IIMU/UUNGW 27 - Biblía Axweesantá Hhohho' ar Mungú 2004

Tsuuqár Yakobo

¹ Isaka iwa dín, nee ilaawós naa tampuutiyé', Esau garmaawós oo úr guri amoorós i ateét, guri báy, «Garmaaeé'.» Inós iri oó', «Aníng a diirí.»

² Isaka iri oó', «Ga/aaweek, aníng a aakoó aa din, slamí baalár ni gwaa' a xuaaká.

³ Ala xosluuwók tataahheek, tlaangasirók nee ga/aleerók, tláw baraá sla/a, makiito'o gaasang.

⁴ Daqaní muruú /aymár tsuú' ngu tléhh, kudá' ni sla'aa'aam, ngu húp as niwa /ayiim nee kuúng uwa tsuuq dír nira gwaaiiká.»

⁵ Laatí, qoomaadá' Isaka iwa garmaawós Esau i axweesi, Rebeka i axamís. Naagáy Esau iwa tláy baraá sla/a as iwa slaktuú ay,

⁶ Rebeka garmaawós Yakobo guri beér, «Aníng baabuúwók ugwa axaás iwa hhiyaawók Esaú babay,

⁷ ‹Slakat aweek as muruú /aymár tsuú' nguwa tlehh, as kahhó' uwa tsuuq dír geeraá AAKOÓ MUNGÚ wa alé, dír nira gwaaiiká.›

⁸ Daxta garmaaeé', /aymi'iieé' iiárií qaaseek, nee tidá' ni kuúng bawa ka iialooés.

⁹ Tláw baraá daqtá aara, deeloó tsár oo aara, kudá' hhohhó' ngu húp, baabuúwók u muruú /aymár tsuú' i tleéhh, kudá' i sla'aa'an.

¹⁰ Kuúng daqaní baabuúwók un muruú /aymár i húp, iwa /ayin, as kuúng uwa tsuuqi dír ira gwaaiiká.»

¹¹ Ala Yakobo aayírós Rebeka gari báy, «Inslaweek, hhiyaaeé' Esau, slaqwtós i háts se'eengo, aníng u koomaaká.

¹² Hám wané baabá aníng i matsotsoqoos, án iri tsaahh adór ngura al/aáy, aluuwo aníng lo'o iri eér, tsuuqa ngiri slawaaká.»

¹³ Aayiírós guri beér, «Lo'oorók aníng i /ak, garmaaeé', kuúng tí ni kah na tleehheek, tláw deeláysuú aara na huwang.»

¹⁴ Naagáy Yakobo iri tláy, deeloó tsár oo aara nguri huúw amór aayírós. Inós muruú /aymár tsuú' guri tléhh, kudá' Isaka i sla'aa'an.

¹⁵ Rebeka tlabaá Esau, garmaawós kudá' úr giri taatáhh, kudá' i kon do'o, Yakobo, garmaawós kudá' niiná guri tsiitís.

¹⁶ Rebeka dabaá Yakobo nee isto giri kadaá deeláyduú aarií tsék.

¹⁷ Naagáy guri muruú /aymaadá' tsuú' i hanís, nee mikaáteedá' aa amohhe'és.

¹⁸ Yakobo iri dáh amór baabuúwós, guri ateét, «Baabá». Inós iri oó', «Aníng a diirí. Kuúng a heemá, garmaaeé'?»

¹⁹ Yakobo iri oó', «A aníng Esau, barsuuwók. Adoodá' kuúng naa ó' aga tleéhh. Na'ás, baabá, gwe'edár iwiitang, sluqor'eé' /ayeek, as án iwa tsuq.»

²⁰ Ala Isaka ina yaahaás, «A adoomá, bareemák naa gaanslár slúq, garmaaeé'.» Yakobo iri oó', «Asma Munguú Aleesleemusmo, Munguúwók án ina alee/iís.»

²¹ Isaka Yakobo guri báy, «Garmaaeé', diirí suruukang as uwa matsotsoqoos as ngiwa tsaahh, adór kuúng tar tsuwa garmaaeé' Esau.»

²² Yakobo baabuúwós Isaka guri i suruúk, Isaka guri matsotsoqoós, iri oó', «Afoorí a afór Yakobo, ala daba' a dabaá Esau.»

²³ Gwaa tsaahhiiká, asma dabaawós i se'éngw koná' adór awa hhiyaawós Esau. Naagáy guri tsuúq.

²⁴ Guri malé yaahaás, «Kuúng aqo tsuwa garmaaeé' Esáwúwo garmaaeéne?» Inós iri oó', «Eeít».

²⁵ Naagáy baabuúwós guri báy, «Fu'unaydaá sluqoorók huwang, ngiwa /aay, as uwa tsuuq.» Yakobo guri muruú /aymaadá' i huúw, iri /ayín, difaái sleeme gay huúw, gari wáh.

²⁶ An qoomár baabuúwós Isaka iwa oó', «Suruukáng, diirí tseewuwang garmaaeé', án ma'aasáng.»

²⁷ Naagáy Yakobo iri suruúk dír baabuúwós, guri ma'aás. Baabuúwós xarángw tlabaawós nguwa sláy, guri tsuúq, i kaahi, «Ga/aaweek, xarángw tsuú' oo garmaaeé' a adór xarángw qaymór taa tsuúq nee AAKOÓ MUNGÚ.

²⁸ Mungú har'uú doori ngu haniisi, hhapér hho' ngi haniisi, balaangw nee difaáiro ni hamaariye'.

²⁹ Tlahh'aá muu u sagadiyuusiye', nee xoordu u ilaiwawa/iye'. Kuúng hhaeewók ki sawaawuti'iín, nee na/aá aayírók u ilaiwawa/iye'. Kudá' kuúng u lu'ús, ku lu'usi, nee kudá' kuúng u tsuúq, ku tsuuqi.»

Esau i tsuuqaá firiirín sleeme

³⁰ Isaka Yakobo tsuuqaro nguwa hhe'eés, nee Yakobo hamtidár kilae niwa ti'iít dír baabuúwose, Esau hhiyoó Yakobo nina harakií/ baraá slaktuú wa alé.

³¹ Esau sleeme muruú /aymaadá' tsuú' guri adaá tleéhh, guri baabuúwós i huúw, guri báy, «Gím baabá, tlawáng, sluqór garmaawók /ayeek, as án iwa tsuq.»

³² Isaka guri yaahaás, «Kuúng a heemá?» Inós iri oó', «A aníng garmaawók Esau, barsuuwók.»

³³ Isaka adoorí ngiwa axaás, daaraxoó úr guri áy, iri oó', «A heemá kar ala kudá' aa slakaat, nee sluqo ngiri huúw, aníng aga qaroó /ayiím qoomár kuúng niwa hardatiká. Nee ugwa qaroó tsuúq, nee tsuuqa gaa sláy.»

³⁴ Esau /ayma'aá baabuúwós ngiwa axaás. Ina slahhaá', iri tseé' /aa/eewo. Aluuwo baabuúwós guri báy, «Baabá, na'ás, aníng sleeme tsuuqáng.»

³⁵ Ala Isaka iri oó', «Hhiyaawók nina dáh ar al/ayma, inós tsuuqaawók gaa ar tláy.»

³⁶ Esau iri oó', «An gár tas Yakobo, aníng iga sagaá wa tsár wa al/aáy. Gár geera a uroó án tawa baris guna hayóh, nee daxta tsuuqaaeé' gaa malé hayóh.» Esau baabuúwós guri yaahaás, «Tsuuqaá taa meetís as aníng i kahhiía?»

³⁷ Isaka iri oó', «Yakobo ugwa waawutmoowók tleéhh, nee hhaeewós iga haniís tawa sagadiyuuseerós. Ugwa balángw i haniís nee difaáiro. Gár uy tleehh daxta garmaaeé'?»

³⁸ Esau baabuúwós guri báy, «Baabá, tsuuqa ki koon aqo wak kilóse? Aníng sleeme tsuuqáng, baabá.» Esau iri tseé' /aa/eewo.

³⁹ Naagáy Esau kuri báy nee Isaka baabuúwós, «Hotaangók ku saáw dír hhapér hhoe, nee kuúng tu saáw dír har'uú dooriwo.

⁴⁰ Muruú /aymaarók un slasleér ar lawaala, kuúng hhiyaawók un sagadiyús, ala qooma i xeér ar kuúng /uuru kuwa malé sleer Qoomaadae taaqwani an hingés gawaá istoge.»

⁴¹ Esau Yakobo guri aáhh as tsuuqaá taa haniís nee baabuúwós. Esau iri baraá muunaáwós i oó', «Deelór baabá kuwa sa tsuunqumiisi naa naká/. Daqaní hhiyaaeé' Yakobo un gaás.»

⁴² Ala Rebeka kángw Esau garmaawós kudá' úr guri axás. Hee guri ya/áp Yakobo garmaawós kudá' niiná nguwa ateeti, guri beér, «Ti harmagahh, hhiyaawók Esau ti gurkwa/amis as kuúng uwa gaasár wa slai.

⁴³ Garmaaeé', /aymi'iieé' iiárií qaaseek, tláw, goów ay amór hhiyaaeé' Labani, baraá Harani.

⁴⁴ Afi qoomár niinawe hooté' nee inós ay dír buhhtaá hhiyaawók nay faakiya'.

⁴⁵ Buhhtaawós birinda faakiyé', inós tidá' kuúng taa tléhh birnga gunqareés, án hee ngu ya/aáw as niwa ki/. Gár kuungá' tsaraawo tas looár wák alqatla' a milá?»

Yakobo kuwa ya/aáw amór Labani

⁴⁶ Rebeka Isaka guri beér, «Aníng amohhooa a koomaaká baraá slafingw'eene as /ameenarír Hiti. Yakobo /ameenír wák ar múk Hiti birnga duúx, gár nis slaaf a milá?»