IIMU/UUNGW 19 - Biblía Axweesantá Hhohho' ar Mungú 2004

Abrahamu iri kií/ amór do'ós i ale.

¹ Naagáy malaykeedá' tsár iri hardát ay Sodoma tsiindoowo, nee Loti aa iwiít afkú gixsár Sodomár i alé. Loti malaykeedá' gari ár. Ngiwa ár iri tláy as ngiwa ilaoohi, iri tumbarara'aát dír geeraaín i ale.

² Loti giri báy, «Bariiser'eé', na'asé' do' awaare'. Na'asé' dahaaré' baraá doó lawaalmoohúng i alé, ni delá'. Ya'aahúng hamaatlaak, daqaní matlaatlér boo/e ta tseewa tleerá', ta kumiitá' aaiiwo.» Malaykeedá' tari oó', «Aasla'áy, a adoosingeeká, atén looa a tsee/aá wa tleesaán.»

³ Loti giri harhhehhe'eemiís ak alé. Inooín niri ya/ané', niri dahiyé', baraá do'. Loti giri muruú /aymár i tleéhh, gina mikaáteedá' taa sluuftisiiká i tleéhh, inooín nay /ayiné'.

⁴ Qoomár tawa qatuú a'ay, yaamuloouusér gixsár Sodoma, doó Loti guri harwét, masoomba nee bariiseero, muu sleémeero oo bihhe sleémeero ngaa daahh.

⁵ Loti kuri ateét, kuri báy, mukdá' xweerakae naa hardah i amá. Amoorén i duuxang as atén nee inooín tawa fuqusaan.

⁶ Loti iri amor'ín i ti'iít afkú do', guri alií tseék.

⁷ Giri báy, «Hhaee'eé', án kuungá' nu harhheehhe'eés, adoosíng tlaakw ma tleehhara'.

⁸ Ga/aawaak, dasuú tsár u koóm oo nee hhawaata taa alqaatiiká. Án kuungá' nu harhhehhe'eemiís ngi amorhúng i duúx, adoodá' hhoo' dír ilaahunge ti tlehhe', ala mukwí mu gár tlaákw i tleehhara', asma inooín nina dahiyé' baraá guruú dooeé' alé.»

⁹ Loti nguri bayé', «Quútl, suruúk, atén a waarahhaán.» Niri kaahiyé', «Kuúnguú /eetusmo, atén tina sakwasleemárár eéri? Gimáy, kuúng un ak gár tlaákw i tleehhaán ta kusingae.» Loti nguri harasuruukiyé', afkú do' ngwa lak fee/iyé'.

¹⁰ Ala malaykeedá' daber'ín ngiri duuxiyé', Loti nguri taatahhiyé', nguri dahaasiyé' amor'ín i ale baraá do'. Do' nguri tseegiyé'.

¹¹ Aluuwo mukdaádá' afkú doó i dirií' kuri taampúy, oo ninákw nee oo urene, tam tay slaaqamiít afkú do' leelehhtuuwo, kuri slayká.

Ti'inángw Loti

¹² Naagáy mukdaádá' tsár Loti guri báy, «Xáy, heé hatlá' ta koon i deéro diirihe? Hhawaataá dasuuwók, laqaá daaqaywók, laqaá dasuuwók, laqaá kudá' taqo koonda baraá gixsaro, duuxang baraakae.

¹³ Asma atén yaamuká' i hhitiimaán. Asma /aa/eeín nina hardihiyé' dír geeraá AAKOÓ MUNGÚ, nee AAKOÓ MUNGÚ taa ya/aáw as kiwa hhitimaan.»

¹⁴ Loti iri ti'iít, hhawaataá dasuuwós giri ádbeemuú áy, iri oó', «Qwalaasaré', ti'iitaré' baraá ayaawihe, asma AAKOÓ MUNGÚ gixsarí ga qwaarees.» Ala Loti tari adór heé tatlkuús dír hhawaataá dasuuwose.

¹⁵ Qoomár matlaatlér boo/e malayke Loti guri harakés, i kat, «Tláw, kuúng nee hareerók nee dasuuwók kwí tsár diirí dirií', ma qwaarara' baraá tlakweemaá gixsarí.»

¹⁶ Naxés Loti i hhawahhaaw, naagáy malaykeedá' Loti guri dawa ót, nee dákw hareerós nee dabaá dasuuwós kudá' tsár, ar adór AAKOÓ MUNGÚ ngura gurtláy, kuna duúx baraá gixsaro.

¹⁷ Qoomár kiwa tsee/ií duúx, malaykamoó wák iri oó', «Goów, slafiingók ba/amiseek, ló' ma alií qaytaar, tam sleeme ma dír wák i sihhiitaar baraá xatstihe, ti ba/amis gawaá tloomaarí alé, as tawa gwa'aká.»

¹⁸ Loti giri báy, «A adoosingeeká, bariiser'eé'.

¹⁹ Ga/aaweek, lawaalmoowók ya/aám gaa sláy dír ilaawoge, kuúng gurtleemuuwók ngwa dók baraá tisíng naa aníng i tléhh ar slafingw'eé' kuwa ba/amís. Aníng guwoó gawaá tlooma u aslawká, as mitiwa sláy nee tidá' tlaakw, án niri gwaá'.

²⁰ Ga/aaweek gixsarí diirí tseew aníng a i goów. Inós ka niina, xaa ya/aám aníng niwa baraaqií goow, xáy, gixsarí ka niináweéke? As aníng hhiintlueé' nguwa tuu/.»

²¹ Kuri báy, «Ga/aaweek, tam /aymuusíng naa ó' ugwa ya/aám. Gixsasíng naa ó' a qwaareesaaká.

²² Gimáy, ti ba/amis amoosií alé. Asma gár ni tleehh i ala káhh ay dír tay dat baraasí alé.» An gár gixsadá' kasa báy Soari.

Qwaareesár Sodoma nee Gomora

²³ Qoomár looa niwa tsiiríhh, Loti ina dáh Soari.

²⁴ AAKOÓ MUNGÚ asltá kibiriíti ngiri gawaá doorí wa kwaáhh daanduú Sodoma nee Gomora.

²⁵ AAKOÓ MUNGÚ gixsaduudá' giri qwaareés ar asla, nee xatsooine, nee kudá' sleémeero baraá gixsaduudá' hootá', nee tidá' sleémeero naa harma/ baraá yaamudae.

²⁶ Ala harér Loti ina alií qaytsít, iri uhmoó diwi tleehhít.

²⁷ Abrahamu iri ti'iít matlaatleero ay didiíwa axweés nee AAKOÓ MUNGÚ.

²⁸ Inós iri qaytsiít bihhaá Sodoma nee Gomora, nee yaamu sleémeero awa ayaadá', ga/aaweek, quuír naa yaamuú wa tleer gari ár, adór ira tsa/aán, adór quuír gufteeri.

²⁹ Ala Mungú yaamuudá' ngiwa hhitín, Abrahamu guna insláy, Loti guna hiingeés baraá yaamudae, as Loti munguwa qwaareés dinkwa nee múk yaamuudá'.

Iimu/úngw múk Moabu nee múk Amoni

³⁰ Loti iri iimír Soari wa tsa/án, iri baraá mar'ír wa hoót gawaá tlooma, inós dinkwa nee dasuuwós kudá' tsár, asma ina da'ayuút iwa yaamaá Soarír wa hooti.

³¹ Dasír ur ar niina gari beér, «Baabuúrén aa uráy, slám hee i kaahh baraá yaamukae oo atén ti duxuút as na/ii kiwa slawaan.

³² Gimáy, baabá u wahaasaán as tawa alqaataan nee inós, as na/ii kiwa slawaan.»

³³ Baabuúín kuri wahaás xweeradaádae, dasidá' ur iri qatuú eér dír baabá, tam inós gár i xui i káhh, qoomár iwa qatuú eér, tam qoomár iwa tleér.

³⁴ Bál tsár dasír ur ar niina gana beér, «Ga/aaweek, aníng ana alqaataán nee baabá /isá'. U malé wahaasaán xweerakaákae, kiíng ta dát, ta qát dirós, as na/ii kiwa slawaan.»

³⁵ Baabuúín nguri malé wahaasiyé'. Xweerawo tidá' niina iri tleér iri qatuú eér dír baabá, ala baabá gár i xui i káhh qoomár iwa qatuú eér, tam qoomár iwa tleér.

³⁶ Naagáy dasuuwí tsaraawo oo Loti iri tsíh dír baabuúín wa ale.

³⁷ Dasidá' ur garma guri xwayluúr, umuuwós guri beér Moabu. Kwí an baabuú múk Moabu tam ay laarí.

³⁸ Nee tidá' niina garma guri xwayluúr, umuuwós guri beér Ben-ami. Kwí an baabuú múk Amoni tam ay laarí.