IIMU/UUNGW 12 - Biblía Axweesantá Hhohho' ar Mungú 2004

Ateetamór Abramu

¹ AAKOÓ MUNGÚ Abramu guri báy, «Ti'iít, kuúng, baraá yaamuuwoge nee baraá mar'eefowoge nee doó baabuúwoge, tláw ay baraá yaamaá án ni kuúngií laqaam.

² Án kuúng u xoorór ur tleéhh, án kuúng u tsuúq, nee umuuwók nguri ureés, nee kuúng tari tsuuqa tleehhít.

³ Oo kuúng u tsuúq, án u tsuúq, Oo kuúng u lu'umís, án un lu'ús. Nee baraá kuunge xoordu sleémeero kin tsuuq.»

⁴ Naagáy Abramu iri tláy adoodá' AAKOÓ MUNGÚ ngura ádbáy. Nee Loti garmoó hhiyaawós tiri koné'. Qoomaarihe Abramu a heé kureeraá mibeeri faanqw nee kooán, qoomár iwa ti'iít baraá gixsár Haraniro.

⁵ Abramu hareerós Sarai gari ar tláy, nee Loti garmoó hhiyaawós, nee muruuwós sleémeero nee lawaaleerose, kudá' aa sláy baraá gixsár Haranír wa alé. Tari ti'iít as tawa tlay ay baraá yaamaá Kana'ani. Inooín tawa dáh baraá yaamaá Kana'anír i alé,

⁶ Abramu iri waaraáhh ar tla/ángw yaamaá Kana'ani, iri hardáh ay dír ta/eewír More, tidá' tseew bihhaá gixsár Shekemu. Qoomaadae múk xoorór Kana'ani ina yaamuudá' wa hoót.

⁷ Amoodaádae AAKOÓ MUNGÚ Abramu guri i ti'iít, guri báy, «Yaamukaáká' ngin kuúng i haniís nee xwaylarók.» Didaádae Abramu kitángw ilahhooa guri tleéhh as AAKOÓ MUNGÚ nguwa ilahhooárí haniisi, kudá' gwaa i ti'iit didae.

⁸ Abramu iri didá' wa tláy, iri hardáh ay yaamaá goongoama bihhaá da/aáw awa gixsár Beteli. Heémarós gari didií kikií', gixsár Beteli i bihhaá /uwa, nee gixsár ta bay Ai i bihhaá da/aáw. Kitángw ilahhooa guri tleéhh, umuú AAKOÓ MUNGÚ guri ateetín baraá firoorose.

⁹ Abramu iri kumaamiít aaiiwo amór báskwí alé ay dír yaamaá Negebu.

Abramu i baraá yaamaá Misri

¹⁰ Ala giyeér ur nina tleér baraá yaamaá Kana'aniro. Abramu iri tláy iwa ala hotaá ay yaamaá Misri, asma giyeédá' ka ló'wa ur.

¹¹ Qoomár iwa nakaá/ yaamaá Misri, hareerós Sarai gari báy,

¹² «Kiíng a /ameenír hhoohhoo'. Múk Misri kiíng bira ár, tan ooi, ‹/Ameenirí a hareerós.› Aníng iri gaasiyá', kiíng tiri máy.

¹³ Án kiíng i firiím, kiíng ta o', ‹Inós a hhiyaaeé',› as aníng niwa /uw, nee slafingw'eé' iwa ba/an as kiíng.»

¹⁴ Naagáy Abramu iwa hardáh yaamaá Misri, múk Misri /ameenidá' gari ár, adór inós kar hhoohhoó'.

¹⁵ Mukdá' urén oo waawutmo Farao /ameenidá' gari ár, hhohhoartós ngiri ooiyé' dír waawutmo Farao. Aluuwo /ameenidá' kari huúw amór doó Farao i alé.

¹⁶ Farao Abramu guri hhooeemií tleéhh as /ameenidá'. Abramu bee/aangw guri sláy, nee hikwa nee daqwaayér yaqaambe, nee lawaalér hhawaate nee ar /ameena, nee daqwaayér /ameena nee angamía.

¹⁷ Ala AAKOÓ MUNGÚ Farao guri slaáhh, nee múk do'ose, ar muxtár ur as Sarai, harér Abramu.

¹⁸ Farao Abramu guri ateét guri báy, «Tí a milá naa aníng i tléhh? Baré ngaa oiká adór tar hareerók?

¹⁹ Kuúng baré ana ó' a hho'oorók, aníng ngiri duúx? Ala daxta hareerók tí areengaay, ar tlaweek!»

²⁰ Farao mukós guri hara'ayín daanduú Abramuwo kuwa hingeesi. Inooín kuri hingeés baraá yaamudae, inós nee hareerós nee umuúqo gár i kona.