IIMU/UUNGW 40 - Biblía Axweesantá Hhohho' ar Mungú 2004

Tlataá múk taa tsegiít

¹ Alaá kaangwihe qoomaadae mukko tsár i deer. Oo wák a heé úr oo muruú wahángw waawutmoó yaamaá Misri, oo tsár a heé úr oo múk mikaátér waawutmo ga tlehhaahhiít. Kuká' aakooín nguna sadakuusiyé'.

² Farao ina ló' wa buúhh gawaá sagadiyuuseedá' tsare, heé úr oo wahángw waawutmo, nee heé úr oo mukdá' mikaátér tlehhaahhiít.

³ Inooín tsaraawo gina dahaás baraá doó tseegmo, kuduú baraá doó xuumusmoodá' úr, didá' Yosefu kway tseék sleeme.

⁴ Heé úr oo askaári mukdá' guri didár Yosefu i qaás. Yosefu inooín giri sagadiyuús, nee inooín tana hoót didá' wa alé deelór hhaawaakahe baraá doó tseegmuú wa alé.

⁵ Looarka wake xweeraawo heedaádá' úr oo muruú wahángw waawutmo, nee kudá' úr oo múk mikaátér tlehhaahhiít, ar waawutmoó Misri, tana tlatiitín, umuú heewo tlataawós, tlataá gídaabár dimbadimbé.

⁶ Yosefu gina i hardáh matlaatleero, ngiwa ár naxés inooín i ló' wa gurhaamutiyá'.

⁷ Inós sagadiyuuseedár waawutmo Farao, tidár dinkwa nee inós baraá doó tseegmooro dír doó aakoowós, gari yaahaás, giri báy, «Kuungá' laarí gár naa eer a milá, mas gurhaamutá'?»

⁸ Kuri báy, «Laarí xweeraawo ana tlatiitimaán, ala heé gídaabárós alki/ituwo ga aleesláw i kaahh.» Yosefu giri báy, «Gadiyér tlata waagweera ar Mungúheéke? Gimsé', tlataahúng kwisingá' alki/iitare'.»

⁹ Heedá' úr oo muruú wahángw waawutmo, tlataawós giri alki/iít dír Yosefu, iri oó', «Baraá tlataaeene gár naa ár a xa'anoó sabiíbu i dír geeraaeé' i dirii'.

¹⁰ Nee gawaá sabiíbuwo haleemaá tám i dayá'. Nee haleemiidá' tamaawo nina harma/iyé', nay /ayuusiyé', nee /ayoodá' niri adaá mamaá dúx awa naa hamaariye'.

¹¹ Gawaá dakw'eene isaangír Farao a koóm, aníng mamaá sabiíbu ngiri tsoó/ baraá isaangidá'. Isaangidá' ngiri haniís dír waawutmo Farao.»

¹² Yosefu iri oó', «Gídaabárós a tí: Haleemaá tám a deelo tám.

¹³ Alaá deelo tame waawutmo Farao kuúng u gweer baraá tseegmooro, uri ki/is baraá gadiyeérók i alé, nee kuúng isaangi a dabaawós i hanís, adoodá' aáng ta tlehhahhit, tawa heé úr oo muruú wahángw waawutmo.»

¹⁴ Yosefu iri oó', «Na'ás, aníng inslawáng bar kuúng taa gweér, nee án alee/iisáng. Án kuúng u firiím, kangw'eé' ooeek dír Faraowo, as kahhó' án niwa ti'iit baraá do'wihe.

¹⁵ Asma ar ló', án tina fiís baraá yaamaá múk Ebrania wa alé, slám baraá yaamukae gár tlaakw ar naa tleéhh i káhh, ar tiwa dahaasi baraá doó tseegmoórí ale.»

¹⁶ Heedá' úr oo múk mikaátér tlehhaahhiít ngiwa ár adór alki/ituudá' kur hhó', Yosefu guri báy, «Án sleeme baraá tlataaeene gár naa ár a katatoó tám oo mikaátér koóm, i gawaá sagw'eé' i dirii'.

¹⁷ Nee baraá katatidár gawa, muruú /aymár waawutmo Farao i baraadí dirii'. Nee tsir/o muruú /aymaadá' guna /ák.»

¹⁸ Yosefu iri oó', «Gídaabárós a tí: Katatoó tám a deelo tám.

¹⁹ Alaá deelo tame Farao sagók gu tsaat, nee slaqwtók kari tareree' gawaá xa'ano, nee gwares fu'unaywók giri /aay.»

²⁰ Bál tám iwa xeér, slám baalaarí a deelór ur ar waawutmo Farao kuwa laqwaál, waawutmo Farao sagadiyuuseerós sleémeero gari deelór qwal/uú úr i tleéhh. Nee sagadiyuuseedá' tsaraawo gari dír geeraawósií ateét.

²¹ Heé úr oo muruú wahángw waawutmo guri ki/ís baraá gadiyeérós i alé, nee inós isaangír Farao gari haniís gawaá dakós i alé.

²² Ala heedá' úr oo múk mikaáte ga tlehhaahhiít kuna tarereé', adoodá' Yosefu ngira alki/iít.

²³ Ala tam adoorihe heedá' úr oo muruú wahángw waawutmo Yosefu gwa inslayká, guna gunqareés.