IIMU/UUNGW 2 - Biblía Axweesantá Hhohho' ar Mungú 2004

¹ Ala Mungú doori nee yaamu nee muruuwós sleémeero gay adoorír hhe'eés tleehhamooro.

² Ay bál baalár faanqw Mungú gadiyeérós sleémeero gaa hhe'eés, tidá' sleémeero ar aa tleéhh. Mungú iri hungu/uús bál baalár faanqwe, gadiyeeduwós kudá' sleémeero ngiwa hhe'eés.

³ Mungú baalaadár faanqw gana tsuúq, gari hhoohhoeés. Asma ina hungu/uús gadiyeeduwós kudá' sleémeero ngiwa hhe'eés awa tleehhamór doori nee yaamu.

⁴ Kaangwí an alki/ituú adoodá' doori nee yaamu kira tleéhh. Qoomaadá' AAKOÓ Mungú yaamu nee doori ngiwa tleéhh,

Asalmoó Edeni

⁵ gár naa ti'it i káhh baraá xatsoowo. Tam gitso naa ti'iitiká, asma AAKOÓ Mungú tluwaay gwa haniisiiká, laqaá tam heé yaamu gaa doosl i kaahh.

⁶ Kutli niri baraá yaamuú wa ti'ít, nee yaamu sleémeero giri naa/ás.

⁷ AAKOÓ Mungú hee guri tleéhh ar hhape, guri hiinsluú slafíngw i ufaáhh, hee tari heé slaáf.

⁸ AAKOÓ Mungú asalmo guri dahaás bihhaá da/aáw baraá yaamaá Edeni. Heewós kudá' aa tleéhh guri baraadádí qaás.

⁹ AAKOÓ Mungú xaa'aá daa'aweemaá dimbadimbé giri baraá hhapér wa titi'iís, xaa'aá hhohho' nee awa /aymár ya/aamá'. Nee baraá tla/ángw asalmoowo Mungú xa'anoó mamuuwós slafíngw hanmiisá' guri qaás. Nee xa'anoó mamuuwós xu'utír muruú hhó' nee oo tlákw laqaaqamá' guri malé qaás.

¹⁰ Yaae i deer ar baraá asalmoó Edenír wa wa/amiim, i asalmoó naa/amaamís. Aluuwo tiri qasmís tari yau tsiyáhh.

¹¹ Umuú yaaér geera a Pishoni, an tidá' yaamaá Hawila gaa harwet. Baraadae sahaábu i deer.

¹² Nee sahaábuú yaamuudá' ku ló'wa hhohhó'. Slám baraadae tlaa/aá hhohho' awa ta bay bedoóla i dayá', nee tlaa/aá tlaxo gawden awa ta bay shohamu.

¹³ Nee umuú yaaér tsár a Gihoni, an yaaér yaamaá Kushi sleémeero gaa harwet.

¹⁴ Nee umuú yaaér tám a Tigri. An yaaeedá' aa waarahh ar bihhaá da/aáw awa yaamaá Ashuru. Nee umuú yaaér tsiyáhh a Eufrate.

¹⁵ AAKOÓ Mungú heedaádá' guri huúw nee guri qaás baraá asalmoodá' ta bay Edeni, as nguwa doosli nee nguwa amohhe'eemisi.

¹⁶ AAKOÓ Mungú heedaádá' guri hara'ayín guri báy, «Mamaá xaai sleémeero awa baraá asalmoowí i asleér /aymaaro,

¹⁷ ala mamaá xa'anoó xu'utír muruú hhó' nee oo tlákw, mi /ayaar, asma bál mamaá xa'anoowí bira /ák xueek, a gwá'.»

¹⁸ AAKOÓ Mungú iri oó', «Hee iwa kilós hooti a gár hhooeeká. Heé nee inós slaqmís un tleéhh, oo alee/iisaywós wa hariím.»

¹⁹ AAKOÓ Mungú umuúqo makiito'ór sla/to gana titi'iís baraá yaamuú wa alé, nee tsir/ór gáwtí tlatlaaw, giri dír heedaádií huúw as ngiwa umeérí tlaaqi. Muruú slaáf sleémeero guri umeérí tlaáq, umeedá' tari umer'ín.

²⁰ Hee giri umeérí tlaáq umuúqo makiito'ór ta de'ena nee tsir/ór gáwtí tlatlaawa, nee umuúqo makaá baraá darmú hoota'a. Ala alee/isusmoó inós wa hariím gwaa slayká baraá tla/angw'ine.

²¹ AAKOÓ Mungú hee guri gu'tér iló' i haniís. Hee iwa baraá gu'teérií dirii'i, AAKOÓ Mungú guri gweehhamoó wák tuú/, didaádá' gari fu'unár tuuntuúk.

²² Nee gwehhamodá' aa tuú/ baraá heé wa alé, AAKOÓ Mungú guri /ameenírár tleéhh, gari huúw dír heedaádá'.

²³ Heedá' iri oó', «Daxta tí an tidá' aníng wa hariim, tí a fartá baraá faduueé' daahh, nee fu'unaá baraá fu'unaay'eé' dahhá'. Tí kan bay /ameeni asma dír kawa sláy a baraá hhawaata.

²⁴ Adoorí an gár hhawaata baabuúwós nee ayírós ngis geexay, tiri haragwaaiyá' nee hareerós, inooín tari slaqwtá wák tleehhiit.

²⁵ Heedá' nee hareerose tsaraawo a /aankwets, ala taa murumitiiká.»