IIMU/UUNGW 23 - Biblía Axweesantá Hhohho' ar Mungú 2004

Gwa'arár Sara

¹ Sara kureeri ngaa hót a tsiiru nee mibeeri tsár nee faanqw. Kureeriiká' an kureeraá Sara aa hót.

² Sara iri gwá' baraá gixsár Kiriat-arba, tidá' ta bay Hebroni, ar baraá yaamaá Kana'ani. Abrahamu ina /aa/amín, iri tsuunqumiís as gwa'arár hareerós Sara.

³ Abrahamu tuuár hareerós gari geexáy, iri tláy tawa axweesi nee múk Hiti, guri báy,

⁴ «Án niwa hoót a adór dahaaymo nee /eetusmo baraá tla/angwhunge. Yaamaá niina dir'eé' weerisaare', awa muk'eé' nguy foliit, as dír tuuár harer'eé' ngi fool ngiwa slaw.»

⁵ Mukduú Hiti Abrahamu kuri báy,

⁶ «Aáko, iia qaaseek, kuúng a heé úr oo Mungú baraá tla/angwrene, tuuár hareerók fooleek baraá baa'ár muunaáwoge taa tsawát. Baraá tla/angwrene heé baa'a ga kuúng wa /itiím i kaahh, tam oo u ilaá/ tuuár hareerók kawa fol i kaahh.»

⁷ Abrahamu iri xupuú' dír geeraá múk yaamuloó' oo Hiti ar ilaiwa/ame.

⁸ Iri dir'ín i oó', «Barnaxes aga ya/aandé' tuuár harer'eé' ngiwa fool, na'asé', Efroni garmoó Sohari harhhehhe'eesare',

⁹ as mar'irós tidár Makpela, tidár dír digimuú qaymoorós, ngiwa aní weerisi, as ngiwa muk'eé' foliit. Án inós u buú' ar afi qoomaadá' inós wa hariim hamtír kilá' dír geeraahúng wa ale.»

¹⁰ Efroni inósuú kilá' i baraá tla/ángw múk Hiti, kudá' ta dook dír afkú úr oo gixsa. Efroni kuduú Hiti, Abrahamu guri geeraá múk Hiti wa báy,

¹¹ «Aá aáko, a adoosingeeká, án iiárií qaasáng, án qaymo sleémeero nee mar'idá' baraadá' i diriia ngi haniís, slám ngi haniís dír geeraá múk yaamuloó' wa alé, tuuár hareerók ka baraadá' i fól.»

¹² Abrahamu iri xupuú' dír geeraá múk yaamuloó'.

¹³ Efroni guri dír geeraá múk yaamuloó' wa báy, «Na'ás, án iiárií qaasáng. Tlaxoodá' hariim ar qaymoorók ngi buú', án kuúng u firiím, gám na'ás ilaooheek, as án tuuár harer'eé' ngiwa fool baraadí alé.»

¹⁴ Efroni Abrahamu gway mu/aywaáts, «Aáko, án iiárií qaasáng.

¹⁵ Qaymór hariímár tlaxór shekeélír tsiire tsiyáhh ar muqslár /awaak ar ta peésár tlehhaahhiti a gár milá dír án nee kuunge? Tuuár hareerók fooleek.»

¹⁶ Abrahamu nee Efroni axweesani ngiri faakiyé', Abrahamu har afi qoomaadá' gari qoomeés dír geeraá múk Hiti wa ale, shekeélír tsiire tsiyáhh ar muqslír /awaak ar ta peésár tlehhaahhiti, ar de'eemudae ta halaanu'uumár ar tlehhahhiti.

¹⁷ Gawaá adoorihe, qaymór Efroni tidár baraá Makpela, bihhaá da/aáw awa Mamre, mar'i nee xaai sleémeero kudá' baraadií diriiá' kiri weeriís,

¹⁸ dír Abrahamu geeraá múk Hiti sleémeero wa ale, kudá' taa dook dír afkú gixsa.

¹⁹ Alaá kaangwihe Abrahamu tuuár hareerós Sara gari foól baraá mar'idár qaymór Makpela, tidár bihhaá da/aáw awa Mamre, tidá' ta bay Hebroni, ar baraá yaamaá Kana'ani.

²⁰ Qaymo nee mar'idá' baraadií dirii' múk Hiti gari weeriís dír Abrahamu, tawa dír mukós nguy foliiti.