IIMU/UUNGW 16 - Biblía Axweesantá Hhohho' ar Mungú 2004

Hagari nee Ishmaeli

¹ Ala Sarai harér Abramu, na/aay gwa sleeriiká, inós sagadiyuso'o ga koón ar Misri, umuuwós a Hagari.

² Sarai Abramu guna beér, «Ala daxta AAKOÓ MUNGÚ aníng iga xwayla ilaá/ as mawa laqwaál. Alqaaté' nee sagadiyuso'or'eé', doóqa garma u sláw ar inós.» Abramu afór Sarai gari iiárií qaás.

³ Alaá Abramu kureeraá mibaangw ngiwa hoót baraá yaamaá Kana'aniro, Sarai harér Abramu, Hagari tidár Misri ar sagadiyuso'oorós, gari hanís dír Abramu hhawaatuuwós tawa adór hareerós.

⁴ Abramu nee Hagari tari alqaát, inós iri tsít. Ala Hagari tiwa aán adór inós tar tsiiháy, Sarai gari waaqá'.

⁵ Sarai Abramu guri beér, «Slasla/aruuwí aníng iga slay masók i gawaawók. Aníng sagadiyuso'or'eé' ngina haniís, ala inós ngiwa aán a tsiiháy, aníng daxta iga waaqá'. Ala AAKOÓ MUNGÚ sakwasleema ngi tsati dír án nee kuunge.»

⁶ Ala Abramu Sarai gari báy, «Ga/aaweek, sagadiyuso'oorók i dabaawók, tidá' hhoo' dír ilawoge ti tlehh.» Sarai gari ló'wa baramaaús, iri tlatláhh dír geeraawose.

⁷ Malaykamoó AAKOÓ MUNGÚ Hagari gari ár, i dír kutltá ma'aay ar baraá xaanxaay. Kutltadá' dír i diri' a dír loohír Shurír kaw.

⁸ Malaykamo gari yaahaás, «Hagári, kiíng sagadiyuso'ór Sarai a dáhh, nee kiíng a keér?» Hagari iri ilawáts, iri ó', «Án aamar'eé' Sarai ngina ilagoów.»

⁹ Malaykamoó AAKOÓ MUNGÚ gari báy, «Kií/ amór aamaarók, nee aamaarók ilaiwawa/eek nee sagadiyuseek.»

¹⁰ Malaykamoó AAKOÓ MUNGÚ gari malé báy, «Aníng xwaylarók ngi doók, tam faaro ga ya/aandaaká as kawa yaariír.»

¹¹ Malaykamoó AAKOÓ MUNGÚ gari báy, «Ga/aaweek, kiíng a tsiiháy, na/oó garma u xwayluúr, umuuwós kway beer Ishmaeli. asma AAKOÓ MUNGÚ /aa/aá baramaanirók gaa axaás.

¹² Inós a heé iidaraaráh adór daqoó aa nariis tla/ángw muko. Inós a wakusmoó muu sleémeero, nee muu sleémeero inós gu waak. Inós baraá hotaawose nee hhaeewós tay kaahi slay'aaká.»

¹³ Inós AAKOÓ MUNGÚ guri umúr atét, kudá' nee inós naa axweesiye'. I kat, «Kuúng a Munguú xumiís.» Asma ina ó', «Tam aníng Mungú ugwa qo tsuwa ári niri kumiít slafiingo?»

¹⁴ Asma adoorihe hhalaangw kuri báy hhalángw Lahai-roi nee i baraá tla/ángw Kadeshi nee Beredírí dirii'.

¹⁵ Hagari Abramu guri na/oó garma i xwayluúr. Abramu guri umií tsaát, guri báy Ishmaeli, garmaawós kudá' Hagari aa xwayluúr.

¹⁶ Abramu a heé kureeraá mibeeri dakaát nee lahhoó' qoomár Hagari Ishmaeli nguwa xwayluúr.