IIMU/UUNGW 3 - Biblía Axweesantá Hhohho' ar Mungú 2004

Dee/aanuú hee

¹ Ala dayshamo ku ilakahaár ta makaá sla/a sleémeero ba/a, kudá' AAKOÓ Mungú aa tleéhh. Inós /ameeni gari báy, «Xáy, adoorí an adór Mungú aa oói iwa kaahi, ‹Mamaá xaai sleémeero awa baraá asalmií diriiá' mi /ayaara'.› »

² /Ameeni dayshamo guri beér, «Mamaá xaai kudá' baraá asalmoó i diriiá' i aleeslawaán kiwa /ayaan.

³ Ala Mungú ina oó', ‹Mamaá xa'anoodá' baraá tla/ángw asalmií dirií' mi /ayaara', tam mi kwatiitara', as kahhó' daqaní a qatla'aaká.› »

⁴ Ala dayshamo /ameeni gari báy, «Kuungá' a baloó qatla'aaká.

⁵ Asma Mungú ga xuu' bál kuungá' mamaá xa'anoowí bira /agé', ilaahúng ki gwa/atis, kuungá' tari adór Mungú tleehhitá', muruú hhó' nee oo tlákw kuwa xua'.»

⁶ Naxés /ameeni gana aán mamaá xa'anoodá' kúto' i tsuuiyá' /aymaaro, slám ki hhohho' ngiwa ga/eer ilaawo, nee ki hhoo' as iwa sagalooár huwiya' biringa /ák. Maamár xa'anoowí gari bú', gari /ák, gari hhawaatuuwós i hanís, inós sleeme gari /aáy.

⁷ Naxés inooín tsaraawo ilaaín kiri gwa/atís, tiri tsaahhiyé' adór inooín tar /aankwets. Loo/ór puunganí kari hiriít tlabaá wa alé.

⁸ Naagáy afór AAKOÓ Mungú kari axaás iwa hi'iimiti baraá asalmoó wa ale qoomár tsee/amá iwa fuuruú'. Heedaádá' nee hareerós niri nahhaatiyé' baraá xaa'aá asalmoodií ale, as AAKOÓ Mungú mingiwa ár.

⁹ Ala AAKOÓ Mungú heedaádá' guri ateét guri báy, «Kuúng a amá?»

¹⁰ Heedaádá' iri oó', «Afoorók ana axaás baraá asalmo, aníng niri da'ayuút, asma tawa /aankwets, niri nahhaát.»

¹¹ AAKOÓ Mungú iri oó', «Heé ugwa bay kuúng a /aankwets? Xáy, kuúng mamaá xa'anoodá' uwa báw mi /ayaar, ina /ági?»

¹² Adam iri oó', «/Ameenidá' kuúng na hanís tawa alhootaan, inós maamár xa'anoowí ngina hanís, ngiri /aáy.»

¹³ AAKOÓ Mungú /ameenidá' gari báy, «Gaarí a milá kiíng taa tléhh?» /Ameenidá' iri ó', «Dayshamo aníng ina al/aáy, ngiri /aáy.»

Sakwasleemár Mungú

¹⁴ AAKOÓ Mungú dayshamo guri báy, «Asma adoosíng kawa tléhh, kuúng taa lu'ús ta makaá ta de'en sleémeero, nee ta makaá sla/a sleémeero. An gurúr mandrooqomít, teeri an /ák, baraá slafiingók sleémeero.

¹⁵ Aníng wakaari a qaás tla/aangók nee /ameenirí, nee tla/ángw xwaylarók nee xwaylarós. Xwaylarós kuúng un saga naasuúr. Kuúng inós an koolo kíhh.»

¹⁶ /Ameeni gari báy, «Ar ló', aníng slahh'amaayeerók ngi doók qoomár xwaylaro. Na/ii in xwayluúr ar slahh'amaaye, nee ilatleeriirók a gawaá daanduú hhawaatuuwók, nee inós kiíng i sawaawuti'ín.»

¹⁷ Hhawaata guri báy, «Asma kuúng afór hareerók kawa iiárií qás, mamaá xa'anoodá' uwa báw ‹mi /ayaar› kiri /ák, yaamu kaa lu'ús as kuúng. Kuúng muruú /aymaarók un baraawós wa sleér ar slahh'amuú gadiyér ur baraá slafiingók sleémeero.

¹⁸ Gár yaamu ni kuúngí duuxiya' a fuquráy nee laqaya', nee kuúng muruú /aymaarók un baraá yaamuú wa sleér.

¹⁹ Ar hamér gadiyér gawide muruú /aymaarók un /ák, ay dír ti ki/ baraá hhape. Asma kuúng tuna tleéhh ar hhape. Kuúng a hhape, nee baraá hhape an i kí/.»

²⁰ Adam hareerós gari umií tsaát, gari báy Hawa asma a aayór múk slaáf sleémeero.

²¹ AAKOÓ Mungú Adam nee hareerós giri tlabaá kadú i tleéhh, giri tsiitiís.

Guusár Adam nee Hawa

²² AAKOÓ Mungú iri oó', «Ga/aaweek, hee daxta aa adór atén tleehhiít gawaá xu'utír hhooeema nee tlakweemaawo. Ala wané dakose mamaá xa'anoó slafíngw koóm gi taataahh, giri /aay, iri slaaf ay kureeraá kureér.»

²³ Naagáy AAKOÓ Mungú giri duúx baraá asalmooduú Edeniro, as yaamu ngiwa doosli, kudá' hhaper'ín inós kura tleéhh.

²⁴ AAKOÓ Mungú hee guri guús baraá asalmoodae, keruúbi gari qaás bihhaá da/aáw awa asalmoó Edeni. Paángár asla ar war'eeliim amorqá' nee amqae gari qaás, asma loohidá' amór xa'anoó slafíngw kaw kawa xun.