IIMU/UUNGW 20 - Biblía Axweesantá Hhohho' ar Mungú 2004

Abrahamu nee Abimeleki

¹ Abrahamu iri tláy yaamaá Mamrér wa alé, iri baskú xuú' ay yaamaá Negebu. Iri tla/ángw Kadeshi nee Shurír wa hoót. Naagáy iri hi'iimiít baraá Gerari wa alé.

² Abrahamu daanduú hareerós Sararo iri oó', «Tí an hho'or'eé'.» Abimeleki waawutmoó Gerari muu guri ya/aáw Sara kawa huwi amoorós.

³ Ala Mungú Abimeleki guri i daqáy ar baraá tlata, guri báy, «Kuúng a tuua, asma /ameenisíng taa hayót a harér hee.»

⁴ Ala Abimeleki Sara gaa i tseewuyká. Mungú guri báy, «Aá Aáko, xoorór dakuús wasl a tsú/a sleeme?

⁵ Xáy, inós aa oóiíke, ‹A hho'or'eé'.› /Ameenirí inós ar kilá' ina óiíke, ‹A hhiyaaeé'›. Án adoorí ana tleéhh ar muunuú hhoohhoó', dabaaeene sleeme dakuúsár naa tleéhh i káhh.»

⁶ Mungú guri báy ar baraá tlata, «Aníng aga tsaáhh adoorí kawa tléhh ar muunuú hhoohhoó', ala án kuúng uri ilaá/ tlakweema kiwa tlehhká. Gawaá adoorihe ugwa mawiiká /ameenirí kawa kwatit.

⁷ Ala daxta, /ameenisíng ki/iseek, asma Abrahamu a aarusmo, inós kuúng u aleefirín hota kiwa sleer. Ala kuúng barnaxes aga ki/iská, xueek, ar looeemaá kilae kuúng a gwá' nee mukók sleémeero.»

⁸ Abimeleki lawaaleerós sleémeero gari ateét, muruuwí sleémeero guri dir'ín i oó'. Inooín sleémeero tari da'ayuút.

⁹ Aluuwo Abimeleki Abrahamu guri ateét guri báy, «Gaarí naa atén i tléhh a milá, án kuúng gár uwa sadakuús a milá, ar kuúng tlakweemaaká' ur ngiwa daanduueéní qás, nee waawuti'iimar'eé'. Tlehhma'aá naa daanduueéní tléhh, i aníng wa harina'aaká.»

¹⁰ Abimeleki Abrahamu guri báy, «Gár taa aán a milá adoorí kari tléhh?»

¹¹ Abrahamu iri oó', «Asma ana ár adór diirihe Mungú kur da'ayumiitiiká, nee mukwí aníng i gaas, asma harer'eé' kawa hayota'.

¹² A ló', inós a hho'or'eé', dasír baabuúeé', ala inós a dasír aayír'eeneeká, aníng ngiri duúx.

¹³ Iimír baalaadá' Mungú aníng iwa loohatís dír doó baabuúeé' wa alé, ay baraá yaamaá dah'iima, aníng ngiri báw, ‹Umuúqo dír tay hardahaana, kiíng ta o', kwí a hhiyaaeé'.› »

¹⁴ «Abimeleki bee/aangw nee hikwa, nee lawaale nee sagadiyuuse gari haniís dír Abrahamu, nee hareerós Sara gari ki/ís sleeme.

¹⁵ Abimeleki iri oó', «Yaamueé' i geeraawók i dirii'iyá', didá' muunaáwók i slai na wa hooteek.»

¹⁶ Dír Sararo iri oó', «Aníng peésár afi qoomár kumuú wák ar doohho aga haniís dír hhiyaawók, tí ilaawók ngi hheehhe'es dír geeraá mukók sleémeero. Nee daqaní kiíng tiri gan'amuwók i ki/is dír muu sleémeero.»

¹⁷ Abrahamu Mungú guri firín, Mungú Abimeleki nee aamaarós nee sagadiyuuseerós giri hungu/uús as niwa malé laqwaaliya'.

¹⁸ Asma AAKOÓ MUNGÚ /ameena sleémeero ar doó Abimeleki gana xwayla /iít, asma Sara harér Abrahamu.