IIMU/UUNGW 32 - Biblía Axweesantá Hhohho' ar Mungú 2004

Yakobo nee Esau

¹ Qoomár Yakobo iwa kumiiti aaiiwose, malaykér Mungú nee inós tina doogiyé'.

² Yakobo ngiwa ár, iri oó', «Gaarí a slawtá múk Mungú.» Didá' gari báy Mahanaimu.

³ Yakobo ya/abuuse gari geerakawís amór hhiyaawós Esau, amór Seiri baraá yaamaá Edomu.

⁴ Gina hara'ayín, iwa kaahi, «Adoorí an adór aakooeé' Esau ku beera', ‹Sagadiyusmoowók Yakobo i kaahi, Aga hoót ar dahi'iima dír Labani wa ale ay hamí.

⁵ Hikwa i koóm nee daqwaayeero, muruú ququmát, nee sagadiyuusér hhawaate nee ar /ameenaaro. U ya/abtoórí ya/abiít, taataeé', a haraxuú' adór ir ilaaót.› »

⁶ Ya/abuuseedá' iri kí/ amór Yakobo, kuri báy, «Ana hardahaán amór hhiyaawók Esau, inós i loohír i dirii' as uwa ilaoohi, nee múk tsiire tsiyáhh ti koná'.»

⁷ Yakobo iri ló' wa da'ayuút iri amoqwaár. Mukdá' nee inós dinkwa guri qasiís baraá daqooroó tsár, bee/aangw nee muruú hatlá' nee angamía,

⁸ iri baraá muunaáwós i oó', «Barnaxes Esau daqtá wák gaa i hardáh nee gari hhaamiís, ala tidár hatlá' aa /uúr.»

⁹ Naagáy Yakobo Mungú guri firín iri oó', «Munguú baabuúeé' Abrahamu, Munguú baabuúeé' Isaka, AAKOÓ MUNGÚ kuúdá' án iga beer, ‹Kií/ baraá yaamuuwók nee amór mukók,› ina al'axweesántí hanís ar iwa hhooárí tlehh,

¹⁰ aníng a ló'wa hariimaaká hhooeemaadá' nee inkihhimuudá' sleémeero kuúng naa aníng i laqaandi, anuú sagadiyusmoowók. Asma yaaér Yordani ngiwa waaraáhh, gár ni koom i káhh, aqo har hhara kilós. Ala daxta a daqooroó tsár koóm.

¹¹ Án kuúng u firiím, ba/amisáng daxta baraá dabaá hhiyaaeé' Esauwo. Asma án inós u da'ayumiiít tiwa haramuki, nee sleémeero tiri tsuu/, ín aayo dinkwa nee na/iiwo.

¹² Inslaweek kuúng án ina al'axweesántí hanís ar iwa hhooárí tlehh, nee xwaylar'eé' kawa tlahhas adór hhasángw afaá tlawi, kudá' faaro ga ya/aamaaká.»

¹³ Naagáy Yakobo iri didií deél xweeraadae. Boohhár daqaari'iimarós gari paraátl tawa gár i haniisi dír Esau hhiyaawós:

¹⁴ Aaraá tsiire tsár nee gurtaawe mibeeri tsár, bee/aangw tsiire tsár, nee gwaandaawe mibeeri tsár,

¹⁵ angamíár du'umiis mibeeri tám nee na/ii'ín, hikwaá mibeeri tsiyáhh nee awe mibaangw nee daqwaayér /ameena mibeeri tsár, nee ar yaqaambe mibaangw.

¹⁶ Giri sagadiyuuseerós i saayín umuú heewo daqtós, giri báy, «Giirimé', pa/aangw ku geexeerá' tla/ángw daqa nee tiqá' baraá aaiihunge.»

¹⁷ Kudá' geerií giiriím gway báy, «Hhiyaaeé' Esau bar nee kuúng taa dogé', bir kaahi, ‹Kuúng a sagadiyusmoó heemá? Nee muruuwók kwí oo heemá?›

¹⁸ Kuúng ta o', ‹Muruuwí a daqaari'iimár sagadiyusmoowók Yakobo, nee an gár ni kuúng i haniisi, kuúng aakooeé' Esau. Yakobo inósuú kilá' i alií dirii', i lawee'.› »

¹⁹ Hara'ayaarí gana káh dír sagadiyusmoó daqtá tsár nee ar tame nee awa hatlá' sleémeerowo, i kaahi, «/Aymi'iiká' ki katá' dír Esau birta dogé' nee inós.

²⁰ Alaá tí sleémeerowo ku beera', ‹Yakobo sagadiyusmoowók i alií dirii', i lawee'.› » Yakobo adoorí gana tleéhh, ina baraá muunaáwós i oó', «Doóqa Esau muruuwí burungwa ár, muunaáwós i barií kii/. Atén birta doogaán, doóqa ila' ti ya/aná', iri ilaaoh.»

²¹ Gawaá adoorihe muruudá' guri giiriís, ala inós iri deél dír slumtadá'.

/Ootsito

²² Xweeradaá kilae Yakobo iri daarkiít, tlaawaywós tsaraawo gurir tláy, sagadiyuuseerós tsaraawo nee na/iiwós kudá' mibaá nee wak, yaae gari waaraáhh dír dahhsantá ta babay Yaboki.

²³ Yakobo mukós nee muruuwós sleémeero guri waarahhaás gayuú yaae.

²⁴ Yakobo iri kilós meét. Heeko wák nina hardáh, tina /otsatsitiyé' nee inós ay ságw looa.

²⁵ Heedaádá' ngiwa ár adór Yakobo arba/atiro ngur aleeslayká, kutl/umoó Yakobo guri kwatiít, Yakobo iri yaae han'aát.

²⁶ Heedaádá' Yakobo guri báy, «Án geemawáng ni tláw, asma iimi aa /awaakuúr.» Ala Yakobo guri báy, «U geemawaaká ay dír án i tsuq.»

²⁷ Inós gway yaahaás, «Asma kuúng a heemá?» Iri oó', «Yakobo.»

²⁸ Heedaádá' iri oó', «Kuúng tu malé bayká Yakobo, ala tun bay Israeli, asma nee Mungú tina /ootsité', nee muu sleeme, kiri arbá/.»

²⁹ Yakobo guri báy, «Na'ás, umuuwók ooang.» Ala inós iri oó', «Gár umuueé' kus yaahamis a milá?» Yakobo guri tsuúq.

³⁰ Yakobo umuú didá' guri báy Penieli, i kaahi, «Nee Mungú taa araán ila nee tí, ala aníng a slaáf.»

³¹ Yakobo Penieliro iwa waraahhi looa naa qaroó tsiiríhh, inós i soopín asma kutl/umoodá'.

³² Tam ay laarí múk Israeli fu'unaá dír kutl/umo gi /aa/ayiiká, asma didá' an dír heedaádá' aa kwatiít qoomár tiwa /ootsitiyé' nee Yakobo.