IIMU/UUNGW 38 - Biblía Axweesantá Hhohho' ar Mungú 2004

Yuda nee Tamari

¹ Qoomaadae Yuda iri tláy dír hhaeewós wa alé, iri hardáh dír heeko oo baraá gixsár Adulami, umuuwós a Hira.

² Didaádae Yuda dasír Shua, heé yaamaá Kana'ani ngiwa ár, gana slaá' gari duúx.

³ Inós tsiihaay guri sleér, garma guri xwayluúr, Yuda umuuwós guri báy Eri.

⁴ Iri malé tsít, garma guri xwayluúr, umuuwós guri beér Onani.

⁵ Iri kumít xwaylaro, na/oó hatlá' guri xwayluúr, umuuwós guri beér Shela. Qoomár na/aywí nguwa xwayluúr, Yuda i baraá Kesibu.

⁶ Yuda garmaawós oo baris Eri guri harér i sláy, umuú hare a Tamari.

⁷ Ala Eri, na/ayduú baris oo Yuda, iri tlakúy dír ilaá AAKOÓ MUNGUHE, kway gaás nee AAKOÓ MUNGÚ.

⁸ Yuda Onani guri báy, «Harér hhiyaawók aaleek, asma i kuúng wá hariín, as doó hhiyaawók kuwa tles.»

⁹ Onani ngiwa tsaáhh adór na/iidá' i laqwaali tar koseeká, qoomár iwa hardáh dír harér hhiyaawós, adór Tamari tsiihaay nguwa otká gari tleéhh, doó hhiyaawós guri sií' tleesaro.

¹⁰ Adoodá' Onani aa tleéhh, AAKOÓ MUNGÚ guri buhhtís. Tam inós sleeme kway gaás nee AAKOÓ MUNGÚ.

¹¹ Yuda harér garmaawós tidá' ta bay Tamari gari báy, «Hoót amór doó baabuúwók wa alé, ar kwaali'iima, ay dír garmaaeé' Shela i uray.» Yuda gár adoorí ngisa oó' in kaahi, tam Shela miwa gwaá' adór hhaeewós wa alé. Naagáy Tamari iri tleér, iri hót dír doó baabuúwós wa alé.

¹² Tawa hotaatín, harér Yuda, dasír Shua, iri gwá'. Qoomár /aa/e niwa faakiyé', Yuda iri tláy amór mukko se'éngw bee/aangós tlaqaqaát, baraá yaamaá Timna. Nee heewós kudá' ta bay Hira, heé gixsár Adulami, tina koné'.

¹³ Tamari kaangwí nguwa axás adór, baabuú hhawaatuuwós ir tlatláy yaamaá Timnárií alé, i se'éngw bee/ángw tlaquú áy,

¹⁴ naagáy tlabaawós kudá' kwaali'iima gina dúx, slamaangós guri dahás, gitsee/aawós giri lú/, iri iwít dír afkú gixsarka ta bay Enaimu, dír afaá loohír Timnár kaw. Asma Tamari gaa xú' adór Shela ira uráy, slám Yuda gaa haniisiiká tawa harér Shela.

¹⁵ Yuda qoomár ngiwa ár, inose geeraawo a /ameenír tsaatuso'o, asma gitsee/aawós gaa lú/.

¹⁶ Gari i daqáy, gari báy, «Aníng a slaá' nee kiíng tawa alqaataan.» Adoorihe inós gaa xuiiká adór tar harér garmaawós. Guri yaahás guri beér, «Gár ni aníng i hanis a milá bara ya/aám?»

¹⁷ Iri oó', «Dereemír leei ngi haniís baraá aaraaeene.» Gway yaahás guri beér, «Xáy, gár ni hanis dír án deelmoosíng ngur daamaraam?»

¹⁸ Gari báy, «Gár ni haniis a milá?» Guri beér, «Mungaysíng oo gawaá diitsaarók oo layár koóm, nee himuuwo, nee hhartasíng gawaá dakók haniisang.» Naagáy muruuwí sleémeero guri haniís, inós iri ya/aán, tari alqaát. Tsiihaay gway sleér.

¹⁹ Iri tleér, slamaangós guri dúx, nee tlabaawós kudá' kwaali'iima giri dahás.

²⁰ Yuda deelmooduú leei guri ya/aáw ar mulqumoowós Hira, kuduú gixsár Adulami, as xosluuwós kudá' baldá' aa geexáy ngiwa tu/tá ay dír /ameenidae. Ala gaa didií ayká.

²¹ Hira mukduú yaamuudá' guri yaahaás, guri báy, «Tsaatuso'oodá' dír afaá loohír Enaimúr i iwawiit i amá?» Kuri báy, «/Ameenír tsaatuso'o ayaawihe i káhh.»

²² Iri amór Yuda i kií/, iri oó', «I káhh, tam múk ayaadá' sleeme i kaahi, ‹/Ameenír tsaatuso'o ayaawihe i káhh.› »

²³ Yuda iri oó', «Maweek xosluusíng ngi koon, atén mitiwa mureekeemiís nee muu. Ga/aaweek, án kuúng una ya/aáw, kawa dareemírií hup, ala inós aga didií eeriiká.»

²⁴ Alaá slahheeraá tám niwa waarahhiyé', Yuda kaangw gway axaás tawa kaahi, «Harér garmaawók Tamari aa fuqús, nee tsiihaay gwaa sleér.» Yuda iri oó', «Tsee/áy duuxaak, da/aak.»

²⁵ Kingiwa duúx, baraá doó wa alé, muu guri ya/áp amór Yuda, taatoó hhawaatuuwós, iwa kat, «Án tsiihaay dír nguwa sláw a dír heé xosluuká'.» Iri ó', «Muruusíng tsaahheek, oo heemá, mungaywí nee himuuwihe nee hhartihe.»

²⁶ Yuda muruudá' guri tsaáhh tawa kós, iri oó', «Inós i gan'amuú koón ta ak aninge, asma aníng inós aga haniisiiká dír garmaaeé' Shela.» Aluudae Yuda gaa sangw haratseewuyká malé alé.

²⁷ Naxés bál xwaylarós iwa xeér, gár baraá guruuwós a na/aá daangi.

²⁸ Qoomár xwaylaro, na/oó wák dakós ina giirín, /ameenidá' gaa asla eer, neewír daa/aat gana taatáhh, gari tsék gawaá dákw na/aay, i hara kat, «Kwí ku geerií xwaylúy.»

²⁹ Naxés qoomaadá' dakós nguwa ki/ís, hhiyaawós nay ti'iít. /Ameenidá' gaa asla eer iri ó', «Baré kuúng aga /uurúr ti'ít!» Gawaá adoorihe umuuwós kway báy Perisi.

³⁰ Hhiyaawós nay aluudá' wa ti'iít, i neewír daa/aát kón gawaá dakose. Umuuwós kway báy Sera.