IIMU/UUNGW 25 - Biblía Axweesantá Hhohho' ar Mungú 2004

Na/aá hatlá' awa Abrahamu

¹ Abrahamu harér hatlá' gari duúx, umuuwós a Ketura.

² Ketura Abrahamu guri daaqaywí xwayluúr: Simrani nee Yokshani, nee Medani, nee Midiani, nee Ishbaki nee Shua.

³ Yokshani iri laqwaál Sheba nee Dedani. Nee xwaylár Dedani tari múk Ashuru, nee múk Letushi nee múk Leumi.

⁴ Daaqoó Midiani an Efa, nee Eferi, nee Hanoki, nee Abida nee Elda'a. Kuká' sleémeero an na/aá Ketura.

⁵ Abrahamu Isaka guri aalitmoó muruuwós sleémeero wa qaás.

⁶ Ala qoomár iwa slafi, daaqoó /ameenár hatlá' guna qáy. Daaqaydá' guri loohatís, giri da/ií saweés dír garmaawós Isakawo.

Gwa'arár Abrahamu

⁷ Abrahamu kureeri ngaa hoót a tsiiruú wák mibeeri faanqw nee kooán.

⁸ Kureeraá yaariir gina hoót, diimaay guri daáhh.

⁹ Isaka nee Ishmaeli, daaqoó Abrahamu, baabuúín nguri fooliyé' baraá mar'ír Makpela, Mamrero da/aáw, baraá qaymoodár Efroni, garmoó Sohari, oo xoorór Hiti.

¹⁰ Qaymoorí an tidá' Abrahamu aa tlaáxw dír múk Hiti wa alé. An dír Abrahamu nee hareerós ki foól.

¹¹ Alaá Abrahamu iwa gwaá', garmaawós Isaka kuri tsuúq nee Mungú. Isaka ina hoót bihhaá hhalángw Lahai-roi wa alé.

Xwaylár Ishmaeli

¹² Kuká' an daaqoó Ishmaeli, kudá' Hagari ar Misri sagadiyuso'ór Sara aa dír Abrahamií xwayluúr.

¹³ Umer'ín an tí, nee adór tira hariyé' xwaylaro: Nebayoti an baris, nee Kedari, nee Adbe'eli, nee Mibsamu,

¹⁴ nee Mishma, nee Duma, nee Masa,

¹⁵ nee Hadadi, nee Tema, nee Yeturi, nee Nafishi nee Kedema.

¹⁶ Kuká' an daaqoó Ishmaeli, nee an iimu/úngw tlahh'aá mibaá nee tsár, umer'ín nee yaamaá naa hootiyé' kina xuú' ar umér'ín.

¹⁷ Ishmaeli iwa gwaá' kureeriiwós a tsiiruú wák mibeeri tám nee faanqw.

¹⁸ Xwaylár Ishmaeli ina hót iimír yaamaá Hafila ay yaamaá Shuri bihhaá da/aáw awa Misri, amór isaapoó Ashuru. Múk Ishmaeli ina iisaapoó hhaeeín wa hoót.

Esau nee Yakobo kiwa laqwaál

¹⁹ Kaangwí oo Isaka garmoó Abrahamu.

²⁰ Isaka kureeriiwós a mibeeri tsiyáhh qoomár Rebeka ngiwa duúx, dasír Betueli, heé Aramu oo Padan-aramu. Rebeka a hho'ór Labani.

²¹ Rebeka a kaampeeri, gawaá adoorihe Isaka AAKOÓ MUNGÚ guna firiirín. AAKOÓ MUNGÚ firoorós gari ya/án, Rebeka iri tsít.

²² Tsiihaywí a daangi. Na/iiká' nina baraá guruuwós wa qwaatliyé'. Inós iri ó', «Ado bar adoorí, gár nis hoot?» Naagáy iri tleér, AAKOÓ MUNGÚ guri yaahás.

²³ AAKOÓ MUNGÚ gari báy, «Xoordaá tsár i baraá guruuwók, tlahh'aá tsár awa kiíng ta xwayluur tin paraatliyá'. Oo wák i /uuruú kón ta oo hatlae, garmoó niiná kudá' úr gun sawaawuti'ín.»

²⁴ Deelór xwaylarós iwa xeér, Rebeka daangi gari xwayluúr.

²⁵ Oo geera ku daa/aát, nee slaqwtós i se'éngw koón, kway báy Esau.

²⁶ Oo tsár kuwa laqwaál, Esau ngwa koolo óh, kway báy Yakobo. Isaka kureeriiwós a mibeeri lahhoó', qoomár Esau nee Yakobo kiwa laqwaál.

Esau i uraywós weermiis

²⁷ Daaqaywí iwa uraaráy, Esau tari slakaatusmoó ilakaahaár oo sla/tá hotaatiím, ala Yakobo an heé tsá', oo doó hoót.

²⁸ Naagáy Isaka Esau guna slaá', asma sluqoorós gan /aa/aay, ala Rebeka Yakobo guna ak slá' ta Esauwo.

²⁹ Looarka wake Yakobo i deénguú huurín, Esau naa haraakií/ baraá slaktuú wa alé. Esau aa ló'wa qwariít.

³⁰ Yakobo guri báy, «Qwari iga gaás, na'ás, muruú /aymaasíng da/tén qasiisang.» (Gaarí an gár kusa báy Edomu).

³¹ Yakobo guri mu/aywaáts, «Uraywók oo tawa baris ala aníng i weeriisang.»

³² Esau iri oó', «Ka hhoo', aga nakaá/ gwa'araaro, uray'eé' oo barisi'iima gár iwa bui a milá?»

³³ Yakobo guri báy, «Lo'o ala geerií /ayeek.» Naagáy Esau lo'o gari /aáy, Yakobo guri uroó barisi'iimarós i weeriís.

³⁴ Yakobo Esau guri mikaáte nee deénguú i haniís. Esau iri wahán. Aluuwo iri tláy. Adoorí an adór Esau uraywós ngura weeriís.