IIMU/UUNGW 13 - Biblía Axweesantá Hhohho' ar Mungú 2004

Abramu nee Loti

¹ Abramu iri tláy iri /iikú xuú' ay yaamaá Negebu awa baraá yaamaá Kana'ani, inós nee hareerós nee umuúqo gár i kona. Nee Loti tina koné'.

² Abramu a daqaarmo. Hikwaá yaariir gi kón, tam peésa nee sahaábuwo.

³ Abramu iri yaamaá Negebuú wa tláy, iri kumaamiít aaiiwo ay yaamaá Beteli nee gixsár Ai.

⁴ Didá' kitángw ilahhooa ngway tleéhh. Nee Abramu umuú AAKOÓ MUNGÚ guri didá' wa ateetín.

⁵ Nee Loti, kudá' naa loohiye' nee Abramu, inós sleeme daqooroó hikwa nee muruú ququmát gu kón sleeme, nee heemaduuwós sleeme as múk do'ós nee lawaaleerós sleémeero.

⁶ Yaamu niri alné' qawtantá muruuine, tam inooín niwa dinkwár wa hootiya', asma hikwaaín ki yaariir.

⁷ Naagáy gila niri xayé' tla/ángw de'eemuusér hikwaá Abramu nee de'eemuusér hikwaá Loti. Nee de'emadaádae múk xoorór Kana'ani nee múk xoorór Perisi tan yaamuudá' wa hoot.

⁸ Abramu Loti guri báy, «Gila mindiwa xayé' tla/ángw aníng nee kuunge, laqaá tla/ángw de'eemuuser'eé' nee de'eemuuseeroge. Asma án nee kuúng a hhae.

⁹ Yaamu sleémeero diroge ki geehhoóeéke? Gím ti paraatlaán. Kuúng bar baskú slá', aníng a /iikú xuú'. Ala kuúng bar /iikú slá', aníng an baskú xuú'.»

¹⁰ Loti iwa qaytsiít, xatstá Yordani gana ár ay gixsár Soari, i ma'aá koón umuúqo diiro, adór asalmoó Mungú, nee adór yaamaá Misri. Qoomaarí a qoomár AAKOÓ MUNGÚ Sodoma nee Gomora ngiwa qwaareesiiká.

¹¹ Naagáy Loti xatstá Yordani gari sleémeero wa tsawaár, iri tláy, iri bihhaá da/aá xuú'. Tiri adoorír paraatliyé'.

¹² Abramu iri hoót baraá yaamaá Kana'anír wa alé, nee Loti iri hoót baraá gixsaduudaá xatstadá' wa alé, heémarós gari surkuús ay gixsár Sodoma.

¹³ Ala múk Sodoma a múk tlákw oo tlakweemaá yaariir gaa tlehhahhiit dír geeraá AAKOÓ MUNGUHE.

Abramu iwa loohi baraá gixsár Hebroni

¹⁴ Loti tiwa paraátl dír Abramuwo, AAKOÓ MUNGÚ Abramu guri báy, «Áx qaytsiít iimír diirí ti dirí' wa alé ay bihhe sleémeero, /iya nee basko, da/aáw nee /uwawo.

¹⁵ Asma yaamuká' sleémeero ta ga/eer, án ngi kuúngií haniís nee xwaylarók ay kureér.

¹⁶ Aníng xwaylarók a ureés ngari adór teerír yaamu tleéhh. Barnaxes hee teerír yaamu faarooro ga aleesláy, daqaní xwaylarók sleeme ga aleesláy faarooro.

¹⁷ Sihhiít, hi'iimiít baraá yaamuká' wa alé, baraá bihheerós nee tlenaangose. Asma yaamuká' ngin kuúngí haniís.»

¹⁸ Naagáy Abramu heémarós gay surkuús, iri hardáh dír ta/eewoó heé ta bay Mamre, baraá yaamaá Hebroni. Iri didá' wa hoót. Didaádae kitángw ilahhooa guri tleéhh as AAKOÓ MUNGÚ.