IIMU/UUNGW 31 - Biblía Axweesantá Hhohho' ar Mungú 2004

Guwoó Yakobo

¹ Yakobo qununu/oó na/aá Labani guna axaás, tawa kaahi, «Yakobo daqaari'iimár baabuúrén sleémeero gana ar tláy, taa daqaaritiís ar daqaari'iimár baabuúrén.»

² Yakobo gana tsaáhh, adór Labani inós ngur gaárí xuiiká adoodár geeraá wa alé.

³ An qoomár AAKOÓ MUNGUÚ Yakobo nguwa báy, «Kií/ baraá yaamaá taati'iiwók nee mukók, án nee kuúng a dinkwa.»

⁴ Gawaá adoorihe, Yakobo muu guri ya/aáw Raheli nee Lea kiwa ateeti, inooín nay tlayé' baraá xatsa amoodá' Yakobo iwa de'en,

⁵ giri báy, «Aníng aga tsaáhh adór baabuúhúng iwa gaárí xuiiká adór geeraá wa alé, ala Munguú baabuúeé' nee aníng a dinkwa.

⁶ Kuungá' a xuá' adór án baabuúhúng ngura sagadiyuús ar /uuruueé' sleémeero.

⁷ Slám inós aníng iga al/aáy, slaasláwar'eé' gari sagaá wa mibángw wa warqemaamiís. Ala Aakoó Mungú inós gwaa pa/ángw i haniisiiká oo aníng iwa hariiay.

⁸ Iimír qoomár iwa oó', ‹Muruú tlanqwayén an bu'utuuwók,› muruudá' sleémeero deeloó tlaanqwayén nguna laqwaaliyé', nee qoomár iwa oó', ‹Muruú meehhayén an bu'utuuwók›, muruudá' sleémeero deeloó méhh nguna laqwaaliyé'.

⁹ Adoorí an adór Mungú muruú baabuúhúng ngura amor'eéní haniís.»

¹⁰ «Qoomár muruudá' tawa tsiihaawe, aníng ana tlatiitiím, baraá tlataakae gurtaawér yaqaambe sleémeero tidá' aaraá ga/aw a gurtaawér mehh, nee ar tlaanqwayen nee ar biifayen.

¹¹ Malaykamoó Mungú nee aníng ana axweesaán ar baraá tlata. Án ina ateét, ‹Yakóbo›. Aníng niri ooiím, ‹Aníng a diirí.›

¹² Inós aníng iri báy, ‹Qaytsiít, gurtaawerqá' sleémeero ar baraá sluma ar aaraá ga/aw, ar biifayen nee ar meehhaya tlaanqwayen, gaarí sleémeero a asma tidá' Labani ni dirók i tlehhiiti ana ár.

¹³ Án an Aakoó Munguúdá' nee kuúng taa doogaan amoodár Beteli, didá' tlaa/ano kuwa parátl kway di/ití tsiririxís, iri al'axweesántí ó'. Daxta tláw baraá yaamukae, kií/ baraá yaamuudá' tuwa laqwaál.› »

¹⁴ Raheli nee Lea Yakobo nguri bayé', «Xáy, daqaari'iimár niiná i deéro, laqaá aalír kumiit baraá doó baabuúrene?

¹⁵ Atén tiwa ga/ay a adór dahaayeéroóke? Inós tina weeriís, nee gweduú tinda slaáhh an kuqá' i /ayi.

¹⁶ Daqaari'iimadá' sleémeero Aakoó Mungú naa dirós wa hiingeés an toorén nee na/iirén. Gawaá adoorihe, umuúqo tidá' Mungú naa ooi na tleehheek.»

¹⁷ Naagáy Yakobo tiri amohhe'eés, tlaawaywós nee na/iiwose giri tsa/aás gawaá angamía.

¹⁸ Muruuwós sleémeero gurir tláy, dinkwa nee daqaari'iima sleémeero tidá' aa sláy baraá yaamaá Padan-aramúr wa ale. Aai gay tseék awa ki/imaá baraá yaamaá Kana'ani, amór baabuúwós Isaka.

¹⁹ Qoomaadae Labani aa se'éngw bee/aangós tlaquú áy. Naagáy Raheli pa/aangw guri sleér oo murslaaqatuú munguiidá' baabá i haratlintaati'i ngiwa fis.

²⁰ Yakobo Labani heé Aramu guna al/aáy as nguwa xu'utisiiká adór tleemu ngura ístí tsaát.

²¹ Yakobo daqaari'iimarós sleémeero gari ar tláy iri /akuút. Alaá yaaér Eufrate ngiwa waaraáhh, iri Gileadír xuú', yaamaá tlom'i.

Labani iwa Yakobó eehár

²² Alaá deelo tám iwa waaráhh, Labani kuna báy, «Yakobo aa /akuút.»

²³ Labani nee hhaeewós Yakobo nguri eeharahariyé' ay deelo faanqw, ngway gawaá tlom'aá Gileadír i ayé'.

²⁴ Ala xweeraawo Mungú Labani, heé Aramu guri i daqáy ar baraá tlata, guri báy, «Ti harmagahh, Yakobo mu /aymuú bawaar ku hhoó' laqaá tam ku tlaakwe.»

²⁵ Labani iri hardáh amór Yakobo, qoomaarihe Yakobo heémarós gaa kikií' gawaá gongoamo. Labani sleeme nee mukós heemaduuín ngay kiki'iyé' gawaá gongoamaá Gileadi.

²⁶ Labani Yakobo guri báy, «Gaarí a milá taa tléhh? Gár isa al/ák, dasuueé' kurir tleér adór haasaánguú tinda baraá slaqwarár wa hayóh?

²⁷ Gár tasa fisiín án iri al/ák, tam gár naa ó' i káhh. Geera án kuúng ugwa deelór i oóiíke ar bara/, nee daa'aangw, nee oowi nee gidaandori.

²⁸ Baré pa/aangw ngwaa hanisiiká oo dasuueé' nee na/aá dasuueé' ngiwa deeloórí oo'? Adoorí aga daktu'umár tléhh!

²⁹ Aleesleemuú uwa hariiaw u koóm, ala Mungú, baabuúwók nee aníng ana axweesaán ar baraá tlata xweeraá laarí ta dahhaan, ina gurbuú', iri báy, ‹Ti harmagahh Yakobo mu /aymuú bawaar oo hhoó' laqaá oo tlaákw.›

³⁰ A xuú' gár tasa fisiín, a inslawoó úr oo ki/imaá amór baabuúwók una sleér. Ala a milá gár murslaaqatuú munguiieé' kudá' ni haratlintatii' kisa fís?»

³¹ Yakobo Labani guri mu/aywaáts, «Án ana da'ayuút, asma aninge kuúng dasuuwók un hayót dir'eén wa alé ar /uuru.

³² Ala heé kuúng taqo sleera oo munguiidá' ta haratlintaati' gi koóm, ku gaasi. Dír geeraá mukrene kuúng umuúqo gaarók ar atén ta koomaan laqaamang, nee ka hayót geeraá mukók kwí wa alé.» Yakobo ga xuiiká adór Raheli murslaaqatuú munguiidá' Labani i haratlintaati'i ngura fís.

³³ Naagáy Labani murslaaqatuú munguiiwós guna leelehhiít baraá heémár Yakobo, nee ar Lea, nee ar sagadiyuuseedá' tsár, ala gwaa slayká. Ina baraá heémár Lea wa ti'iít, iri dáh baraá heémár Raheli.

³⁴ Raheli murslaaqatuú munguiidá' guna ar tleér, guri lú/ baraá guruú fala gawaá daanduú angamía, guri al'iwít. Labani iri ló'wa leelehhiít baraá guruú heéma sleémeero, ala gwaa slayká.

³⁵ Raheli baabuúwós guri beér, «Baabá, án gurtlawáng, ma buhhaar, sihhtanór geeraawók a aleeslawaaká, asma án a baraá deelor'eé' i dirií'.» Labani murslaaqatuú munguiidá' guri leelehhiít guri slayká.

³⁶ Yakobo iri tsatmiít buhhtaawo, Labani guri tlukún guri báy, «Dakuúsar'eé' a milá? Tlakweemaá naa tleéhh a milá ar án kuúng iwa adoorír /amatsegit?

³⁷ Hayiyá, hám daxta gaarók ar taa sleér i deéro tam alaá xosluueé' sleémeero kiwa xuxuaaiín? Tisíng taa sleér qaaseek dír geeraá muk'eé' nee mukók, as inooín kaa/i ngiwa tsatiya' dír tla/ángw ateéká' tsare.

³⁸ Aníng nee kuúng aga alhootaán baraá kureeriiká' mibeeri tsare, bee/aangók nee aaraawoge ar gura' gwaa kwahh i káhh, tam án gwaanduwók oo naa /aáy i kaahh baraá daqtoge.

³⁹ Aníng sleerók ar makiito'ór sla/a aa harieér ar naa amór dóí huúw i káhh. Badeérí tari daanduueé'. Kuúng án iri iinús, as ngiwa buu', kaa fiís bar tlaatla/aangw laqaá bar xweera.

⁴⁰ Adoorí an adór nira hoót, tlaatla/aango tsee/amá ina sláqwtí /ón, xweeraawo tsaaqwa ina gu'utér /ít.

⁴¹ Baraá kureeraá mibeeri tsare do'ók una hoót, una sagadiyuús kureeraá mibaá nee tsiyáhh as dasuuwók kuqá' tsár, nee kureeraá lahhooe makaay ina de'eém. Ala tam adoorihe, slaasláwar'eé' kay warqés sagaá wa mibaangw.

⁴² Geera bar Munguú baabuúeé', Munguú Abrahamu, Kudá' Isaka i da'ayumiiti, bir barte'eeneeká, geera án kuúng iga gús ar dabaá kaaharen. Ala Mungú slahh'amaayer'eé' nee gadiyér dabaaeé' gaa ár. An gár kuúng Mungú usa iigahhaát xweeraá laarí ni dahhaana.»

Kaahi sleemuú Yakobo nee Labani

⁴³ Labani Yakobo guri báy, «Dasuuwí a dasuueé', na/iiká' a na/iieé', muruuwí a muruueé', nee tí sleémeero ta ga/eer a te'eé'. Ala aníng laarí dasuueé', nee na/iieene adór ngi laaq?

⁴⁴ Ala daxta aníng nee kuúng al'axweesani a tleehhaán, asma tawa lamabu'uungw tla/angwrene.»

⁴⁵ Yakobo tlaa/ano guri taataáhh, gway foól adór uhmoó inslasláw al'axweesantadá'.

⁴⁶ Slamí Yakobo hhaeewós giri báy, «Tlaa/e burumburaare'.» Inooín tlaa/e ngiri burumburiyé', ngiri ufa tleehhiyé'. Muruú /ayma nguri /ayiyé' bihhaá ufuuwí wa alé.

⁴⁷ Labani ufuuduú tlaa/e gway báy Yegar-sahaduta. ala Yakobo gway báy Gale'edi.

⁴⁸ Labani iri oó', «Ufuuwí i xumiis, a lamabu'usmo tla/ángw kuúng nee aníng laarí.» Gawaá adoorihe Labani gway Gale'edírár ateét.

⁴⁹ Nee uhmoodá' gway báy Mispa, i kaahi, «AAKOÓ MUNGÚ i xumiis, atén tam ti harasawén, bar al'axweesantí aga warqeesaán.

⁵⁰ Dasuueé' bura baramaanús, laqaá bar /ameenár hatlá' aga duxút, tam heé xumiís i kahhi, inslaweek, Mungú i xumiis.»

⁵¹ Aluuwo Labani Yakobo guri báy, «Ga/aaweek, ufuuwí nee uhmoowí naa siíhh tla/ángw án nee kuúng.

⁵² Tlaa/anoowí nee uhmoowí a lamabu'uuse, ufuuwí ngu waarahhaaká as niwa amoorók kaw, kuúng uwa hariiaw, laqaá kuúng ufuuwí u waarahhká nee tlaa/anoowí as niwa amor'eé' keer, iwa hariieer.

⁵³ Munguú Abrahamu, nee Munguú Nahori, Munguú baabi'ii'ín, kasi ngi tsati tla/angwrene.» Yakobo lo'o gari /aáy ar umuú Mungú, Kudá' baabuúwós Isaka i da'ayuumiti.

⁵⁴ Aluuwo Yakobo makiito'o gari gaás, gari ilahhooár wa haniís dír Mungú gawaadá' tloomár wa alé. Hhaeewós giri ateét tawa /ayin. Alaá /aymaaro tawa hhe'eés, tari deél gawaá tlooma.

⁵⁵ Matlaatlér boo/e, Labani iri tláy qatuuwo, dasuuwós nee haywaá dasuuwós giri ma'amiís, giri tsuúq. Naagáy iri tláy, iri kií/ amór do'.