IIMU/UUNGW 18 - Biblía Axweesantá Hhohho' ar Mungú 2004

Boo/eesár al'axweesantá Mungú

¹ AAKOÓ MUNGUÚ Abrahamu guna harati'iít baraá yaamaá Mamre. Abrahamu qoomaadae i iwiwiit dír afkú heémarós wa alé, qoomár siree/ír tlaatla/aangw.

² Iri qaytsiít, ga/aaweek, múk tám aa sihhiít dír geeraawós. Abrahamu ngiwa ár, iri ta'aaín iimír afkú heémarós wa alé as ngiwa al'ay, iri tumbarara'aát.

³ Iri oó', «Bariiser'eé', án bar gurtleemu ugwa sláw dír ilaahunge, anuú sagadiyusmoohúng, mi waarahhara'.

⁴ Ma'aá niiná kingi huuw as ya'aahúng kiwa hamtla', ta hungu/usá' baraá gamuú xa'anoowí.

⁵ Qoomár bar hara hungu/uumisá', aníng muruú /aymár niiná ngu amohhe'eés, ta /ayiindá', kahhó' /uuruú tar kumiita' baraá aaiiwo u sleerá', asma aníng sagadiyusmoohúng ina i hardaté'.» Inooín kuri báy, «Gimáy, tleehheek ar adoodá' kara ó'.»

⁶ Naagáy Abrahamu iri gaanslár kií/ amór Sara baraá heéma, gari báy, «Mutliít, slooqa'aá tám awa puurúdá' hhohhó' adaá amohhe'eeseek, lufu/eek, mikaáte ka tléhh.»

⁷ Abrahamu iri ta'aaín ar gaanslaay ay amór hikwaawós, dama ngina huúw, tidá' wahhaar, ar hhoohhoo', gay haniís dír sagadiyusmoowós as ngiwa gaanslár amohhe'eesi.

⁸ Abrahamu di/tá /awak nee ilwa nee fu'unaá damaadá' aa amohhe'eés, giri qaás dír geeraaín, giri dahi'ís as tawa /ayin. Inós iri sihhiít bihhaaín dír gamuú xa'ano, as ngiwa sagadiyuusi qoomár inooín niwa /ayina'.

⁹ Inós nguri yaahasiyé', «Hareerók Sara i amá?» Iri oó', «I baraá heéma.»

¹⁰ Oo wák baraá tla/angw'ine Abrahamu guri báy, «Looeemaá kilae kurko siiwár adoorihe án ni kií/, nee qoomaadae hareerók Sara na/oó garma gwaa sleér.» Qoomaadae Sara i aluuwósí dirí', dír afkú heéma, i iiár qamiín.

¹¹ Ala Abrahamu nee Sara naa ló'wa diimadiné', nee Sara sleeme aa ló'wa diín, nee qoomár xwayla aa waaráhh.

¹² Gawaá adoorihe Sara iri qaseén baraá muunaáwós i alé, i kat, «Aníng aga diím, aakooeé' sleeme aa dín, ala iqo ya/aánda aníng nee aakooeé' tawa alqaataan, qwal/amaaye kay tsuwa slawaán.»

¹³ AAKOÓ MUNGUÚ Abrahamu guri báy, «Bareemák Sara ina qaseén, i kat, ‹Án looeemawo na/aay uqo xwayluúwa, anír aga diim?›

¹⁴ /Aymuú gawít i deéro oo AAKOÓ MUNGÚ gur baá/? Har afi qoomaadá' án naa ooi, án ni kií/ kurko siiwár adoorihe, Sara na/oó garma gwaa sleér.»

¹⁵ Ala Sara iri tlánk i kat, «Án aga qaseemiiká,» asma ina da'ayút. AAKOÓ MUNGÚ iri oó', «Alók, qaseengo kaá ga qaseén.»

Abrahamu i Sodomár alekal/án

¹⁶ Aluuwo mukdá' iri tláy, Abrahamu giri haydohiís.

¹⁷ AAKOÓ MUNGÚ iri oó', «Xáy, gaarí ni tleehh an lú/a dír Abrahamuwo?

¹⁸ Barqo Abrahamu inós un xoorór ur tleéhh, nee ar baraá inose xoordu sleémeero awa yaamu kin tsuuq?

¹⁹ Aníng inós una tsawaár, asma na/iiwós ngiwa hara'ayin, nee na/aá na/iiwós, loohír AAKOÓ MUNGÚ ngiwa oohiya', as gan'amu nguwa tleehhiya' nee sakwasleema, as AAKOÓ MUNGÚ al'axweesantós dír Abrahamuwo ngiwa boo/esi.»

²⁰ AAKOÓ MUNGÚ iri oó', «Asma /aa/aá múk Sodoma nee Gomora naa tlahhiyé' nee tlakweemaaín naa dooginé' ló'wa alé,

²¹ daxta, án a aweér ngiwa ar tidá' i tlehhitiya', áx a harqoomoó /aa/eedá' naa amor'eé' hardihií'i. Nee bar adooriheeká, masók a xuú'.»

²² Naagáy mukdá' iri amoodá' wa tláy, nay Sodomár xuiyé', ala Abrahamu ina sihhiít dír geeraá AAKOÓ MUNGÚ.

²³ Abrahamu iri amoorós i tseewúy, iri oó', «Xáy, heé hota ganaá' nee heé tlakusmo in al qwaarésa?

²⁴ Bar múk mibeeri kooán oo hota ganaá' bir deer baraá gixsaro, yaamu i qwaarésa sleeme, i meerakáhe as mukduú mibeeri kooán oo hota ganaá' oo baraadá' i dirií'.

²⁵ Aasla'áy, adoosíng ma tleehhaar, heé hota ganaá' nee tlakusmo kiwa alqwaares. Heé hota ganaá' tawa adór heé tlakusmo, Aasla'áy, sakwasleemusmoó yaamu sleémeero gan'amu gu tleehhikáhe?»

²⁶ AAKOÓ MUNGÚ iri oó', «Baraakaá gixsár Sodomaro múk mibeeri kooán oo hota ganaá' bura ár, umuúqo diiro an máw as inooín.»

²⁷ Abrahamu iri ilawaáts, iri oó', «Aga qo qiítl nee Aako tawa axweesaan, aníng aqo adór teeri nee da/ara.

²⁸ Barnaxes awa kooán naa /aaruyé' baraá kudá' mibeeri kooán awa hota ganaa'a'a, xáy, gixsa sleémeero an qwaarésa as kudá' kooán naa /aaruye'?» AAKOÓ MUNGÚ iri oó', «A qwaareesaaká baraakae awa mibeeri tsiyáhh nee kooán bir dayá'.»

²⁹ Iri kumiít axweesanto iwa kaahi, «Bar awa mibeeri tsiyáhh i dayá'?» AAKOÓ MUNGÚ iri oó', «A tleehhaaká as kusingá' mibeeri tsiyáhh.»

³⁰ Abrahamu iri oó', «Aáko, ma buhhaar, aníng ni malé axweés.» Iri oó', «Bar awa mibeeri tám i dayá'.» AAKOÓ MUNGÚ iri oó', «Awa mibeeri tám bir dayá' baraakae, a tleehhaaká.»

³¹ Abrahamu iri oó', «Ga/aaweek, án aga qo qiítl nee Aako niwa axweesaan, bar awa mibeeri tsár bir dayá'?» Aako iri oó', «Gixsa a qwaareesaaká as kusingá' mibeeri tsár.»

³² Abrahamu iri malé oó', «Aáko, ma buhhaar, án ni malé ilawaáts waiiká' kilooine. Xáy, bar awa mibaangw i dayá'?» Aako iri oó', «A qwaareesaaká as kusingá' mibaangw.»

³³ AAKOÓ MUNGÚ iwa hhe'eés axweesanto nee Abrahamu, iri tláy,