IIMU/UUNGW 34 - Biblía Axweesantá Hhohho' ar Mungú 2004

Dasu'uumár Dina kawa hhitín

¹ Looarka wake Dina dasír Lea, tidá' Lea aa xwayluúr dír Yakobo, ina ti'ít as /ameenár yaamuudá' ngiwa taaqwesár eer.

² Shekemu garmoó Hamori, oo múk Hifi, heé úr oo yaamuudá', Dina ngiwa ár, gari óh ar /uuru, tari alqaát nee inós, gari dasu'uuma hhitín.

³ Muunaáwós dasiirír Yakobo gari ló' wa slaá'. Dasiirí gari i axweés ar axweesantá hho'.

⁴ Shekemu baabuúwós guri báy, «Dasirqá' aníng wa lehhiitang.»

⁵ Yakobo gari axaás adór dasiirós Dina kara dasu'uuma hhitín. Nee daaqaywós i baraá darmií dirii', ta muruuín de'én. Yakobo iri xasliít daaqaay ngar wa waátl.

⁶ Hamori baabuú Shekemu iri tláy as nee Yakobo tawa axweesi.

⁷ Qoomaadár kilae daaqoó Yakobo nina baraá de'éngw wa waátl. Kaangwí nguwa axaasiyé', tana ló'wa gurhamuút, tana buúhh, asma gaarí ka alsi'ím dír múk Israeliwo ar dasír Yakobo kawa /uurúr óh, kari dasu'uuma hhitín. Asma gaarí a gár ta waki ló' wa ale.

⁸ Hamori iri axweés nee inooín giri báy, «Garmaaeé' Shekemu dasirhúng gaa waatlakweés. Na'asé', haniisare' ngi duuxi.

⁹ Ti dasu duxuutaán, dasuuhúng haniisare' aténí alé, kuungá' dasuurén duxuutaak.

¹⁰ Kuungá' nee atén ta alhootaán, nee yaamuká' a koohúng, hooté', halaanu'uuma tlehhiitaak baraaká' wa alé, nee daqaari'iité'.»

¹¹ Shekemu baabuú Dina nee hhaeewós giri báy, «Án ya/aamaré', umuúqo gár ni oa'a aníng ngi haniís.

¹² Tam gwada doogaak, nee qeemuuwo ngi haniís ar adoodá' ngira oé', ala masók dasiirí ngi hanisá' án ngiwa duux.»

¹³ Daaqoó Yakobo, Shekemu nee baabuúwós Hamori nguna al/ayiyé', asma hho'or'ín Dina kana dasu'uuma hhitín.

¹⁴ Tari oó', «Adoosíng ngi tleehhanaaká hho'oorén ngiwa hanisaan, dír heé taa hheehhe'eesiiká. Adoosíng bara tleehhaán, a alsi'imu direne.

¹⁵ Atén nee kuungá' birti kaahi slawaán, a hhawaataá ayaahúng kin hheehhe'eemiis adór atén wa alé.

¹⁶ Daqaní atén dasuurén ngu hanisaán, nee koohúng nguri duxuutaán, tari alhootaán, atén tari adór múk wák.

¹⁷ Ala adoorí bar ya/aanda'aaká ar kuungá' tunduwa hheehhe'eemisi, hho'oorén ar tlawaán.»

¹⁸ Hamori nee garmaawós Shekemu axweesantí ngiri ya/ané'.

¹⁹ Nee garmoó aáng adoodá' tleehhamooro taa alduuxiiká, asma kwa ló'wa sla'atís nee dasiidár Yakobo. Asma garmaadá' a heé ilaiwa/amér koóm dooine.

²⁰ Hamori nee garmaawós Shekemu tari hardáh dír afkú gixsar'ín, dír bariisér kwasleema, tari oó',

²¹ «Mukwí a múk hhó', gimsé', ni ayaarén wa hootiye', nee halaanu'uuma ngi tleehhiye' baraaká' wa alé, asma yaamu i bu'uutiyá', nee ti dasu duxuutané'.

²² Ala ar dakwí wák kilose ti kaahi slawaané' tawa ayaarén wa hooti sleémeero, tawa múk wák oo taa hheehhe'eemiís umuúqo hhawaatuuwo adór inooín wa alé.

²³ Xáy, bee/angw'ín nee daqaari'iimar'ín nee makay'ín sleémeero a kooréneéke? Gimsé', ti kaahi slawaané', inooín ta ayaarén wa hooti.»

²⁴ Hhawaataá baraá gixsadá' sleémeero tiri axweesani slayé' nee Hamori nee Shekemu. Umuúqo hhawaatuuwo baraá gixsadae kuri hheehhe'eés.

²⁵ Naagáy bál tame tawa slahhaai tiqtiro, daaqoó tsár oo Yakobo, Simeon nee Laáwi hha'aá Dina, umuú heewo paángarós gana taataáhh, gixsa kari i hardáh ar migi, hhawaate sleémeero kiri baraá tiqtidí áy, kiri tsuú/.

²⁶ Hamori nee garmaawós Shekemu kiri tsuú/ ar paánga, Dina kingari ar tláy dír doó Shekemu wá ale.

²⁷ Daaqoó Yakobo ina haraatláy, mura' sleémeero oo baraá gixsadá' kuri hayóh, asma hho'or'ín kawa dasu'uuma hhitín.

²⁸ Bee/angw'ín kuri hayóh, nee hikwaaín nee daqwaayer'ín nee múk baraá gixsar'ín, nee mura' sleémeero oo baraá xatsooín i diriia.

²⁹ Daqaari'iimar'ín sleémeero nee na/ii'ín sleémeero nee /ameenar'ín sleémeero nee muruú baraá maráy dirií', kunguri hayóh.

³⁰ Yakobo Simeon nee Laáwi giri báy, «Iga slahh'esé' iwa heé tlaákw tlehhé' baraá tla/ángw múk ayaawihe, múk Kana'ani, nee múk Perisi. Aníng muk'eé' ku niiná, birta i burumburiít, tin muux, án nee múk dooeene tiri qwaarees.»

³¹ Inooín tari oó', «An gár hhoo' xáy, hho'oorén ngiwa adór tsaatuso'o tleéhh?»