IIMU/UUNGW 35 - Biblía Axweesantá Hhohho' ar Mungú 2004

Yakobo kuwa tsuúq

¹ Munguú Yakobo guri báy, «Tláw, tsa/ám ay yaamaá Beteli, ta amoodá' wa hót. Nee amoodaádae aníng ir kitángw ilahhooárí tléhh. Aníng a Mungú kudá' ugwa i ti'iit qoomár Esau hhiyaawók kuwa ilaagóp.»

² Yakobo múk do'ós sleémeero nee kudá' nee inós alhootá' giri báy, «Munguiidá' ta koonda' hingeesaak, ti hheehhe'ese', nee tlabaahúng warqesaagáy.

³ A tlawaán a tsa/amán amór Beteli, aníng Mungú nguri kitángw ilahhooár tleéhh, inósuudá' aníng iga axaas, qoomár slahh'amaayer'eene, nee tari dinkwa nee aníng baraá loohi sleémeero ar naa oohi.»

⁴ Inooín munguiidá' ta haratlintaati'i ngiri Yakobo i haniisiyé'. Nee saaqaanduú baraá iaaín i diriia, Yakobo giri tiíp dír gamuú ti'ita, iisaapoó gixsár Shekemu.

⁵ Yakobo nee daaqaywós qoomár niwa aa'aá kaya', Mungú yaamuloouuse nee inslaaway'ine giri dae tsaát, tari qiitliiká daaqoó Yakobo eeharto.

⁶ Naagáy Yakobo iri hardáh Lusu, gixsadá' ta bay Beteli, tidár baraá yaamaá Kana'ani, inós nee mukdá' sleémeero ti al koomá'.

⁷ Kitángw ilahhooa guri tleéhh. Didaádá' gari báy El-beteli. Asma an didá' Mungú nguwa i ti'iít, qoomár iwa goów as hhiyaawós.

⁸ Debora, alee/isuso'ór Rebeka, iri kahhút, kari foól dír gamuú ti'ita, baraá Beteli. Ti'itudá' kuri báy Alon-bakuti.

⁹ Munguú Yakobo guri malé i ti'iít, qoomár niwa kií/ baraá Padan-aramu wa ale, guri tsuúq.

¹⁰ Mungú guri báy, «Umuuwók a Yakobo, ala tu malé bayká Yakobo, ala daxta umuuwók an Israeli.» Guri ateét «Israeli.»

¹¹ Mungú guri báy, «Aníng an Munguú duú Aleesleemusmoó mura' sleémeero, kumiít tawa doogiin. Xoordaá yaariir nin baraawók wa ti'iitiyá', nee waawitá sleeme.

¹² Yaamuká' naa Abrahamu nee Isaka i haniís, ngi kuúng i haniís sleeme, tawa kók nee xwayladá' ta aluuwók wa laqwaali.»

¹³ Mungú iri tláy gáwtí alé didiíwa axweés nee Yakobo.

¹⁴ Yakobo uhumoó tlaa/e guri sihhtís didá' nee Mungú tawa axweés, di/i gari gawaadá' i tsiririxiís, nee muruú wahaangw, as ilahhooa ngiwa haniisi dír Mungú.

¹⁵ Yakobo didá' gari báy Beteli, didá' Mungú iwa axweés nee inós.

Gwa'arár Raheli

¹⁶ Yakobo nee mukós tari kumiít aaiiwo dír Betelí wa alé. Tawa nakaá/ Efrataro, Raheli asltá xwayla gana iimu/uún ar /uuru.

¹⁷ Qoomár asltadá' ngiwa slahh'és, alee/isuso'oodá' gari beér. «Ma da'ayumiitaar, asma garma u malé xwayluúr.»

¹⁸ Qoomár iwa tsatmit (asma xwayla gana gás), na/aydá' guri umií tsát, guri beér Ben-oni, ala baabuúwós guri báy Benyamini.

¹⁹ Raheli iri kahhút, kari foól bihhaá loohír Efrata kaw, an Betilehemu.

²⁰ Yakobo uhmoó inslaslaangw guri sihhtís gawaá /aantárí alé, an uhmoó gawaá /aantár Raheli ay laarí.

²¹ Israeli iri kumiít aaiiwo, iri heémarós kikií' dír tsitsinír Ederi ngiwa waaraáhh.

Daaqoó Yakobo

²² Qoomár Israeli iwa hoót baraá yaamuudá' wa alé, Reubeni nee Bilha, /ameenír hatlá' ar baabuúwós, tari alqaát. Israeli kangwdá' guri axaás. Daaqoó Yakobo a mibaá nee tsár.

²³ Daaqoó Lea an Reubeni, na/oó baris oo Yakobo, nee Simeon, nee Laáwi, nee Yuda, nee Isakari nee Sebuluni.

²⁴ Daaqoó Raheli an Yosefu nee Benyamini.

²⁵ Daaqoó Bilha, sagadiyuso'ór Raheli an Dani nee Naftali.

²⁶ Daaqoó Silpa, sagadiyuso'ór Lea an Gadi nee Asheri. Kuká' an daaqoó Yakobo kudá' aa laqwaál baraá Padan-aramu wa alé.

Gwa'arár Isaka

²⁷ Yakobo iri hardáh amór baabuúwós Isaka, baraá yaamaá Mamre, gixsár Kiriat-arba, tida' ta bay Hebroni, iri amoodá' wa hoót, yaamuudá' Abrahamu nee Isaka naa hootiyé' ar dah'iima.

²⁸ Kureeraá Isaka aa hoót a tsiiru nee mibeeri dakaát.

²⁹ Isaka a aakoó aa uray, diimay gway daáhh, kuri foól nee daaqaywós Esau nee Yakobo.