IIMU/UUNGW 33 - Biblía Axweesantá Hhohho' ar Mungú 2004

Yakobo nee Esau tiwa doogiyé'

¹ Yakobo iwa qaytsiít, Esau guri ár, iwa hi'iiti nee múk tsiire tsiyáhh. Na/iiwós giri qasmiís dír Lea nee Raheli, nee sagadiyuuser'ín tidá' tsár.

² Sagadiyuuseedá' nee na/ii'ín gina geeraaharís, Lea nee na/iiwós aluudá', Raheli nee garmaawós Yosefu tari alhhe'eesaay.

³ Inós kilós iri waaraáhh geeraaín i alé. Iwa nakaá/ geeraá hhiyaawós i alé, iri xupapuú' yaamií alé ay sagaáwa faanqw.

⁴ Naagáy Esau nari hardáh ar ti'iingw, guri hara/akuút, guri ma'aás. Inooín tsaraawo tari al/aá/.

⁵ Iri malé qaytsiít, naxés /ameena nee na/ii giri ár, iri ilawaáts, guri yaahaás, «Mukwí nee kuúng ti koomá' a ín heemá?» Inós iri oó', «A na/iidá' Mungú naa haniís dír sagadiyusmoowók ar qeemuuwós.»

⁶ Qoomaadár kilá' sagadiyuuseedá' nee na/iidá' tari saáp, tari xupuú'.

⁷ Lea nee na/iiwós tari saáp, tari xupuú'. Nee alhhe'eesaywo Yosefu nee Raheli tari saáp tari xupuú'.

⁸ Esau iri oó', «Boo/aywí nee aníng taa doogaan oo milá?» Yakobo iri oó', «Ana harahhiíf iwa ilaaot, aakooeé'.»

⁹ Ala Esau iri oó', «Hhiyaaeé', án daqaari'iimár bu'uut a koóm. Tisíng ta koon tók tiwa amohhe'eemis.»

¹⁰ Yakobo iri oó', «Aasla'áy, án kuúng bira ya/aán, na'ás, muruueé' kwí ni koom ooheek, án kuúng uwa ár a adór heé gitsee/aá Mungú gaa ar, ar adoorí aníng kuúng ira ilaaót ar gurhhooa.

¹¹ Na'ás, muruuwí ni hanmiis na ooheek, asma Mungú muruuwí ngwa aníng i haniís, slám aníng muruú bu'uút u koóm.» Guri harakeés nguwa ilaoohi, guri ilaaóh.

¹² Naagáy Esau iri oó', «Góh, a kumiitaán aaiiwo, aníng kuúng u geerahaár.»

¹³ Yakobo iri oó', «Aakooeé', kuúng a xú' adór na/ii tar qaweero, malé alé bee/aangw nee hikwa awa ni koom i du'umisiyá'. A hariím ngiwa amohhe'eemiis. Asma mura' bura harakeesaán baraá looár wák i alé, i qaatl sleémeero.

¹⁴ Daxta án kuúng u firiím, kuúng giiriím, nee aníng ni aluú wa tseegamiís ar adór hi'iitantá na/ii nee hikwa, ay dír ni amoorók i hardahaan baraá yaamaá Seiri.»

¹⁵ Esau iri oó', «Muu ngu bahh geexáw, oo kuúng u alee/iís.» Yakobo iri oó', «Gár muu i káhh, án kuúng bira sa ya/aán.»

¹⁶ Naagáy Esau iri kií/ baalaadár kilae ay Seiri.

¹⁷ Yakobo iri kumiít ay Sukoti, do' guri tleéhh nee slumo giri tleéhh as hikwaawós. Umuú didá' kuri báy Sukoti.

¹⁸ Yakobo iwa Padan-aramu wa tláy, iri hardáh ar wayda ay baraá gixsár Shekemu, tidár baraá yaamaá Kana'anírí dirii'. Xafaywós guri tleéhh bihhaá gixsadá'.

¹⁹ Didá' aa i tleehhiít gana tlaáxw dír múk Hamorír wa alé, baabuú Shekemu, ar peésár tsiiru.

²⁰ Kitángw ilahhooa guri tleéhh amoodaádá' i ale. Kitangwdá' guri umií tsaát guri báy El-Elohe-Israeli.