IIMU/UUNGW 37 - Biblía Axweesantá Hhohho' ar Mungú 2004

Yosefu nee hhaeewós

¹ Yakobo ina kumiít hotaango baraá yaamaá Kana'anír wa alé, yaamuudá' Isaka aa hoót adór dahaaymoó wa alé.

² Adoorí an alki/ituú xwaylár Yakobo. Qoomár Yosefu kureeriiwós tawa mibaá nee faanqw, inós i bee/ángw deaaén nee hhaeewós. Yosefu tawa masoomoó kureeraá mibaá nee faanqw nin aldeaená' nee daaqoó Bilha nee Silpa, tlaawoó baabuúwós. Yosefu muruudá' tlákw hhaeewós i axweemaamisiya' nee i tlehhaahhitiya', gun dír baabuúwósí alki/a/iit.

³ Yakobo Yosefu guna guruú i baá/ ta daaqaywósuú hatlá' sleémeerowo. Asma Yosefu a na/oó aa baraá diimaywós wa sláy. Guri hiyoó hhoohhoó' i tleéhh.

⁴ Hhaeewós ngiwa tsaahhiyé' adór Yosefu kur ló' wa slai nee baabá ta inooine, Yosefu kuri ló' wa aáhh, tay sangw waydúr hootiiká.

⁵ Looarka wake Yosefu ina tlatiitín. Tlataawós ngiwa alki/iít, hhaeewós nguri ak aahhiyé'.

⁶ Yosefu hhaeewós gina báy, «Na'asé', tlataaeé' iiárií qaasaak. Gár naa tlatiitiím a tí,

⁷ ‹Aníng nee kuungá' bareemák a ileeraá hhaanslaá tsegiitaán baraá qaymór wa alé. Ilangw'eé' ina sihhiít, nee ileerihúng ilangw'eé' nguna harweeriyé', nari xupuuiyé' dír ilangw'eé'.› »

⁸ Hhaeewós nguri bayé', «Xáy, kuúng tin sa waawuti'iínda? Kuúng tin bála?» Kuri ló' wa aáhh as tlataawós nee axweesantós.

⁹ Ina male tlatiitín, hhaeewós giri báy, «Iia qaasaak, tlataá hatlá' iga malé tlatiitiím. Looa nee slahhaangw nee tsatse/uú mibaá nee wak aníng ina i xupuuiyé'.»

¹⁰ Baabuúwós nee hhaeewós ngiwa ádbáy, baabá guri iigahhaát, guri báy, «Tlataaká' a gaalá laá taa tlatiitiín? Xáy, án nee aayiírók nee hhaeewók unqo i xupuuána ay yaamu?»

¹¹ Hhaeewós gur'e giri ohiín, ala baabuúwós muruuwí sleémeero guri baraá muunaáwós i qaás, as nguwa aldakwi.

Weeriisár Yosefu

¹² Looarka wake hha'aá Yosefu bee/ángw baabuúín nguna de'éngw ayé' iisaapoó yaamaá Shekemií alé.

¹³ Yakobo Yosefu guri báy, «Xáy, hhaeewók naa bee/ángw de'éngw áy'iíke baraá yaamaá Shekemu i alé? Qwaláng, án kuúng u ya/aáw amor'ín i alé.» Yosefu iri oó', «Kahhoo', aníng a deer.»

¹⁴ Guri báy, «Tláw, saayuú hhaeewók leehhang, xáy, ki amohhoóe, nee bee/aangw sleeme ku amohhoóe? Saayuúsíng ngu húp.» Baabuúwós guri ya/aáw iimír baraá xatstá Hebronír wa alé, iri hardáh yaamaá Shekemu.

¹⁵ Heeko wák Yosefu guna baraá xatstií áy, i baraadá' wa harweeriirín. Heedaádá' guri báy, «Gár ta leeleehhit a milá?»

¹⁶ Yosefu iri oó', «Hhaee'eé' in leelehhiít. Na'ás, dír iwa de'ena' ooang.»

¹⁷ Heedaádá' iri oó', «Hám nina sangw diirí wa tlayé', ta kaahi, ‹A tleesaán ay baraá gixsár Dotani.› » Yosefu hhaeewós giri eehár, giri baraá gixsár Dotanír i áy.

¹⁸ Hhaeewós nguri amorqá' saáwí ariyé'. Inós qoomár iwa hardihiiká amor'ín i alé, tana kilooín axweés as kuwa gaasi.

¹⁹ Ta axwees kilooín ale, ta kaahi, «Aakooduú tlata hanoos naa hardáh.

²⁰ Gimsé', u gaasaán, kuri kwahhaán baraá hhalángw wák diirihe. Daqaní tari ooaan makiito'ór sla/a gwaa /ák. Xáy, daqaní a araán tlataawós kudá' aa tlatiitín adór i laqiya'.»

²¹ Reubeni adoodá' ngiwa axaás, guna slaá' nguwa ba/amiisi gawaá dabaaín wa alé, iri oó', «Aasla'áy, muwa gaasaán, na'asé'.»

²² Reubeni gina báy, «Tseere ma ku'uusara', ala kwahhaak baraá hhalaangwí oo baraá darmuuwí dirií'. Ala mu gaasara'.» Reubeni gár adoorí ngisa oó', a gun tu/utá wa slaa' baraá dabaaín wá alé, as nguwa ki/isi amór baabuúwós.

²³ Ala Yosefu iwa hardáh dír hhaeewós i alé, hiyaywós kudá' hhoohhoó' aa tsiít nguna hayohiyé'.

²⁴ Nguna oohiyé', ngway kwahhiyé' baraá hhalángw kaahaár, oo ma'aá koomaaká.

²⁵ Tari iwiít as tawa /ayin. Naxés tawa qaytsiít, múk Ishmaeli kuna ár oo aauuse, naa hardáh, ta yaamaá Gileadír daahh. Inooín a múk halaanu'uumár tleéhh. I angamíar'ín koná'. Nee muruuín kudá' ta weerimiisi angamía gun loohís. Gár i kona' a moqoonjó nee garka mooyángw tsuú' koom qoomár barka daá/, nee mooyangwko ta babay manemane, kun yaamaá Misrír i huuw.

²⁶ Yuda hhaeewós giri báy, «Gár tiwa bu' a milá hhiyaarén bura gaasaán, nee atén tari múk fadaá koóm?

²⁷ Gimsé', un weerisaán dír múk Ishmaeli, dabaarén miwa tlakweemisaán, bareemák inós a hhiyaarén. Inós nee atén tseere a wak.» Hhaeewós nay ya/ané'.

²⁸ Muko oo yaamaá Midiani oo múk tlaxuúm iwa waaraahhi, Yosefu kuri duúx baraá hhalaango, kuri weeriís dír múk Ishmaeli, ar shekeéli mibeeraá tsár. Inooín Yosefu kuri huúw ay yaamaá Misri.

²⁹ Reubeni iwa kií/ amór hhalaangw, laatí Yosefu i kaahh baraá hhalaango. Inós tlabaawós giri feehhamiís as gurhaami.

³⁰ Iri kií/ amór hhaeewós, iri oó', «Garma i kaahh, án hám adór ni laaq a idoomá?»

³¹ Naagáy inooín deelmo nguri gaasiyé', hiyayduú Yosefu kuri baraá tseeredí luhhuús.

³² Hiyayduú tseerér koóm kuri huúw amór do' as kuwa laqaamár ay amór baabuúwós, kuwa bay, «Hiyaywí ngwa sleesaán. Áx xuuxueek, a hiyoó garmaawóge, laqaá adoomá?»

³³ Baabuúín hiyaydá' guri tsaáhh, iri oó', «A hiyoó garmaaeé'. Garmaaeé' makiito'ór xaraasl gwaa /ák, ar ló', Yosefu kwaa feehhamiís.»

³⁴ Yakobo tlabaawós giri feehhamiís, guniyadu giri tsiít, iri tsuunqumiís, garmaawós kudá' guri al/aa/amín deelór yaariire.

³⁵ Na/iiwós awa daaqaay nee awa dasu baabuúín nguri i daqayé' kuwa gurkwa/amisi. Ala Yakobo gurkwa/asa gari sií' iri oó', «Án garmaaeé' u baloó gunqareesaaká tam ay baraá gi'i.» Gawaá adoorihe Yakobo garmaawós guri al/aa/amaamín.

³⁶ Ala mukduú yaamaá Midiani oo Yosefu gwaa tlaaxw kuna weeriís baraá yaamaá Misri, kuri tlaáxw nee heeko ta babay Potifa. Inós a geeraharusmoó úr oo askaárír Farao, waawutmoó yaamaá Misri.