IIMU/UUNGW 26 - Biblía Axweesantá Hhohho' ar Mungú 2004

Isaka iwa lóh baraá Gerari

¹ Giyér hatlá' nina tleér baraá yaamuwo adór tidár qoomár slafíngw Abrahamu. Isaka iri tláy ay Gerari amór waawutmo Abimeleki oo múk Filisti.

² AAKOÓ MUNGUÚ Isaka guri i ti'iít, gway báy, «Ma tlawaar Misri, ala na hoót baraá yaamuudá' ni kuúngií oo'.

³ Na dahaaymo tleehhiít baraá yaamukae. Aníng nee kuúng a dinkwa, nee án kuúng u tsuúq. Án al'axweesante'eé' a boo/eés dír baabuúwók Abrahamu, asma án yaamu sleémeero ngi kuúng nee xwaylarók i haniís.

⁴ Xwaylarók an tlahhás tawa adór tsatse/uú doori, nee yaamuká' sleémeero ngiri dir'ín i haniís. Ar baraá xwaylaroge xoordu sleémeero awa yaamu ki tsuuq.

⁵ Asma Abrahamu aníng ina iialooeés, tidá' ngwa báw gari óh nee hara'ayar'eene, nee kaahir'eene nee daber'eene.»

⁶ Isaka ina amór Gerari wa hoót.

⁷ Múk amoodá' guri yaahaás kángw hareerós, inós iri oó', «Tí a hho'or'eé'.» Asma ina da'ayuút iwa ooi a hareerós, asma múk amoodá' aluuwo gu gaas, Rebeka karir tláy. Asma Rebeka a /ameenír hhoohhoo' ló'wa alé.

⁸ Alaá iwa amoodá' wa hoót afi qoomár tleere, waawutmo Abimeleki oo múk Filisti ina harqaytsiít ar pa/aangw, Isaka guna ár hareerós Rebeka gaa gawaá sláqwtí óh.

⁹ Abimeleki Isaka guri ateét, gway báy, «Laatí tí an hareerók! Ahaá mas kat a hho'oorók?» Isaka guri mu/aywaáts, «Án ana da'ayuút asma tiwa gaasi as inós.»

¹⁰ Abimeleki guri yaahaás, «Gaarí a milá taa atén i tléhh? Oo wák baraá muk'eene geera aqo nee hareerók tan alqaat ar xure wasle, atén geera kuúng taa baraá tlakweemií dahás.»

¹¹ Abimeleki muu sleémeero guri gurbuú', giri báy, «Umuúqo heewo oo heewí laqaá hareerós gaa kwatiit, gár kuwa hariím a gaasa.»

¹² Isaka dahaasiingw guri dahaás baraá yaamudae, kurkudae iri ak bu'ún sagaáwa tsiiru. AAKOÓ MUNGÚ guri tsuúq.

¹³ Inós iri daqaari'iít. Daqaari'iimár yaariir gay sláy, iri ak daqaarmo tleehhiít.

¹⁴ Bee/aangw nee hikwa gi kón, nee sagadiyuusér yaariir, tam múk Filisti gur'e guri ohiín.

¹⁵ (Múk Filisti hhaleeriidá' ma'aay sleémeero ngina tipiyé', kudá' sagadiyuusér baabuúwós Abrahamu, aa fól qoomár slafiingose.)

¹⁶ Abimeleki Isaka guri báy, «Quútl ayaarene, asma atén kuúng taa bá/ /uuruuwo.»

¹⁷ Naagáy Isaka iri tláy amoodae, heémarós gari kikií' baraá xatstá Gerari, iri amoodá' wa hoót.

¹⁸ Isaka hhaleeriidá' giri xwaár, kudá' taa foól qoomár baabuúwós Abrahamu, kudá' taa tiíp nee múk Filisti alaá gwa'arár Abrahamuwo. Giri umeedár aáng i ki/ís, tidá' baabuúwós aa tsaát.

¹⁹ Ala sagadiyuusér Isaka tawa hhaleeraá foliiti baraá xatstadá' wa ale, kutltá ur kana harati'iít ar ma'aá yaariír koom.

²⁰ De'eemuusér ayaá Gerari tina aeér nee de'eemuusér Isaka, tana káh, «Ma'ayká' a koorén.» Isaka hhalangwdá' guri báy Eseki, asma inós nee de'eemuuseedá' tina a'ayé'.

²¹ Aluuwo hhalángw hatlá' nguri fooliyé', tiri malé a'ayé', Isaka hhalangwdá' guri báy Sitna.

²² Naagáy Isaka iri tláy amór hatlá', hhalángw hatlá' guri foól. Ala kwí kwaa gilá wa slayká, Isaka hhalaangwí guri báy Rehoboti, iri oó', «Daxta AAKOÓ MUNGÚ taa pa/ángw i haniís, atén an doogimaán baraá yaamukae.»

²³ Isaka iri amoodá' wa tláy ay Be'er-sheba.

²⁴ Xweeradaá kilae AAKOÓ MUNGÚ guri i ti'iít, guri báy, «Aníng an AAKOÓ Munguú baabuúwók Abrahamu. Ma da'ayumiitaar, asma aníng nee kuúng a dinkwa. Án kuúng u tsuúq, nee xwaylarók ngiri tlahhás as sagadiyusmooeé' Abrahamu.»

²⁵ Gawaá adoorihe Isaka kitángw ilahhooa guri amoodií tleéhh, AAKOÓ MUNGÚ guri xirfayeemiís. Heémarós gari amoodií kikií', nee sagadiyuuseerós hhalaangw guri fól.

Isaka nee Abimeleki tiwa kaahi slayé'

²⁶ Naagáy Abimeleki ina tláy Gerari wa alé dinkwa nee Ahusati mulqumoowós, nee Fikoli, heé úr oo slaqwaruuseerós, iri tláy amór Isaka.

²⁷ Isaka giri yaahaás, «A milá gár nisa amor'eé' keeré', barqo án kuungá' ina ahhé', iri gusé' ayaahunge?»

²⁸ Inooín nguri mu/aywatsiyé', «Aga araán ar geehhoeema adór AAKOÓ MUNGÚ nee kuúng tar dinkwa. Gawaá adoorihe ana araán i hariín lo'o ngiwa al/ayaan nee kuúng, nee al'axweesani ngiwa tleehhaan,

²⁹ adór kuúng atén tiwa gaa /iská, adoodá' atén kuúng ura gaa /iisaniiká. Atén una hhooeemií tleehhaán, uri mawaán tari tleér ar wayda. Gár tlaakw ar naa kuúngií tleehhaán i káhh. Nee daxta kuúng a heé taa tsuúq nee AAKOÓ MUNGÚ.»

³⁰ Naagáy Isaka giri muruú /aymár i tleéhh, inooín tari al/ayín, tari wahán.

³¹ Looitleerós nay tseewa tlayé', lo'o ngiri /ayiyé'. Isaka giri haydohiís, tiri deelórí ooiyé' nee inooín ar wayda.

³² Baldár kilae Isaka sagadiyuuseerós guna i hardát, ngway kángw hhalangwdá' bayé', kudá' naa fooliyé', tawa kaahi, «Ma'aay iga slawaán.»

³³ Isaka hhalangwdá' guri báy Shiba, gawaá adoorihe umuú gixsadá' a Be'er-sheba tam ay laarí.

Esau /Ameenár tsifrihatlo ngiwa duxuút

³⁴ Esau kureeriiwós tawa mibeeri tsiyáhh, /ameenár tsár gana duxuút ar tlahhoó Hiti, Yuditi dasír Be'eri, nee Basemati dasír Eloni.

³⁵ /Ameenaarí hotángw Isaka nee oo Rebeka guri tli/ís.