw as qwaslaare sleémeero nee mukdá' sageelooén oo baraá yaamaá Misri kiwa ateeti. Mukdá' niwa hardáh, Farao tlataawós giri alki/iít. Ala heé tlataawós waagweeraro gaa aleeslay i kaahh.

⁹ Geeraharusmoó úr oo muruú wahángw tlehhiít Farao guri báy, «Dakuúsar'eé' aga insláw laarí.

¹⁰ Qoomaadá' kuúng atén tiwa i búhh, aníng nee geeraharusmoodá' úr oo múk mikaátér tlehhaahhiít tina tsegiít baraá doó geeraharusmoó úr oo askaárír waawutmoó xuum.

¹¹ Xweerakari wake ana tlatiitimaán, aníng nee inós, umuú heewo nee tlataawós.

¹² Garmoó wák oo tlahhoó Ebrania, sagadiyusmoó geeraharusmoó úr oo askaárír waawutmoó xuum, nee atén tina altsegiít. Atén kuwa tlataaréní alki/iitaán, inós tlataarén ngina waagweér, umuú heewo ar adór tlataawós i dirii'iya'.

¹³ Naxés adoodá' ngira waagweér, nina adoodár tleehharuutiyé', aníng tina ki/ís baraá gadiyer'eéní ale, nee kudá' úr oo múk mikaátér tlehhaahhiít, kuri tarereé'.»

¹⁴ Farao muu guri ya/aáw, Yosefu kuwa ateeti. Kunguri gaanslár huúw baraá doó tseegmór wa alé. Alaá daamoó ngiwa deéqw, nee tlabaawós ngiwa warqeés, iri dáh amór Farao.

¹⁵ Farao iri oó' dír Yosefu, «Aníng ana tlatiitiím, ala heé tlataaeé' waagweeraro gaa aleeslay i kaahh. Aníng kangók ugwa axaás, kuúng bar tlataá hee iga axás, i aleesleér waagweeraro.»

¹⁶ Yosefu iri oó' dír Farao, «Aníng aleesleemu u koomaaká, ala Mungú inósuú kilá' tlataawók ngi waagweer ar adór wayduú huuw.»

¹⁷ Farao Yosefu guri báy, «Aníng ana tlatiitiím, kwaáo' ana sihhiít afaá yaaér Nili.

¹⁸ Qaytsiít, kwaáo' hikwaá faanqw naa baraá yaaér wa ti'iitiyé', hikwaá hho' awa wahhaará', i gitsór /ayiyá'.

¹⁹ Naxés kwaáo' hikwaá faanqw awa hatlá' nina aluuín wa ti'iitiyé' ki daqeetlakwen, slasla/aren nee a kangaa/a. Baraá yaamaá Misri sleémeero hikwaá adór kuká' iga baloó ariiká.

²⁰ Nee hikwaadá' kangaa/a, kudá' slaqo tlakwen, slasla/aren, kudá' wahhaará' ngiri /ayiyé'.

²¹ Ala hikwaadá' wahhaará' kiwa hhe'eés /aymaaro, heé gaa tsaahh i kaahh, adór kudá' wahhaará' ngira /ayiyé', asma gár aa warqeer i káhh, aqo adoodár geera ngina koné'. Ala aníng niri adoodí daarkiít.

²² Aluuwo niri malé tlatiitiím, kwaáo' /ar/aantár faanqw naa baraá hhaanslír wák wa ti'ít, ka hhohho', i /uuruú koón.

²³ Nee kwaáo' /ar/aantár faanqw ar hatlá' niri ti'ít ar niqiqilen, daqeetlakw, ar taa kahaás nee fur'ár da/aá daahh.

²⁴ Nee qaytsiít, /ar/aantaadá' daqeetlakw tidá' hhohho' gari /ák. Aníng qwaslaare ngari kaangwí báw, ala hee i kaahh oo gídaabárós ngaa oo'.»

²⁵ Yosefu Farao guri báy, «Tlataawók tsaraawo gár i kaahiya' a wak. Mungú gár i tleehhi deeloorí tseewe, ngaa kuúngí laqán.

²⁶ Hikwaadá' faanqw hho' a kureeraá faanqw, nee /ar/aantaadá' faanqw hhohho' a kureeraá faanqw. Gídaabár tlataaká' a wak.

²⁷ Hikwaadá' slasla/aren, kangaa/a faanqw naa aluú wa ti'iitiye', nee /ar/aantaadá' faanqw daqeetlakw, gár koomaaká, tidá' ta kahaás nee fur'ár da/aá daahh, gídaabár'ín an kureeraá faanqw awa qwari.

²⁸ Adoorí an adór naa kuúng báw, Farao, Mungú gár deeloorí tseewe i tleehhi, ngaa kuúngí laqán.

²⁹ Ga/aaweek, kureeraá faanqw awa axma ni hardihiyá' baraá yaamaá Misri sleémeero.

³⁰ Naagáy kureeraá faanqw awa qwari ni aluudá' dahhiyá', axmuudá' iri gunqaaruut baraá yaamaá Misriro, qwarkwí yaamu gay narkúy.

³¹ Tam axmuudá' iri xu'utitiiká baraá yaamuwo, as qwarkuú aluudá' wa hardáh, asma i ló' wa /uuruú kón.

³² Gár tlataawók tas sagaáwa tsár, a /aymuuwí Mungú nguna geehhoeés, nee Mungú gu boo/ees ar gaanslaay.

³³ «Ala daxta hee tsawaareek oo fuqurángw koóm, nee oo sagaloó', ku uráy hanís yaamu sleémeero awa Misri as ngiwa ga/áy.

³⁴ Sageesihhtuuse sleeme tsawaareek, ka ádbeér, baraá bohhaá kooane boohhár wák ka burumburi baraá bu'uungw sleémeero oo yaamaá Misri, baraá kureeriiká' faanqw awa axmuuwo.

³⁵ Sageesihhtuuseerí ádbaweek balaangw kuwa burumbuuri baraá kureeriiká' faanqw awa hardahá' awa axmuuwo. Balaangwí ku qaasi baraá kuuntáy, ala masók ibaraá baalirógí dirii'i, kuúng Farao, as tawa muruú /aymár múk gixsadu sleémeero nee sageesihhtuuse ngu amohhe'eemis.

³⁶ Muruú /aymaarí an gár yaamu gi /iis kureeridá' faanqw awa qwari hardaha'a baraá yaamaá Misriro, as muu qwari munguwa tsuú/.»

Yosefu kuwa ga/aawusmoó wa qaás

³⁷ Farao nee sagadiyuuseerós sleémeero axweesantadá' kari ya/án.

³⁸ Farao sagadiyuuseerós gari yaahaás, gari báy, «Heé adór kwí oo qeeruú Munguú koóm baraawose dír kuy awaan a diimá?»

³⁹ Farao Yosefu guri báy, «As Mungú tí ngiwa kuúngí xu'utís, heé hatlá' oo adór kuúng oo aleesleemuú koóm nee xu'uti, i kaahh.

⁴⁰ Kuúng a heé úr oo dooeé', nee an heé yaamueé' ngi geerahaár, nee muk'eé' sleémeero un sawaawuti'iín. Án kilooeé' tin úr diroge, asma niwa iwiít gawaá kitángw waawuti'iima.»

⁴¹ Farao Yosefu guri báy, «Qaytsiít, aníng kuúng una tsawaár tawa ga/aawusmoó yaamaá Misri sleémeero.»

⁴² Farao mungaywós kudá' gooirós koóm, guri duúx, guri dákw Yosefu i dahaás, kuri tlabaá taa tleéhh ar kitaánír hhohhó' i dahaás, nee himtuú sahaábu guri gawaá istá Yosefúí dahaás.

⁴³ Guri tsa/aás gawaá gaárirós tidár tsár i kon, tidá' ta uuruxun nee faraási. Nee xuumuuse iri geeraá Yosefu wa hi'ít, i tseeamín, i kat, «Tumbarara'até' dír geeraawós.» Yosefu kuri ga/aawusmoó úr wa qaás oo yaamu sleémeero awa Misri.

⁴⁴ Farao iri oó' dír Yosefu, «Aníng a Farao, án a kah, bar ya/aámarók i káhh, hee tumu wák baraá yaamaá Misri sleémeero dakós munguwa tleés, laqaá yaae mingiwa surkuús.»

⁴⁵ Farao umuú hatlá' oo Yosefu oo ayaá Misri guri tsaát, kuri báy Safenat-panea. Yosefu guri duuxutís ar dasír Potifera ar ta bay Asenati. Potiferawí a kaahamusoó gixsár Oni. Yosefu yaamaá Misri sleémeero giri alhi'iimiít.

⁴⁶ Yosefu a heé kureeri mibeeri tám qoomár waawutmo Farao oo Misri sagadiyeede nguwa iimu/ún. Yosefu ina baraá doó waawutmo Farao wa ti'iít, yaamaá Misri sleémeero giri alhi'iimiít.

⁴⁷ Ala baraá kureeridá' faanqw awa axmuuwo balaangw ina ló'wa hamaár.

⁴⁸ Yosefu muruú /ayma sleémeero oo kureeridá' faanqw awa axma baraá yaamaá Misriro guna burumbuúr baraá gixsadu. Umuúqo gixsaro Yosefu balaangw guna burumbuúr oo baraá qamuudá' tsewen bihhaá gixsaro.

⁴⁹ Yosefu balángw yaariír adór hhasángw afaá tlawi guna burumbuúr, ku yaariír ló' wa alé, tam qoomeemesuwo guri máy, asma qoomeemesuwo i ya/anaká as kuwa yaariír.

⁵⁰ Dír kureeraá qwari niwa hardihi'iiká, Yosefu kuna daaqoó tsár i xwaylúy nee hareerós tidá' ta bay Asenati, dasír Potifera. Potifera an kaahamusmoó gixsár Oni.

⁵¹ Na/oó baris kuwa xwaylúy, guna umií tsaát, guri báy Manase. Asma ina oó', «Mungú slahh'amaayer'eé' sleémeerowo iga gunqartís, nee doó baabuúeé' sleémeerowo.»

⁵² Oo tsár umuuwós kuri báy Efraimu, gídaabárós: «Mungú na/ii ngaa haniís baraá yaamaá slahh'eemisuueé' wa ale.»

⁵³ Kureeraá faanqw awa axma niri faakiyé' baraá yaamaá Misriro.

⁵⁴ Kureeraá faanqw awa qwari niri hardihiyé', ar adoodá' Yosefu ngira geerií oó'. Giyeé niri tleér baraá yaamu sleémeero, ala baraá yaamaá Misriro muruú /ayma i deer.

⁵⁵ Múk Misri sleémeero qwari nguwa ariyé', Farao kuri i /aa/amín, as muruú /ayma nguwa haniisi. Farao múk Misri guri báy, «Tlawsé' amór Yosefu, tidá' nu bay tleehhaak.»

⁵⁶ Giyeé niri tleér baraá yaamu sleémeero. Yosefu kuuntáy sleémeero guri kiís, balaangw guri weermiís dír múk Misri. Yaamaá Misri sleémeero qwari iri tsimamiíhh.

⁵⁷ Múk yaamu sleémeero tindiri hardáh Misri, dír Yosefu, as balaangw kuwa tlaxwi, asma giyeé xoordu sleémeero gaa altsimaamíhh.