IIMU/UUNGW 29 - Biblía Axweesantá Hhohho' ar Mungú 2004

Hardahamaá Yakobo amór Labani

¹ Yakobo ina kumiít aaiiwose, iri hardáh baraá yaamaá múk da/aáw.

² Didaádae hhalaangw guri baraá xatstá wa ár, daqooroó tám oo bee/aangw aa bihhaá hhalángwií qaát. Bee/aangw ku wahamiis ar ma'aá hhalangwdá' taa tuuntuúk ar tlaa/anoó úr.

³ /Iskoorí daqooroó bee/aangw burkwa wahaasár áy, de'eemuuse tlaa/anoodá' gun gwangwará' gawaá afkú hhalángw wa alé, bee/aangw kuri wahaas. Aluuwo hhalaangw kuri male tuuntuuk ar tlaa/anoodá'.

⁴ Yakobo de'eemuuse gari yaahaás, «Hhaee'eé', a dahhá'?» Inooín tari oó', «A Haranír dahhaán.»

⁵ Giri yaahaás, «Xáy, heeko ta babay Labani, garmoó Nahori u xuá'a?» Tari oó', «U xuaán.»

⁶ Iri kumiít yaahamisuuwo, «Xáy, i sayaumamíti?» Inooín tari oó', «I sayauut, hanoos dasiirós Raheli i amoorí keér, i bee/ángw koón.»

⁷ Yakobo giri báy, «Iimi i tlaatla/ángwí káhh, slám qoomár tlahhasa aa xeeriiká. Ala bee/aangw wahaasaak, ku de'éngw eerá'.»

⁸ Ala inooín nguri bayé', «Adoosíng a tleehhanaaká ay dír daqooráy sleémeero i burumburiiti dír wák, ay dír tlaa/ano kway hingeesi gawaá afkú hhalaango, daqaní bee/aangw kway wahasaán.»

⁹ Yakobo nee de'eemuuse tawa axweesantí kahhi, Raheli nina hardát, i bee/ángw baabuúwós koón, asma inós gun de'eén.

¹⁰ Yakobo Raheli ngiwa ár, dasír Labani, hhiyoó aayírós, nee bee/ángw Labani maamáywós nguwa ár, ina tláy, tlaa/anooduú gawaá afkú hhalaangw guri gwangwaraá', daqtá maamáywós Labani gari wahaás.

¹¹ Yakobo Raheli gari ma'aás, iri /aá/ as qwala/.

¹² Aluuwo Yakobo Raheli gari xu'utís, adór inós tar mar'afmoó baabuúwós, slám a garmoó Rebeka. Raheli iri ta'aaiín amór do', baabuúwós guri kángw beér.

¹³ Labani kángw Yakobo oohho'oówós nguwa axaás, ina ta'aaín nguwa al'ay. Guri slaqwtósí óh, guri ma'aás, guri do'ós i dahi'ís. Yakobo kangwdá' sleémeero aa tleehharuut guri alki/iít.

¹⁴ Labani iri oó', «Ar ló', kuúng a daa'awmooeé' oo nayshu.» Yakobo slahhángw wake iri doó Labaní wa hoót.

Duuxór Yakobo

¹⁵ Labani Yakobo guri báy. «I hariindaaká án kuúng iwa tawo sagadiyus as tawa mar'afmooeé'. Bu'utuú kuúng ta sla' ooang.»

¹⁶ Labani dasuú tsár gu kón, ar ur umuuwós a Lea, nee ar niina a Raheli.

¹⁷ Lea i ila' wanaaná', ala Raheli ka hhoohhoo' slám ka tsataari hho'.

¹⁸ Yakobo Raheli gari slaá', Labani guri báy, «Án kuúng kureeraá faanqwe u sagadiyuús, as Raheli, dasiirók tidá' niina ngiwa hanis.»

¹⁹ Labani guri báy, «A tsiní kuúng Raheli bara dúx, ta heé hatlá' ngiwa duuxi. Kuúng kumiitáng niwa dir'eé' wa hot.»

²⁰ Yakobo Labani guri sagadiyuús kureeri faanqw as Raheli ngiwa slay, ala dirose a adór deelór niina as adoodá' Raheli ngira slaá'.

²¹ Yakobo Labani guri báy, «Qoomar'eé' aa bó/, daxta harer'eé' haniisang.»

²² Ala Labani muruú /ayma guri amohhe'eés, múk yaamuudá' guri ateét.

²³ Ala tsiindoowo Labani Lea dasiirós ar ur gari huúw amór Yakobo, Yakobo Lea gari duúx.

²⁴ (Labani Silpa sagadiyuso'oorós gari haniís dír Lea as ngiwa sagadiyus.)

²⁵ Matlaatleero Yakobo gari tsaáhh tawa Lea! Labani guri yaahaás, «Kaangwí naa aní tléhh a milá? Xáy, una sagadiyuúsiíke as Raheli? Bareemák daxta iga al/ák?»

²⁶ Labani iri oó', «Baraá yaamurene dakwsíng u tlehhaahhitanaaká oo dasír niina kawa geerií duuxi dír dasír ure.

²⁷ Lea deeloorós ar faanqw boo/eeseek, daqaní atén Raheli ngi hanisaán kawa dux, ar tawa malé gadiyus kureeraá hatlá' awa faanqwe.»

²⁸ Yakobo iri ya/án. Yakobo deeloodá' faanqw ar Lea ngiwa boo/eés, Labani Raheli dasiirós ar niina gari malé haniís dír Yakobo.

²⁹ (Labani Bilha sagadiyuso'oorós gari haniís tawa sagadiyuso'ór Raheli.)

³⁰ Yakobo Raheli gari duúx sleeme. Ala Yakobo Raheli gari ak slaá' ta Leawo. Labani guri sagadiyuús kureeraá hatlá' awa faanqwe.

Daaqoó Yakobo

³¹ AAKOÓ MUNGÚ ngiwa ár Lea kawa slaiiká, gari na/ií haniís, ala Raheli na/ii gaa sleeriiká.

³² Lea iri tsít, iri xwayluúr na/oó garma, guri beér Reubeni, iwa kat, «Asma AAKOÓ MUNGÚ slahh'amaayer'eé' gaa ár, dooqa daxta hhawaatuueé' i slaa'.»

³³ Lea iri malé tsít, na/oó garmaawo iri xwayluúr, gway beér Simeon, iwa kat, «AAKOÓ MUNGÚ na/oó hatlá' oo garma ngwaa haniís, gaa axaás adór aníng tira aáhh.»

³⁴ Tsiihoó hatlá' guri sleér, iri xwayluúr na/oó garma, guri beér Laáwi, iwa kat, «Dooqa daxta hhawaatuueé' ni amor'eé' waatl, asma ugwa daaqoó tám i laqwaál.»

³⁵ Lea iri malé tsít, na/oó garma guri xwayluúr, guri beér Yuda, iwa kat, «Ki/imakae AAKOÓ MUNGÚ u diidi'iís.» Lea iri ala sihhít xwaylaro.