IIMU/UUNGW 21 - Biblía Axweesantá Hhohho' ar Mungú 2004

Isaka kuwa laqwaál

¹ AAKOÓ MUNGÚ Sara gari insláy, nee adoodá' aa dirós i oó', gari tleéhh.

² Sara iri tsít, Abrahamu guri na/oó garmaá i xwayluúr baraá diimaywose ar afi qoomaadá' Mungú aa dirósí oó'.

³ Garmaadá' Sara aa Abrahamúi xwayluúr, Abrahamu guri umií tsaát, umuuwós tay Isaka.

⁴ Garma deelo dakaát ngiwa áy, Abrahamu guri hheehhe'eés adoodá' Mungú ngwa báy.

⁵ Abrahamu kureeriiwós a tsiiru qoomár garmaawós Isaka kuwa laqwaál.

⁶ Sara iri ó', «Mungú aníng ina qwal/atís, nee umuúqo heé adoorí ga axaasi nee aníng an al qwalaala/aán.

⁷ Heé adoorí geera gaa Abrahamú i xuu', ar Sara na/ii ngiwa du'umis. Ala tam adoorihe án inós ugwa na/oó garmií xwaylúw baraá diimaywose.»

⁸ Na/aay iri uráy, kuri /oomeés, Abrahamu deelór ur gari tleéhh, baalaadá' Isaka kuwa /oomeés.

Guusár Hagari

⁹ Na/ayduú Hagari tidár Misri, tidá' nee Abrahamu taa al laqwaal, Sara guna aán iwa garmaawós Isaka baramaanuusi.

¹⁰ Abrahamu guri beér, «Lawaalo'oosíng nee garmaawós kwisinge guuseek, asma garmaaeé' Isaka nee garmaasuú lawaalo'o ni al aalin'aaká.»

¹¹ /Aymuuwí Abrahamu guri ló'wa gurhaamír ar áy as garmaawós.

¹² Munguú Abrahamu guri báy, «/Aymuuwí miwa tlakúy dír geeraawoge as garmaasíng, nee lawaalo'osíng. Umuúqo gár Sara naa oi, na iiárií qaaseek, asma yaeemirók dír niwa ti'it a baraá Isaka.

¹³ Garmaasuú lawaalo'o aníng sleeme u xooro tleéhh, asma inós sleeme a xwaylarók.»

¹⁴ Abrahamu iri tláy matlaatlér boo/e, muruú /ayma nee quruuntlír ma'aá wahaangw gari haniís dír Hagari. Na/aay guri daanduú Hagari tseék, gari guús. Inós iri tleér, iri hi'iimít baraá xaanxoó Be'er-shebár wa alé.

¹⁵ Ma'aydá' baraá quruuntli niwa faakiyé', inós na/aay guri qaatís dír gamuú xa'anoó niiná.

¹⁶ Inós iri adorqí surúk, har saweemá mahaangw iwa hardihi, iri iwít, asma inós ina baraá muunaáwósí ó', «Aníng adór na/aay ir gwagwa'an mawa ga/áw.» Nee na/aay iri tseé' /aa/eewo.

¹⁷ Mungú afór garma gari axaás, nee malaykamoó Mungú Hagari gari gawaá doorí wa ateét, gari báy, «Gár kiíng i daawitimiis a milá? Hagári, ma da'ayumiitaar, asma Mungú afór garma gaa axaás didií dirii'i.

¹⁸ Tláw, garma ooheek baraá dabaawók, asma aníng inós un xoorór ur tleéhh.»

¹⁹ Mungú inós gari ila' gwa/atís, inós hhalángw ma'aá koóm guri aán. Iri tleér, quruuntlír aáng gari i hhék, gari hatsís ma'aywo, nee garma guri qeér ma'aywo sleeme.

²⁰ Mungú nee na/aay ta dinkwa, na/aay iri uráy, iri baraá xaanxáy wa hoót, tari slakaatusmo.

²¹ Iri baraá xaanxoó Paranír wa hoót. Aayoorós guri harér i sleér baraá yaamaá Misrír wa ale.

Kaahi sleemuú Abrahamu nee Abimeleki

²² Qoomaadae Abimeleki nee Fikoli, heedaádá' úr oo slaqwaruuseerós gaa geerahaar, Abrahamu guna báy, «Mungú nee kuúng a dinkwa baraá umuúqo gár ta tlehha.

²³ Gím daxta, lo'o /ayeek ar umuú Mungú, ar kuúng gár tlaakw ngiwa aníng i tlehhká, laqaá na/iieé', laqaá na/aá nangw'eé', ala aqo ar adoodár gurhhooadá' aníng naa kuúng i tleéhh, kuúng ngin aníng i tléhh, baraá yaamuká' tawa hot.»

²⁴ Abrahamu iri oó', «Án lo'o a /aáy.»

²⁵ Abrahamu iri quraruú/ dír Abimeleki, asma hhalángw ma'aay kudá' sagadiyuusér Abimeleki aa hayót.

²⁶ Abimeleki iri oó', «Gaasíng an baloó xuaaká, nee heé adoosíng gaa tleehh u xuaaká, slám kuúng adoosíng ngaa baloó o'ká. Án adoosíng aga baloó axasiiká, aqo har laarí kilós.»

²⁷ Abrahamu hikwa nee bee/aangw giri haniís dír Abimeleki, inooín tsaraawo al'axweesani kari káh.

²⁸ Abrahamu dareemoó faanqw oo bee/aangw guri bihhií amaásl.

²⁹ Abimeleki Abrahamu guri yaahaás, guri báy, «Ahaá, dareemáywí faanqw oo bee/aangw taa bihhií amaásl oo milá?»

³⁰ Abrahamu iri oó', «Dareemáywí kuúng un baraá dabaaeé' wa ilaót, as daqaní kuúng tawa lamabu'usmo, adór heé hhalaangw gwaa fool tar aníng.»

³¹ Gawaá adoorihe umuú didá' kuri báy, Be'er-sheba, asma inooín tsaraawo lo'o ngina didá' wa /ayé'.

³² Al'axweesani kari dír Be'er-shebár wa axweés. Abimeleki nee Fikoli geeraharusmoó slaqwaruuseerós tari tláy, tari kií/ ay baraá yaamaá Filisti.

³³ Abrahamu ti'ita guri dahaás didár Be'er-sheba, umuú AAKOÓ MUNGÚ, Munguúduú alhhe'eesay wásl guri ateét baraá firoorose.

³⁴ Abrahamu iri hoót deelór yaariire baraá yaamaá Filistír wa alé tawa /eetusmo.