IIMU/UUNGW 15 - Biblía Axweesantá Hhohho' ar Mungú 2004

Alqadór Mungú dír Abramu

¹ Alaá kaangwihe Abramu axweesantá AAKOÓ MUNGÚ gari axaás ar baraá iigu'utu, i kat, «Abrámu, ma da'ayumiitaar, aníng a baqmoórók. Slaasláwarók ka ló'wa ur.»

² Abramu iri oó', «Aá Aakoó Mungú, gár ni aníng i hanis a milá? Aníng baraakaá yaamu in geexáw tam na/aay u koomaaká. Nee heé dooeé' gu aál, a Elieseriwí oo Damasko.»

³ Abramu iri malé oó', «Ga/aaweek, xwayla nga haniská, nee lawaalmoó taa baraá dooeé' laqwaál, inós an aalitmooeé'.»

⁴ Axweesantá AAKOÓ MUNGÚ gari axaás, i kat, «Kwí u aaliiká, ala kudá' kuúng ta laqwal an oo u aál.»

⁵ Mungú Abramu guri tsee/ií huúw, iri oó', «Gawaá doori i qaytsiteek daxta, tsatse/ faareek, bur aleesleér faarooro.» Guri malé báy, «Adoorí an adór xwaylarók i diri'.»

⁶ Abramu AAKOÓ MUNGÚ guri haratlintií', Mungú Abramu guri gan'amií harafaár as haratlintaaoorí.

⁷ Guri malé báy, «Aníng a AAKOÓ MUNGÚ, kuúng una huúw iimír yaamaá Urír wa alé ar múk Kaldayo, as yaamuká' ngiwa kuúng i haniis kiwa al.»

⁸ Abramu iri oó', «Aá Aakoó MUNGÚ, adór án ngir tsaahh a adoomá adór yaamuuká' ngir aál?»

⁹ Mungú iri oó', «Damár kureeri tám slawang, nee leeír kureeri tám nee gwaanduú kureeri tám nee hhooki nee na/oó hhooki.»

¹⁰ Abramu muruudá' sleémeero guri sláy, guri feehhamiís, kaeemi tsár tsár. Umuúqo ka'amiiro gari qaás, gari gura' amór tiqá' xu'ús. Ala aqo har tsir/o gana feehhamisiiká.

¹¹ Tam qoomár gwares iwa gawaá tu'uudá' i iwiiwiti, Abramu guna gusiisín.

¹² Nee looa iwa darat, Abramu gu'tér ilo' guri ót. Dae nee iimi giwtír hhamhhám guri ót.

¹³ AAKOÓ MUNGÚ Abramu guri báy, «Xueek, xwaylarók ka /aytiis baraá yaamaá kooineeká, tari /eetuuse. Inooín kiri lawaale tleehh, kiri slahh'eemiis ar har afi qoomár kureeraá tsiire tsiyáhh.

¹⁴ Ala xooroodá' inooín ta sagadiyuusi, aníng a sakwasleemuút. Daqaní inooín aluuwo daqaari'iimár yaariir ngarir ti'iitiyá'.

¹⁵ Ala kuúng an diín ar diimoó hhohhó', tari gwá' ar wayda, turi fool.

¹⁶ Xwaylarók nin diirí kí/ qoomár qartá tsiyahhe. Asma tlakweemaá múk Amoni sakwasleemar'ín aa xeeriiká.»

¹⁷ Tam qoomár looa iwa dát, iimi iwa gíp, hutloó quuír wa haáts nina ti'iít, nee tsaa'astá asltá koom ina waaráhh ar baraá tla/eeriidaá fu'unaydá'.

¹⁸ Baldae Mungú alqado gana tleéhh nee Abramu, Abramu guri báy, «Aníng xwaylarók a yaamuká' i haniís, iimír yaaér baraá yaamaá Misri ay yaaér ur ar Eufrate,

¹⁹ yaamaá múk Keni, nee múk Kenisi nee múk Kadmoni,

²⁰ yaamaá múk Hiti, nee Perisi, nee Refai,

²¹ nee Amori, nee Kana'ani, nee Girgashi, nee awa múk Yebusi.»